ఎముకలను ఉక్కులా మార్చే పవర్‌ఫుల్ లడ్డు.. ఒక్కటి తిన్నా చాలు..
ఈ లడ్డులు దేవుడికి నైవేద్యంగా సమర్పించడానికి, ఇంకా మీ కుటుంబ సభ్యులతో పంచుకోవడానికి జ్యూసీగా, నోరూరించే రవ్వ లడ్డూలు ఒక అద్భుతమైన రెసిపీ. ఈ రెసిపీ, పక్కా కొలతలతో, చాలా ఈజీగా లడ్డూలు ఎలా తయారు చేయాలో ఇక్కడ వివరంగా చదివి తెలుసుకుందాం.. మీరు ఈ కొలతలతో చేస్తే 30 నుంచి 32 రుచికరమైన లడ్డూలు వస్తాయి.
కావాల్సిన పదార్థాలు: బొంబాయి రవ్వ : 2 కప్పులు, నెయ్యి: పావు కప్పు + 1 టేబుల్ స్పూన్, జీడిపప్పు: 10, కిస్మిస్: 10, పచ్చి కొబ్బరి తురుము: 1 కప్పు (లేదా ఎండు కొబ్బరి పొడి), పంచదార: 1.75 కప్పులు (సుమారు 1/2 కిలో), యాలకులు: 10, గోరువెచ్చటి పాలు: అవసరమైనంత తీసుకోవాలి.
ముందుగా స్టవ్ మీద పాన్ పెట్టి అందులో పావు కప్పు నెయ్యి వేయాలి. నెయ్యి కరిగాక, కొన్ని జీడిపప్పులు వేసి బంగారు రంగు వచ్చేవరకు వేయించాలి. జీడిపప్పు కొంచెం వేగిన తర్వాత, కొన్ని కిస్మిస్‌లు కూడా వేసి, అవి ఉబ్బే వరకు వేయించి ఒక ప్లేట్‌లో నెయ్యి లేకుండా తీసి పక్కన పెట్టుకోవాలి. ఇప్పుడు అదే నెయ్యిలో రెండు కప్పుల బొంబాయి రవ్వ వేసుకోవాలి. రవ్వ అడుగు మాడిపోకుండా ఉండటానికి మందపాటి అడుగు గల, వెడల్పాటి పాన్‌ను ఉపయోగించడం మంచిది. తక్కువ మంటపై రవ్వను కమ్మటి వాసన వచ్చేంత వరకు, రంగు కొద్దిగా మారేంత వరకు నిరంతరం కలుపుతూ వేయించాలి. రవ్వ చక్కగా వేగడానికి కొంత సమయం పడుతుంది, కానీ ఇది లడ్డూల రుచికి చాలా ముఖ్యం. రవ్వ బాగా వేగిన తర్వాత ఒక పెద్ద పళ్ళెంలోకి మార్చుకోవాలి.
మళ్ళీ అదే పాన్‌ను ఉపయోగించి, ఒక కప్పు పచ్చి కొబ్బరి తురుమును వేయించాలి. తక్కువ మంటపై కొబ్బరిలోని తేమ తగ్గి, పొడిపొడిలాడేంత వరకు వేయించాలి. ఆ తర్వాత, ఒక టేబుల్ స్పూన్ నెయ్యి వేసి, కొబ్బరి ఎర్రగా అయ్యే వరకు వేయించాలి. ఇలా వేయించిన కొబ్బరి లడ్డూలకు మంచి రుచిని, ఎక్కువ నిల్వ ఉండే గుణాన్ని ఇస్తుంది. ఈ వేయించిన కొబ్బరిని కూడా రవ్వ ఉన్న పళ్ళెంలోకి వేసుకోవాలి. మీరు పచ్చి కొబ్బరికి బదులుగా ఎండు కొబ్బరి పొడిని కూడా ఉపయోగించవచ్చు.
ఒక మిక్సీ జార్‌లో 1.75 కప్పుల పంచదార, 10 యాలకులు వేసి, మరీ మెత్తగా కాకుండా కొంచెం బరకగా పొడి చేసుకోవాలి. ఈ పంచదార పొడిని రవ్వ, కొబ్బరి మిశ్రమంలో కలపాలి. పంచదార పొడి, రవ్వ, కొబ్బరి మిశ్రమాన్ని చేతితో బాగా కలపాలి. స్పూన్ కంటే చేతితో కలిపితే అన్ని పదార్థాలు చక్కగా కలుస్తాయి. బాగా రబ్ చేస్తూ, మిశ్రమం ఒకేలా అయ్యేలా చూసుకోవాలి.
గోరువెచ్చటి పాలను కొద్దికొద్దిగా పోసుకుంటూ మిశ్రమాన్ని కలుపుకోవాలి. పాలు మరీ వేడిగా లేదా చల్లగా ఉండకూడదు. మొత్తం పాలు ఒకేసారి పోయకుండా, మిశ్రమం ముద్దగా అయ్యే వరకు చూసుకుంటూ పోయాలి. మరీ పొడిపొడిగా కాకుండా, లడ్డూ చేయడానికి వీలుగా ముద్దగా కలుపుకోవాలి. సుమారు అర గ్లాసు పాలు పట్టవచ్చు. ఇలా కలిపిన మిశ్రమాన్ని ఒక పళ్ళెంలో పెట్టి, పైన కొద్దిగా అదిమి, 15 నిమిషాల పాటు నానబెట్టాలి. రవ్వ పాలను పీల్చుకొని మరింత జ్యూసీగా తయారవుతుంది. 15 నిమిషాల తర్వాత, నానిన రవ్వ మిశ్రమాన్ని ఒకసారి మళ్ళీ బాగా కలపాలి. ఇప్పుడు ఇందులో మనం ముందుగా వేయించి పెట్టుకున్న జీడిపప్పు, కిస్మిస్‌లు వేసి కలుపాలి. కొద్దికొద్దిగా మిశ్రమాన్ని తీసుకుని, చేతితో గట్టిగా నొక్కుతూ లడ్డూలుగా చుట్టుకోవాలి. పైన అలంకరణ కోసం ఒకటి రెండు జీడిపప్పులు, కిస్మిస్‌లు పెట్టి కొంచెం గట్టిగా నొక్కితే ఊడిపోకుండా ఉంటాయి. ఇలా మొత్తం మిశ్రమాన్ని లడ్డూలుగా చేసుకోవాలి.