ప్రపంచంలో ఎక్కడా ఉండవు.. భారత్లో మాత్రమే కనిపించే వింత కప్పల గురించి మీకు తెలుసా?
ప్రపంచంలోనే ప్రత్యేకమైన జీవవైవిధ్యానికి నిలయం భారతదేశం. ముఖ్యంగా కప్పల విషయానికి వస్తే.. మన దేశంలో ఎన్నో రకాల అరుదైన, రంగురంగుల జాతులు కనిపిస్తాయి. సాధారణంగా గోదుమ రంగులో కనిపించే కప్పలే మనకు గుర్తొచ్చినా.. ప్రకృతిలో ఆకుపచ్చ, నీలం, పసుపు, నారింజ వంటి అద్భుతమైన రంగులతో ఆకట్టుకునే కప్పలు కూడా ఉన్నాయి. కొన్ని కప్పలు చెట్ల ఆకులు, బెరడుల్లో కలిసిపోయి శత్రువుల నుంచి తప్పించుకుంటే.. మరికొన్ని తమ విలక్షణమైన రూపాలతో ఆశ్చర్యపరుస్తాయి. మరీ మన దేశంలోని ఐదు రకాల కప్పల గురించి మనం ఇక్కడ తెలుసుకుందాం.
పొద కప్ప: మన దేశంలోనే అత్యంత ఆకర్షణీయమైన ఉభయచరాలలో ఇది ఒకటి.. దీన్నే రెస్ప్లెండెంట్ ష్రబ్ఫ్రాగ్ అని కూడా పిలుస్తారు. ఎరుపు-నారింజ రంగు చర్మం, ప్రకాశవంతమైన ఎర్రటి కళ్ళతో కనిపించే ఈ కప్ప చూడ్డానికి ఎంతో ఆకర్షణీయంగా ఉంటుంది. ఇది ఎక్కువగా ఎత్తైన గడ్డి మైదానాలు, కేరళలోని అనముడి ప్రాంతాల్లో ఎక్కవగా కనిపిస్తుంది. మన దేశంలోనే ప్రత్యేకమైన, త్వరగా అంతరించిపోతున్న కప్ప జాతుల్లో ఇది ఒకటి.
భారతీయ కప్ప: ఇది సాధారణంగా ఆలివ్-ఆకుపచ్చ, గోధుమ రంగులో ఉంటుంది. అయితే ఆడ కప్పతో పోల్చుకుంటే మగ కప్పలో రంగు కాస్త వేరుగా ఉంటుంది. ఈ మగ కప్పలూ కొన్ని సార్లు పసుపు రంగులోకి మారి, వాటి గొంతుకు ఇరువైపులా నీలి రంగు స్వర కోశాలను తెరుస్తాయి. ఈ రంగురంగుల లక్షణాలు సంతానోత్పత్తి కాలంలో ఆడ కప్పలను ఆకర్షించేందుకు హెల్ప్ చేస్తాయి. ఇవి చెరువులు, చిత్తడి నేలలు, వ్యవసాయ క్షేత్రాలు మరియు ఇతర మంచినీటి ఆవాసాల చుట్టూ కనిపిస్తాయి.
మలబార్ గ్లైడింగ్ కప్ప: ఆకుపచ్చ శరీరం, బంగారు కళ్ళు, కాలి వేళ్ళ మధ్య నారింజ-ఎరుపు రంగుతో కనిపించే ఈ కప్పలను మలబార్ గ్లైడింగ్ ఫ్రాగ్ అంటారు. ఇవి మిగతా కప్పల్లా నీటిలో కాకుండా చెట్లపై ఎక్కువగా నివసిస్తాయి. దాని విస్తృతమైన జాలీ పాదాలు కొమ్మల మధ్య జారుతూ దూకడానికి తోల్పడతాయి.ఈ కప్పకలకు ఉన్న మరో ప్రత్యేకత ఏమిటంటే ఇవి నీటిపై ఉండే చెట్లపై గూళ్లను నిర్మించి గుడ్లు పొదిగిన తర్వాత దాని టాడ్పోల్స్ నీటిలోకి జారవిడుస్తాయి.
గెలాక్సీ కప్ప: మిగతా కప్పలతో పోలిస్తే చూడ్డానికి బిన్నంగా ఉండే ఈ కప్పను గెలాక్సీ కప్ప అని పిలుస్తారు. ఇది చూడ్డానికి దాని శరీరంపై ఏవో నక్షత్రాలు పడినట్టు కనిపిస్తుంది. నల్లని చర్మంపై చిన్న నీలి-తెలుపు మచ్చలు, దాని కింది భాగంలో ఆకర్షణీయమైన ఎరుపు-నారింజ రంగు ఉంటుంది. చాలా తక్కువగా కనిపించే ఈ కప్పలు ఎక్కువగా దక్షిణ పశ్చిమ కనుమలలోని తేమతో కూడిన ప్రాంతాల్లో కనిపిస్తాయి.
ఊదా కప్ప: మన దేశంలో కనిపించే అన్ని కప్పలకెళ్లా ఎక్కువ శాతం భూమిపై నివసించే కప్ప ఇదే.. ఇది చూడ్డానికి ఊదా రంగు శరీరం, చిన్న కళ్ళు, సూదిలాంటి ముక్కు, పొట్టి కాళ్ళతో ప్రత్యేకంగా కనిపిస్తుంది. ఇది ప్రత్యేకంగా దక్షిణ పశ్చిమ కనుమలలో మాత్రమే కనిపిస్తుంది.