పిస్తా vs పల్లీలు.. ఆరోగ్యానికి ఏది బెస్ట్..? నిపుణులు చెబుతున్న నిజాలు ఇవే..
ప్రస్తుత ఉరుకుల పరుగుల జీవితంలో ఆరోగ్యకరమైన ఆహారపు అలవాట్లలో డ్రై ఫ్రూట్స్, నట్స్ కీలక పాత్ర పోషిస్తున్నాయి. ముఖ్యంగా పిస్తాపప్పులు, పల్లీలు మనకు సులభంగా అందుబాటులో ఉండే సూపర్ ఫుడ్స్. అయితే ఈ రెండింటిలో ఏది ఎక్కువ పోషకాలను శరీరానికి అందిస్తుంది. బరువు తగ్గడానికి, గుండె ఆరోగ్యానికి ఏది మంచిది? అనే విషయాలపై పోషకాహార నిపుణులు పలు ఆసక్తికరమైన విషయాలను వెల్లడించారు.
పోషకాల పోలిక: పిస్తాపప్పులు, పల్లీలు రెండూ శరీరానికి అవసరమైన విటమిన్లు, ఖనిజాలను పుష్కలంగా అందిస్తాయి. అయినప్పటికీ వీటి మధ్య చిన్నపాటి తేడాలు ఉన్నాయి. పిస్తాలో విటమిన్ B6, విటమిన్ A, పొటాషియం, లుటీన్ వంటి యాంటీఆక్సిడెంట్లు ఎక్కువగా ఉంటాయి. మరోవైపు పల్లీలలో విటమిన్ B3, ఫోలేట్, మెగ్నీషియం, విటమిన్ E మోతాదు కాస్త ఎక్కువగా లభిస్తుంది.
ప్రోటీన్ - ఫైబర్ సమృద్ధి: మనం తినే ఆహారంలో ప్రోటీన్, ఫైబర్ చాలా ముఖ్యం. ఈ విషయంలో పల్లీలు ప్రోటీన్కు కేరాఫ్ అడ్రస్గా నిలుస్తాయి. పల్లీలలో పిస్తా కంటే కొంచెం ఎక్కువ ప్రోటీన్ ఉంటుంది. ఇది కండరాల బలానికి తోడ్పడుతుంది. కానీ ఫైబర్ విషయానికి వస్తే పిస్తాపప్పులు పైచేయి సాధిస్తాయి. పిస్తాలో ఉండే ఫైబర్ జీర్ణక్రియను మెరుగుపరచడంలో అద్భుతంగా సహాయపడుతుంది.
గుండె ఆరోగ్యానికి - బరువు నియంత్రణ: గుండె ఆరోగ్యానికి అవసరమైన మంచి కొవ్వులు ఈ రెండింటిలోనూ సమానంగా ఉంటాయి. ఇవి శరీరంలోని చెడు కొలెస్ట్రాల్ను తగ్గించడంలో సహాయపడతాయి. అలాగే బరువు తగ్గాలనుకునే వారికి కూడా ఇవి మంచి ఎంపిక. పిస్తాపప్పులను ఒలిచి తినడానికి కొంచెం సమయం పడుతుంది కాబట్టి మనం తక్కువ పరిమాణంలో తింటాము. ఇది అతిగా తినడాన్ని నియంత్రిస్తుంది.
షుగర్- క్యాలరీల వివరాలు: క్యాలరీల పరంగా చూస్తే, ఈ రెండింటి మధ్య పెద్దగా తేడా లేదు. ఒక ఔన్స్ పిస్తాపప్పులలో 159 క్యాలరీలు ఉంటే అంతే పరిమాణంలో ఉన్న పల్లీలలో 161 క్యాలరీలు ఉంటాయి. పిస్తాలో కొద్దిగా నెట్ కార్బోహైడ్రేట్లు, సహజ చక్కెరలు ఎక్కువ ఉన్నప్పటికీ, వీటి గ్లైసెమిక్ ఇండెక్స్ చాలా తక్కువగా ఉండటం వల్ల ఇవి రక్తంలో చక్కెర స్థాయిలను అకస్మాత్తుగా పెంచవు.
ఏది ఎంచుకోవాలి?: చివరగా పిస్తా, పల్లీలు రెండూ కూడా తమదైన శైలిలో అద్భుతమైన ఆరోగ్య ప్రయోజనాలను కలిగి ఉన్నాయి. ధర పరంగా చూస్తే పల్లీలు అందరికీ అందుబాటులో ఉండే చౌకైన ప్రత్యామ్నాయం, అయితే పిస్తాపప్పులు యాంటీఆక్సిడెంట్ల పరంగా మెరుగైనవి. మీ బడ్జెట్, రుచిని బట్టి రోజువారీ డైట్లో వీటిని మితంగా చేర్చుకోవడం వల్ల రోగనిరోధక శక్తి పెరిగి పూర్తి ఆరోగ్యం చేకూరుతుందని నిపుణులు సూచిస్తున్నారు.