మీరు రోజూ నిమ్మకాయ నీళ్లు తాగుతారా.. కిడ్నీలకు ఏం జరుగుతుందో తెలుసుకోండి..
పరగడుపున గోరువెచ్చని నీళ్లలో నిమ్మరసం పిండుకుని తాగితే శరీరం డిటాక్స్ అవుతుందని, కిడ్నీల్లోని మలినాలు కొట్టుకుపోతాయని చాలామంది నమ్ముతుంటారు. బరువు తగ్గాలనుకునే వారి నుంచి ఆరోగ్యంపై శ్రద్ధ పెట్టే ప్రతి ఒక్కరి దినచర్యలో ఇది తప్పనిసరి అలవాటుగా మారిపోయింది. అయితే రోజూ నిమ్మరసం తాగడం నిజంగానే మూత్రపిండాలకు అమృతం లాంటిదా? కిడ్నీ వ్యాధులతో బాధపడేవారు కూడా దీనిని నిరభ్యంతరంగా తాగవచ్చా? దీనిపై ఆరోగ్య నిపుణులు, డైటీషియన్లు చెబుతున్న అసలు నిజాలు, తీవ్రమైన హెచ్చరికలు ఏంటో ఇప్పుడు తెలుసుకుందాం.
నిమ్మకాయలలో లభించే సిట్రేట్ మూత్రపిండాల్లో రాళ్లు, ముఖ్యంగా కాల్షియం ఆక్సలేట్ రాళ్లు ఏర్పడే ప్రమాదాన్ని తగ్గించడంలో ఎంతగానో తోడ్పడుతుందని నవీ ముంబై ఖార్ఘర్‌లోని మెడికవర్ హాస్పిటల్ డైటెటిక్స్ విభాగాధిపతి డాక్టర్ రాజేశ్వరి పాండా స్పష్టం చేశారు. సాధారణంగా ఆరోగ్యంగా ఉండే వ్యక్తులు నిమ్మరసం నీటిని మితంగా తీసుకోవడం వల్ల మేలు జరుగుతుందని, అయితే మూత్రపిండాలు సక్రమంగా పనిచేయడానికి కేవలం నిమ్మరసమే కాకుండా రోజంతా తగినంత సాదా నీరు తాగుతూ శరీరాన్ని హైడ్రేటెడ్‌గా ఉంచుకోవడం కూడా అంతే కీలకమని ఆమె వివరించారు.
ఆరోగ్యవంతులకు మేలు చేసినంత మాత్రాన మూత్రపిండాల వ్యాధులతో బాధపడేవారికి కూడా నిమ్మరసం మంచిదని భావించలేమని నిపుణులు హెచ్చరిస్తున్నారు. క్రానిక్ కిడ్నీ డిసీజ్ ముదిరిన దశలో ఉన్న రోగులకు వైద్యులు ద్రవపదార్థాల పరిమాణాన్ని పరిమితం చేస్తుంటారు. అటువంటి వారు రోజువారీ సూచించిన నీటి కొలతల్లోనే నిమ్మరసాన్ని సర్దుబాటు చేసుకోవాల్సి ఉంటుంది. పైగా కిడ్నీల పనితీరు క్షీణించినప్పుడు శరీరంలో పొటాషియం స్థాయిలు పెరుగుతాయి; నిమ్మకాయలో కూడా కొంతమొత్తంలో పొటాషియం ఉండటం వల్ల, డయాలసిస్ చేయించుకునే వారైనా లేదా కిడ్నీ సమస్యలున్నవారైనా వైద్యుడి సలహా లేకుండా దీనిని తాగకూడదు.
నిమ్మరసం అమృతంలా పనిచేస్తుందని భావించి మోతాదుకు మించి అతిగా తాగడం కూడా అనేక ఆరోగ్య సమస్యలకు దారితీస్తుంది. నిమ్మకాయలో ఉండే అధిక సిట్రిక్ యాసిడ్ వల్ల కడుపులో ఎసిడిటీ, ఛాతీలో మంట వచ్చే అవకాశాలు ఉన్నాయి. దీనిలోని గాఢమైన ఆమ్ల స్వభావం జీర్ణాశయం లోపలి సున్నితమైన పొరను ఇరిటేట్ చేయడమే కాకుండా పళ్లపై ఉండే రక్షణ కవచమైన ఎనామెల్‌ను క్రమంగా దెబ్బతీసి దంతాల సున్నితత్వాన్ని పెంచుతుందని వైద్యులు హెచ్చరిస్తున్నారు.
అనేకమంది భావిస్తున్నట్లుగా నిమ్మరసం నీరు మూత్రపిండాల వ్యాధులను సమూలంగా నయం చేసే అద్భుత ఔషధమేమీ కాదు. సమతుల్య ఆహారం, శరీరానికి అవసరమైన హైడ్రేషన్‌లో భాగంగా మాత్రమే దీనిని పరిగణించాలని నిపుణులు స్పష్టం చేస్తున్నారు. ప్రతి ఒక్కరూ రోజూ కచ్చితంగా నిమ్మరసం తాగాలన్న నిబంధన ఏమీ లేదని, ముఖ్యంగా కిడ్నీ సమస్యలు ఉన్నవారు తమ శరీరంలోని ఎలక్ట్రోలైట్ స్థాయిలు, కిడ్నీల సామర్థ్యాన్ని పరీక్షించుకున్న తర్వాతే డైట్ నిర్ణయాలు తీసుకోవాలని సూచిస్తున్నారు.
సోషల్ మీడియాలో వైరల్ అయ్యే ఆరోగ్య చిట్కాలు, డైట్ ట్రెండ్స్‌ను గుడ్డిగా నమ్మి అనుసరించడం ఎప్పటికైనా ప్రమాదకరమని వైద్యులు స్పష్టం చేస్తున్నారు. ఒకరికి మేలు చేసిన ఆహారపు అలవాటు మరొకరి శరీర తత్వానికి హాని కలిగించవచ్చు. కాబట్టి కిడ్నీ సంబంధిత సమస్యలు ఉన్నవారు సొంత నిర్ణయాలు తీసుకోకుండా, వైద్యుల సూచనల మేరకు శరీరంలో నీటి స్థాయిలను కాపాడుకుంటూ సురక్షితమైన జీవనశైలిని ఎంచుకోవడమే మంచిది.