Karamani Kurma: చపాతీ, రొట్టెల్లోకి అదిరిపోయే అలసందల కూర.. ఇలా చేస్తే పిల్లలు కూడా ఇష్టంగా లాగించేస్తారు
మనం రోజూ ఇంట్లో చేసుకునే సాధారణ కూరల కంటే భిన్నంగా, హోటళ్లలో లేదా రోడ్ సైడ్ భవన్స్లో దొరికే కుర్మా రుచి ఎంతో అద్భుతంగా ఉంటుంది. ముఖ్యంగా ఆంధ్ర - కర్ణాటక సరిహద్దు ప్రాంతాల్లోని భవన్స్లో లభించే వంటకాలకు ఒక ప్రత్యేకమైన క్రేజ్ ఉంది. అక్కడ చపాతీలు, రాగి రొట్టెలు, మరియు జొన్న రొట్టెల్లోకి ఇచ్చే 'కారమణి కుర్మా' (Karamani Kurma) రుచి చూస్తే ఎవరైనా సరే ఫిదా అవ్వాల్సిందే.
ఈ కుర్మాకు అసలైన హోటల్ టెక్స్చర్ మరియు రుచిని ఇచ్చేది మనం తయారు చేసుకునే ప్రత్యేకమైన పేస్ట్. దీనికోసం ఒక చిన్న బౌల్లో ఒక ఇంచు అల్లం ముక్క, పావు కప్పు పచ్చి కొబ్బరి ముక్కలు, 15 నుండి 20 జీడిపప్పులు, మరియు అర టేబుల్ స్పూన్ గసగసాలు తీసుకోవాలి. ఇందులో తగినన్ని నీళ్లు పోసి కనీసం 30 నిమిషాల పాటు నానబెట్టాలి. ఇలా నానబెట్టడం వల్ల గసగసాలు, జీడిపప్పు మెత్తబడి గ్రైండ్ చేసినప్పుడు వెల్వెట్ లాంటి మృదువైన పేస్ట్లా తయారవుతాయి.
కుర్మా తయారీ కోసం అరకప్పు అలసందలను (Black Eyed Beans) రాత్రంతా నీటిలో నానబెట్టాలి. నానిన తర్వాత ఇవి సుమారు కప్పుంబావు వరకు అవుతాయి. ఇప్పుడు ఒక ప్రెజర్ కుక్కర్లో నానబెట్టిన అలసందలు, తొక్క తీసి సగంగా కోసిన ఒక బంగాళదుంప (ఆలూ), మరియు రెండు టమోటా ముక్కలను వేయాలి. ఇందులో మూడు కప్పుల నీళ్లు పోసి, కుక్కర్ మూత పెట్టి మీడియం ఫ్లేమ్పై 4 విజిల్స్ వచ్చే వరకు ఉడికించాలి.
విజిల్స్ వచ్చిన తర్వాత ప్రెజర్ పూర్తిగా పోయాక... ఉడికిన బంగాళదుంప, టమోటా ముక్కలను విడిగా తీసి, మనం ముందుగా నానబెట్టుకున్న జీడిపప్పు-కొబ్బరి మిశ్రమంతో కలిపి మిక్సీలో మెత్తటి పేస్ట్లా గ్రైండ్ చేసుకోవాలి. అలసందలు చేత్తో నలిపితే మెత్తగా అయ్యేలా ఉడకడం ఎంతో ముఖ్యం, అప్పుడే కూర టెక్స్చర్ బాగుంటుంది.
ఒక వెడల్పాటి అడుగు మందంగా ఉన్న కడాయిలో 3 టేబుల్ స్పూన్ల నూనె వేడి చేయాలి. నూనె కాగాక అర టీస్పూన్ జీలకర్ర, అర టీస్పూన్ సోంపు వేసి చిటపటలాడించాలి. అందులోనే ఒక టేబుల్ స్పూన్ కస్తూరి మేతిని చేత్తో నలిపి వేయాలి, ఇది కూరకు హోటల్ సువాసనను ఇస్తుంది. ఆ తర్వాత అరకప్పు సన్నగా తరిగిన ఉల్లిపాయ ముక్కలు, అర టేబుల్ స్పూన్ ఉప్పు వేసి ఉల్లిపాయలను లేత గులాబీ రంగు వచ్చే వరకు వేయించాలి.
ఉల్లిపాయలు వేగిన తర్వాత ఒక టేబుల్ స్పూన్ అల్లం వెల్లుల్లి పేస్ట్ వేసి పచ్చి వాసన పోయేలా వేపాలి. అనంతరం అర టీస్పూన్ పసుపు, ఒక టేబుల్ స్పూన్ ధనియాల పొడి, అర టీస్పూన్ వేయించిన జీలకర్ర పొడి, మరియు ఒక టేబుల్ స్పూన్ కారం వేసి తక్కువ మంటపై వేయించాలి. మసాలాలు వేగాక, మనం మిక్సీ పట్టుకున్న టమోటా-ఆలూ-జీడిపప్పు పేస్ట్ను ఇందులో వేసి బాగా కలపాలి. అడుగు పట్టకుండా ఉండటానికి అరకప్పు వేడి నీటిని పోసి, మసాలాల నుండి మంచి సువాసన వచ్చే వరకు గీరుకుంటూ వేపాలి.
మసాలా గ్రేవీ బాగా వేగిన తర్వాత, ఉడికించి పెట్టుకున్న అలసందలను ఆ నీటితో సహా కడాయిలో పోసేయాలి. అంతా బాగా కలిపి, మీడియం ఫ్లేమ్పై 15 నుండి 20 నిమిషాల పాటు బాగా ఉడికించాలి. కూర ఉడుకుతున్నప్పుడే పైనుంచి కొద్దిగా తాజా కొత్తిమీర తరుగు, ఒక టీస్పూన్ గరం మసాలా వేసి కలపాలి. గ్రేవీ మరీ చిక్కగా కాకుండా, కాస్త జారుగా ఉన్నప్పుడే స్టవ్ ఆపేయాలి, ఎందుకంటే చల్లారిన తర్వాత జీడిపప్పు మరియు ఆలూ వల్ల కూర మరింత గట్టిపడుతుంది. అంతే... ఎంతో రుచికరమైన భవన్స్ స్పెషల్ అలసందల కుర్మా సిద్ధం!