హెల్తీ అనుకున్న బెల్లం.. అందరికీ మంచిది కాదు.. ఈ 5 రకాల వ్యక్తులు తింటే విషంలా మారొచ్చు!
మన భారతీయ వంటకాల్లో బెల్లానికి ప్రత్యేక స్థానం ఉంది. పంచదారతో పోలిస్తే బెల్లంలో ఐరన్, పొటాషియం, మెగ్నీషియం వంటి పోషకాలు పుష్కలంగా ఉంటాయని, ఇది రోగనిరోధక శక్తిని పెంచుతుందని మనకు తెలుసు. అందుకే చాలామంది కాఫీ, టీల నుంచి పరమాన్నం వరకు అన్నింటిలోనూ చక్కెరను పక్కనబెట్టి బెల్లాన్ని వాడుతుంటారు. అయితే, నాణేనికి రెండు ముఖాలు ఉన్నట్లే.. బెల్లం వల్ల కూడా కొన్ని నష్టాలు ఉన్నాయి. ముఖ్యంగా కొన్ని రకాల ఆరోగ్య సమస్యలతో బాధపడేవారు బెల్లాన్ని అస్సలు ముట్టకూడదని ఆరోగ్య నిపుణులు హెచ్చరిస్తున్నారు. ఆ వ్యక్తులు ఎవరో ఇప్పుడు చూద్దాం.
మధుమేహం (డయాబెటిస్) ఉన్నవారు: చాలామందికి చక్కెర తింటేనే షుగర్ పెరుగుతుందని, బెల్లం తింటే పెరగదని ఒక పెద్ద అపోహ ఉంది. కానీ, వాస్తవానికి బెల్లంలో కూడా సుక్రోజ్ పరిమాణం చాలా ఎక్కువగానే ఉంటుంది. ఇది తిన్న వెంటనే రక్తంలో గ్లూకోజ్ స్థాయిలను వేగంగా పెంచుతుంది. కాబట్టి, డయాబెటిస్ రోగులు బెల్లాన్ని చక్కెరతో సమానంగా దూరం పెట్టాలి.
బరువు తగ్గాలనుకునే వారు: బెల్లంలో పోషకాలు ఉన్నప్పటికీ, ఇందులో క్యాలరీలు చాలా ఎక్కువ. 100 గ్రాముల బెల్లంలో దాదాపు 383 క్యాలరీలు ఉంటాయి. బరువు తగ్గడానికి డైట్ ఫాలో అయ్యేవారు బెల్లాన్ని అమితంగా తీసుకుంటే, వారి బరువు తగ్గడానికి బదులు మరింత పెరిగే అవకాశం ఉంది.
జీర్ణక్రియ సమస్యలు, నులిపురుగులు ఉన్నవారు: తాజా బెల్లం కాస్త వేడి గుణాన్ని కలిగి ఉంటుంది. జీర్ణక్రియ సరిగ్గా లేనివారు లేదా కడుపులో నులిపురుగుల (Worms) సమస్యతో బాధపడే చిన్నపిల్లలకు బెల్లం ఎక్కువగా ఇస్తే సమస్య మరింత తీవ్రమవుతుంది. ఇది కడుపులో ఇన్ఫెక్షన్లకు దారితీయవచ్చు.
కిడ్నీ సమస్యలు ఉన్నవారు: బెల్లంలో పొటాషియం, సోడియం నిల్వలు ఎక్కువగా ఉంటాయి. మూత్రపిండాల (కిడ్నీ) వ్యాధులతో బాధపడేవారికి శరీరంలో పొటాషియం స్థాయిలు పెరిగితే అది గుండెపై ప్రభావం చూపుతుంది. కాబట్టి కిడ్నీ రోగులు వైద్యుల సలహా మేరకే దీనిని వాడాలి.
శరీరంలో వేడి (హీట్) ఎక్కువగా ఉన్నవారు: బెల్లం సహజంగానే ఉష్ణ గుణాన్ని కలిగి ఉంటుంది. ఎండాకాలంలో లేదా శరీర తత్వం వేడిగా ఉన్నవారు బెల్లాన్ని ఎక్కువగా తింటే శరీరంలో వేడి పెరిగి ముక్కు నుంచి రక్తం కారడం (Epistaxis), చర్మంపై గుల్లలు రావడం వంటి ఇబ్బందులు తలెత్తుతాయి.