Korean Skin Care: కొరియన్ గ్లాస్ స్కిన్ వెనుక ఉన్న అసలు నిజాలివే.. మన స్కిన్ టోన్కు అది సాధ్యమేనా?
Korean Glass Skin: ఈ మధ్యకాలంలో ఎక్కడ చూసినా 'కొరియన్ గ్లాస్ స్కిన్' గురించిన ముచ్చట్లే వినిపిస్తున్నాయి. బియ్యం కడిగిన నీళ్లు, గంజి రాసుకుంటే కొరియన్లలా మెరిసిపోవచ్చని ఎన్నో ప్రయోగాలు చేస్తున్నారు. అయితే, అసలు ఇండియన్ స్కిన్ టోన్కు కొరియన్ గ్లాస్ స్కిన్ సాధ్యమేనా? దీని వెనుక ఉన్న అసలు నిజాలు ఏంటో తెలుసుకోండి.
ఈ రోజుల్లో సోషల్ మీడియా ఓపెన్ చేస్తే చాలు.. 'కొరియన్ గ్లాస్ స్కిన్' అనే పదం బాగా ట్రెండ్ అవుతోంది. ముఖంపై ఎలాంటి మచ్చలు లేకుండా, అద్దంలా తళతళా మెరిసిపోయే చర్మం కోసం అమ్మాయిలు ఎన్నో ప్రయోగాలు చేస్తున్నారు. కొరియన్ల లాంటి తెల్లటి, షైనింగ్ స్కిన్ సొంతం చేసుకోవడానికి బియ్యం కడిగిన నీళ్లు (రైస్ వాటర్), గంజి వంటి రకరకాల హోమ్ రెమిడీస్ మరియు ఫేస్ ప్యాక్లను వాడుతున్నారు. అయితే, ఒకరిని చూసి బ్లైండ్గా ఫాలో అయిపోయే ముందు మన చర్మ తత్వానికి, వారి చర్మ తత్వానికి ఉన్న తేడాలను గమనించడం చాలా ముఖ్యం.
నిజానికి, కొరియన్ల లాంటి చర్మం కావాలనుకుంటే మనం కొరియాలోనే పుట్టాలి అనేది పచ్చి నిజం. ఎందుకంటే, ఏ ప్రాంతంలో పుట్టిన వారికి ఆ వాతావరణం, అక్కడి భౌగోళిక పరిస్థితులు మరియు వారి జన్యువులు (జెనెటిక్స్) బట్టి చర్మం రంగు, స్వభావం డిసైడ్ అవుతాయి. కొరియన్లు నివసించే చల్లటి వాతావరణం, అధిక ఎత్తులో ఉండే ప్రాంతాలు వారి చర్మం సహజంగానే తెల్లగా, ఫ్లాలెస్గా ఉండటానికి దోహదం చేస్తాయి.
మన భారతదేశ వాతావరణం వేరు, మన స్కిన్ టోన్ వేరు. ఎంత తెల్లగా ఉన్న భారతీయులకైనా మనకుండే 'ఇండియన్ లుక్' స్పష్టంగా తెలుస్తుంది. చాలా మంది సోషల్ మీడియాలో చూసే పర్మనెంట్ మేకప్ లుక్స్ లేదా కాస్మెటిక్ ట్రీట్మెంట్స్ చూసి మోసపోతుంటారు. కేవలం తెల్లగా ఉండటం, సన్నగా ఉండటమే అందం అనే అపోహ నుంచి మొదట మనం బయటపడాలి.
నల్లగా లేదా గోధుమ రంగులో ఉన్నా కూడా చర్మంపై మంచి గ్లో, షైన్ మరియు హెల్తీ లుక్ ఉంటే అదే నిజమైన అందం. కొరియన్ల చర్మ రహస్యాలలో 'రైస్ వాటర్' ఒకటనేది నిజమే అయినప్పటికీ, కేవలం దానివల్లే గ్లాస్ స్కిన్ వచ్చేస్తుందనుకోవడం పొరపాటు. మన చర్మాన్ని శుభ్రంగా, ఆరోగ్యంగా ఉంచుకోవడానికి కొన్ని సహజమైన పద్ధతులు పాటించాలి.
ముఖాన్ని రోజుకు కనీసం రెండు సార్లు మంచి నీళ్లతో శుభ్రంగా కడుక్కోవడం వల్ల ఆయిలీ స్కిన్ సమస్యలు, నల్లటి మచ్చలు తగ్గుతాయి. అన్నింటికంటే ముఖ్యంగా శరీరానికి తగినంత నీరు (వాటర్ ఇంటేక్) అందించడం, తాజా పండ్లు ఎక్కువగా తినడం మరియు రాత్రి పూట ప్రశాంతమైన నిద్రపోవడం చాలా అవసరం. ఇవన్నీ మన జీవనశైలిలో భాగమైనప్పుడు చర్మం లోపలి నుండి ఆరోగ్యంగా మారి, సహజమైన గ్లో వస్తుంది. పక్కన వారిని చూసి మనకు పడని ప్రయోగాలు చేయడం కంటే, మన చర్మాన్ని మనం అంగీకరిస్తూ దాన్ని క్లియర్గా, హెల్తీగా ఉంచుకోవడమే శ్రేయస్కరం.