వాషింగ్ మెషీన్‌లో బట్టలు తెల్లగా అవ్వడం లేదా.. ఈ సింపుల్ ట్రిక్స్‌తో తళతళ మెరిసిపోతాయ్..
వాషింగ్ మెషీన్‌లో బట్టలు వేసి ఉతికినా.. మురికి వదలట్లేదా? తీరా ఆరబెడదామంటే ఏదో విచిత్రమైన బూజు వాసన వస్తుందా? అయితే చాలామందిలాగే మీరూ మెషీన్‌లోనే ఏదో లోపం ఉందని అనుకుంటున్నారా..? కానే కాదు.. బట్టలు ఉతికేటప్పుడు నిత్యం మనం తెలియకుండా చేసే ఆ చిన్న చిన్న పొరపాట్లే దీనికి అసలు కారణం. ఆ మిస్టేక్స్ ఏంటో ఈ స్టోరీలో తెలుసుకుందాం..
చాలామంది సమయం ఆదా అవుతుందనే ఉద్దేశంతో లేదా నీటిని ఆదా చేయాలనే ఆలోచనతో మెషీన్ సామర్థ్యానికి మించి బట్టలను లోపలికి కుక్కేస్తుంటారు ఇలా ఒకేసారి ఎక్కువ బట్టలు వేసినప్పుడు మెషీన్ డ్రమ్ లోపల బట్టలు స్వేచ్ఛగా తిరగడానికి ఏమాత్రం ఖాళీ ఉండదు. ఫలితంగా నీరు, డిటర్జెంట్ అన్ని బట్టల మూలలకూ సమానంగా చేరవు. దీనివల్ల బట్టలు సరిగ్గా ఉతకబడక మురికి అలాగే ఉండిపోతుంది. డ్రమ్‌లో కనీసం మూడో వంతు భాగం ఖాళీగా ఉండేలా బట్టల బరువును చూసుకుని మాత్రమే లోడ్ చేయాలి.
మరొక సాధారణ అపోహ ఏమిటంటే.. ఎక్కువ డిటర్జెంట్ లేదా లిక్విడ్ వాడితే బట్టలు మరింత తెల్లగా, పరిశుభ్రంగా వస్తాయని భావించడం. కానీ వాస్తవానికి ఎక్కువ మోతాదులో సర్ఫ్ వాడటం వల్ల డ్రమ్‌లో నురుగు విపరీతంగా పెరిగిపోయి, చివర్లో రిన్స్ సమయంలో సబ్బు అవశేషాలు బట్టల నూలు పోగుల్లోనే చిక్కుకుపోతాయి. ఇది బట్టలు ఎండిన తర్వాత తెల్లటి మచ్చలుగా కనిపించడంతో పాటు చర్మ సంబంధిత అలర్జీలకు దారితీస్తుంది. అలాగని మరీ తక్కువగా వాడితే మురికి వదలదు. అందుకే బట్టల సంఖ్య, మురికి తీవ్రత, నీటి కాఠిన్యం ఆధారంగా సరైన కొలతతో డిటర్జెంట్‌ను వాడటం ఎంతో కీలకం.
ఇంట్లో ఉండే దుప్పట్లు, జీన్స్ వంటి బరువైన దుస్తులను, అలాగే సున్నితమైన పట్టు లేదా సింథటిక్ వస్త్రాలను అన్నింటినీ కలిపి ఒకే సైకిల్‌లో ఉతకడం చాలామంది చేస్తుంటారు. బట్టల రకాలను వేరు చేయకుండా ఒకే వాష్ మోడ్‌ను ఎంచుకుంటే శుభ్రత లోపించడంతో పాటు వస్త్రాల నాణ్యత దెబ్బతింటుంది. కాటన్, డెలికేట్, హెవీ లోడ్ వంటి ఫీచర్లను బట్టల ఫ్యాబ్రిక్‌ను బట్టి ఎంచుకోవాలి. అదనంగా, ఉతికిన వెంటనే బట్టలను బయటకు తీయకుండా గంటల తరబడి మెషీన్ డ్రమ్‌లోనే తడిగా వదిలేయడం వల్ల తేమ కారణంగా బ్యాక్టీరియా, బూజు చేరి బట్టల నుంచి అసహ్యకరమైన బూజు వాసన వస్తుంది.
బట్టలను శుభ్రం చేసే వాషింగ్ మెషీన్‌ను కూడా క్రమం తప్పకుండా శుభ్రం చేయాలనే విషయాన్ని చాలామంది విస్మరిస్తుంటారు. నెలల తరబడి వాడటం వల్ల డ్రమ్ అంచులలో, రబ్బర్ గాస్కెట్లలో డిటర్జెంట్ అవశేషాలు, నీటిలోని ఉప్పు, బట్టల నుంచి వెలువడే దారాలు పేరుకుపోతాయి. ఇవి కుళ్లిపోయి డ్రమ్‌లో దుర్వాసనకు కారణమవుతాయి. అప్పుడే ఉతికిన బట్టలకు కూడా ఈ దుర్వాసన అంటుకుంటుంది. అందుకే నెలకు ఒకసారైనా మెషీన్‌లోని టబ్ క్లీన్ ఆప్షన్‌ను ఆన్ చేసి, డీస్కేలింగ్ పౌడర్ లేదా కాస్త వెనిగర్ ఉపయోగించి వేడి నీటితో ఖాళీ సైకిల్ రన్ చేయడం ద్వారా లోపలి మురికిని పూర్తిగా తొలగించవచ్చు.
మెషీన్ డ్రైనేజీ, ఫిల్టర్ల నిర్వహణను ఎప్పటికప్పుడు గమనించుకోవాలి. వాషింగ్ మెషీన్ అడుగున ఉండే లింట్ ఫిల్టర్ లేదా డ్రైన్ ఫిల్టర్‌లో నాణేలు, గుండీలు, ధూళి, దారాలు చిక్కుకుపోవడం వల్ల నీరు సజావుగా బయటకు పోక మురికి నీరంతా డ్రమ్‌లోనే రీసైకిల్ అవుతుంది. దీనివల్ల వాషింగ్ ప్రక్రియ తీవ్రంగా దెబ్బతింటుంది. కాబట్టి కనీసం 15 రోజులకు ఒకసారైనా ఫిల్టర్‌ను బయటకు తీసి మంచి నీటితో కడగాలి. ఈ చిన్నపాటి జాగ్రత్తలు పాటిస్తే బట్టలు ఎల్లప్పుడూ సరికొత్తగా, సువాసనభరితంగా ఉండటంతో పాటు వాషింగ్ మెషీన్ మరమ్మతులు లేకుండా దీర్ఘకాలం మన్నుతుంది.