Betel Leaf: కుండీలో తమలపాకు మొక్క పెంచాలి అనుకుంటున్నారా.. ఈ సీక్రెట్ టిప్స్ తెలుసుకోండి
హిందూ సంప్రదాయంలో పూజలకు, శుభకార్యాలకు అత్యంత పవిత్రమైనది తమలపాకు. అంతేకాకుండా భోజనం తర్వాత తాంబూలం వేసుకోవడం వల్ల జీర్ణక్రియ మెరుగుపడటంతో పాటు ఎన్నో ఔషధ ప్రయోజనాలు లభిస్తాయి. అందుకే చాలామంది తమలపాకు మొక్కను ఇంటి బాల్కనీలో లేదా పెరట్లో కుండీలలో పెంచాలని ఆశపడుతుంటారు.
అయితే నర్సరీ నుండి తెచ్చిన కొన్ని రోజులకే ఆకులు పసుపుగా మారిపోవడం, వేర్లు కుళ్ళిపోయి మొక్క ఎండిపోవడం చాలామందికి ఎదురయ్యే ప్రధాన సమస్య. తమలపాకు తీగ ఆరోగ్యంగా, ఆకుపచ్చగా, పెద్ద సైజు ఆకులతో గుబురుగా పెరగడానికి అనుసరించాల్సిన ముఖ్యమైన విధానాలను ఇప్పుడు వివరంగా చూద్దాం.
నర్సరీల నుంచి తెచ్చిన మొక్కలు వేరే ప్రాంత వాతావరణం నుంచి వచ్చి ఉంటాయి. వాటిని ఇంటికి తెచ్చిన వెంటనే కుండీ మార్చడం చేయకూడదు. తెచ్చిన తర్వాత కనీసం 4 నుండి 5 రోజుల పాటు ఇంట్లోని ఇతర మొక్కల మధ్య సెమీ-షేడ్లో ఉంచి, ఇంటి వాతావరణానికి అలవాటు పడేలా చేయాలి. ఆ తర్వాతే కొత్త కుండీలోకి మార్చుకోవాలి.
తమలపాకు మొక్కకు ఎండ కావాలి కానీ తీవ్రమైన మండుటెండ నేరుగా తగలకూడదు. డైరెక్ట్ సన్లైట్ పడితే ఆకులు మాడిపోతాయి. ఉదయం పూట వచ్చే లేత ఎండ లేదా చెట్ల నీడ, గ్రీన్ నెట్ కింద ఉండే పరోక్ష కాంతి వీటికి అత్యంత అనుకూలం. మనీ ప్లాంట్ లాగానే దీనికి కూడా తేమతో కూడిన వాతావరణం ఇష్టం.
పాటింగ్ మిక్స్, డ్రైనేజ్: తమలపాకు వేర్లు సున్నితంగా ఉంటాయి కాబట్టి కుండీలో నీరు నిలబడకూడదు. 40% గార్డెన్ మట్టి, 30% వర్మీకంపోస్ట్ లేదా పశువుల ఎరువు, తేమను నిలపడానికి 20% కోకోపీట్ , 10% ఇసుక మరియు ఫంగస్ రాకుండా ఉండటానికి కాస్త వేపపిండి . ఈ మిశ్రమం వేర్లకు గాలి ఆడేలా చేసి మొక్క వేగంగా విస్తరించడానికి సహాయపడుతుంది.
కుండీలోని పైమట్టి ఒక అంగుళం వరకు ఆరినప్పుడు మాత్రమే నీరు పోయాలి. అతిగా నీరు పోస్తే వేరుకుళ్లు తెగులు వస్తుంది. ఆకులపై స్ప్రే బాటిల్తో నీటిని చల్లడం వల్ల ఆకులు నిగనిగలాడుతూ తాజాగా ఉంటాయి. తమలపాకు ఒక తీగ జాతి మొక్క. కాబట్టి కుండీ మధ్యలో మాస్ స్టిక్ లేదా ఏదైనా చెక్క ఊతం ఏర్పాటు చేయాలి. తీగ కణుపుల నుంచి వచ్చే వేర్లు మాస్ స్టిక్లోని తేమను పీల్చుకుని బలాన్ని పొందుతాయి. దీనివల్ల ఆకులు అరచేయంత పెద్ద పరిమాణంలో పెరుగుతాయి.