Korralu Rice: షుగర్ కంట్రోల్‌కు, బరువు తగ్గడానికి ఆరోగ్యకరమైన కొర్రల అన్నం.. పొడిపొడిగా రావాలంటే పక్కా కొలత ఇదే
మధుమేహం (డయాబెటిస్), ఊబకాయం, రక్తపోటు వంటి జీవనశైలి సమస్యలను అరికట్టడంలో సిరిధాన్యాలు అద్భుతంగా పనిచేస్తాయి. డాక్టర్ ఖాదర్ వలీ సూచించిన ఐదు రకాల సిరిధాన్యాల్లో కొర్రలు అత్యంత ముఖ్యమైనవి. కొర్రలలో పీచు పదార్థం, యాంటీఆక్సిడెంట్లు పుష్కలంగా ఉండటం వల్ల రక్తంలో గ్లూకోజ్ స్థాయిలను అదుపులో ఉంచుతుంది. అయితే చాలామంది కొర్రలతో అన్నం వండినప్పుడు అది పేస్ట్‌లా ముద్దగా అయిపోతుందని లేదా బిరుసుగా ఉంటుందని సరిగ్గా తినలేకపోతుంటారు. కానీ సరైన సమయంలో నానబెట్టి, పక్కా కొలతతో నీళ్లు పోసి సాధారణ గిన్నెలో వండితే.. అచ్చం తెల్ల బియ్యం అన్నంలాగే ఎంతో పొడిపొడిగా, మృదువుగా కుదురుతుంది.
కావలసిన పదార్థాలు: 1 చిన్న కప్పు కొర్రలు, 2½ కప్పుల నీళ్లు. తయారీ విధానం ఒక స్టీల్ గిన్నెలో ఒక టీ గ్లాసు కొర్రలను తీసుకోవాలి. కొర్రలు లేత పసుపు రంగులో, చిన్న గింజలుగా నునుపుగా ఉంటాయి. ఇందులో నీళ్లు పోసి చేత్తో రుద్దుతూ రెండు సార్లు శుభ్రంగా కడిగి ఆ నీటిని పూర్తిగా ఒంపేయాలి.
ఇప్పుడు కొర్రలు తీసుకున్న అదే గ్లాసుతో కచ్చితంగా రెండున్నర గ్లాసుల (2.5 cups) మంచి నీటిని పోయాలి. దీనిపై మూతపెట్టి కనీసం 4 నుండి 5 గంటల పాటు నాననివ్వాలి. సమయం ఉంటే రాత్రంతా నానబెట్టుకుంటే ఇంకా మంచిది; ఎంత ఎక్కువ సేపు నానితే అన్నం అంత సాఫ్ట్‌గా వస్తుంది.
5 గంటల తర్వాత మూత తీసి చూస్తే కొర్రలు నీటిని పీల్చుకుని చక్కగా ఉబ్బుతాయి. ఇప్పుడు ఆ నానిన నీళ్లతో సహా కొర్రలను నేరుగా స్టౌపై పెట్టుకోవచ్చు లేదా అల్యూమినియం/మట్టి పాత్రలోకి మార్చుకోవచ్చు . స్టవ్ వెలిగించి పాత్రను పెట్టి మంటను హై ఫ్లేమ్‌లో ఉంచాలి. మూత పెడితే నీళ్లు పొంగిపోయే ప్రమాదం ఉంది కాబట్టి.. మూత తీసే ఉంచి, గరిటెతో కలుపుతూ పొంగు వచ్చే వరకు దగ్గరుండి మరిగించాలి.
అన్నం బాగా పొంగు వచ్చిన తర్వాత మంటను మీడియం ఫ్లేమ్‌కి తగ్గించి ఉడికించాలి. నీళ్లు కొద్దిగా ఉన్నప్పుడు మంటను లో ఫ్లేమ్‌లోకి మార్చి మూతపెట్టాలి. మధ్యమధ్యలో మూత తీసి అడుగు అంటకుండా గరిటెతో అటూ ఇటూ సున్నితంగా కలుపుకుంటూ ఉండాలి. మొత్తం నీరంతా ఇంకిపోయి అన్నం మెత్తబడే వరకు దాదాపు 10 నిమిషాలు ఉడికించి స్టవ్ ఆఫ్ చేయాలి.
స్టవ్ ఆఫ్ చేసిన వెంటనే అన్నం కాస్త తడిగా అనిపిస్తుంది. వెంటనే గరిటెతో కలపకుండా మూతపెట్టి అలాగే 5 నిమిషాలు వదిలేయాలి. ఆ ఆవిరిలోనే అన్నం మిగిలిన తేమను పీల్చుకుని అద్భుతమైన పొడిపొడి టెక్స్చర్‌తో తయారవుతుంది. అంతే, నోరూరించే బలవర్ధకమైన 'కొర్రల అన్నం' సిద్ధం! గుత్తి వంకాయ కూర, ఘుమఘుమలాడే రసం, పప్పు లేదా నచ్చిన కూరగాయల ఫ్రైలతో పాటు వడియాలు నంజుకుని తింటే సాధారణ బియ్యం అన్నం కంటే ఎంతో రుచిగా, ఆరోగ్యకరంగా ఉంటుంది!