Heatwaves: ఈ రెండు రోజులు నిప్పుల కొలిమే.. ‘మండే’ ఎండల్లో ప్రాణాలు జర భద్రం.. ఇలా చేస్తే..
How to deal Heatwaves: నైరుతి రుతుపవనాలు ప్రవేశించినప్పటికీ భానుడి ప్రతాపం కొనసాగుతూనే ఉంది. రోజురోజుకూ పెరుగుతున్న ఉష్ణోగ్రతలతో ప్రజలు విలవిలలాడుతున్నారు. ఓ వైపు మాడు పగిలే ఎండలు.. మరోవైపు వడగాలులు, తీవ్ర ఉక్కపోతతో అల్లాడుతున్నారు.
How to deal Heatwaves: నైరుతి రుతుపవనాలు ప్రవేశించినప్పటికీ భానుడి ప్రతాపం కొనసాగుతూనే ఉంది. రోజురోజుకూ పెరుగుతున్న ఉష్ణోగ్రతలతో ప్రజలు విలవిలలాడుతున్నారు. ఓ వైపు మాడు పగిలే ఎండలు.. మరోవైపు వడగాలులు, తీవ్ర ఉక్కపోతతో అల్లాడుతున్నారు. ఈ నాలుగైదు రోజుల్లోనే ఉత్తరభారతదేశంలో వడదెబ్బతో దాదాపు 100 మందికి పైగా మరణించినట్లు పేర్కొంటున్నారు. ఈ క్రమంలో వాతావరణ శాఖ అలర్ట్ జారీ చేసింది. సోమవారం, మంగళవారం ఎండల తీవ్రత ఎక్కువగా ఉంటుందని, జాగ్రత్తలు తీసుకుంటూ ప్రజలు అప్రమత్తంగా ఉండాలంటూ సూచించింది.
ఈ నేపథ్యంలో తెలుగు రాష్ట్రాల్లో అత్యధికంగా 44 నుంచి 46 డిగ్రీల ఉష్ణోగ్రతలు నమోదయ్యే అవకాశం ఉందని వాతావరణ శాఖ పేర్కొంది. ఈ మేరకు ఆరెంజ్ అలర్ట్ జారీ చేసింది. ఎండలు పెరుగుతున్న నేపథ్యంలో ప్రజలంతా పలు జాగ్రత్తలు తీసుకోవాలని వాతావరణ శాఖ సూచించింది.
సోమ, మంగళవారాల్లో అధిక ఉష్ణోగ్రతలు నమోదయ్యే అవకాశాలున్న నేపథ్యంలో ఈ జాగ్రత్తలు తీసుకుంటే.. ఎండ వేడి నుంచి ఉపశమనం పొందడంతోపాటు.. వడదెబ్బ వారి నుంచి తప్పించుకోవచ్చు.. ఎండ బాగా వచ్చే సమయంలో చల్లని ప్రదేశాల్లోనే ఉండేలా చర్యలు తీసుకోవాలి. సాధ్యమైనంతవరకు ఎండలోకి వెళ్లకపోవడమే మంచిది.
ఒకవేళ ఇంటి నుంచి బయటకు వెళ్లాల్సి వస్తే.. తలకు ఏదైనా వస్త్రం చుట్టుకోవాలి. లేకపోతే గొడుగు ఉపయోగించాలి. దాహం అనిపించకపోయినా తరచూ నీళ్లు తాగుతుండాలి. ఎప్పటికప్పుడు డీహైడ్రేషన్‌కు గురికాకుండా చూసుకోవాలి.
ప్రధానంగా అనారోగ్యంతో బాధపడేవారు, వృద్ధులు, చిన్నారుల ఆరోగ్యం పట్ల మరింత జాగ్రత్త వహించాలి. ఇంట్లో ఉన్నా.. నీళ్లు, మజ్జిగ, నిమ్మరసం, లస్సీ వంటి వాటిని తాగడం మంచిది. సాధ్యమైనంతవరకు వదులు దుస్తులు ధరించడం బెటర్..