ప్రతిరోజూ 30 నిమిషాలు నడవడం వల్ల కలిగే ఆరోగ్య ప్రయోజనాలు తెలిస్తే.. ఇప్పుడే మొదలుపెట్టేస్తారు..
శరీరం ఆరోగ్యంగా, ఫిట్‌గా ఉండాలంటే జిమ్‌లో గంటల తరబడి చెమటలు పట్టాల్సిన అవసరం లేదు..అవును ప్రతిరోజూ అరగంటపాటు వాకింగ్ చేసినా కూడా మిమ్మల్ని మీరు ఆరోగ్యంగా ఉంచుకోవచ్చునని ఆరోగ్య నిపుణులు చెబుతున్నారు. నడక ఆరోగ్యానికి అనేక విధాలుగా మేలు చేస్తుందని చెబుతున్నారు. వాకింగ్ చేయడం ద్వారా అనేక అనారోగ్య సమస్యల నుంచి తప్పించుకోవచ్చు అంటున్నారు. రోజూ 30 నిమిషాలు నడవడం వల్ల కలిగే ఆరోగ్య ప్రయోజనాలను గురించి ఇక్కడ తెలుసుకుందాం.
నడక అనేక వ్యాధులను నివారించడంలో కూడా సహాయపడుతుంది. రోజూ కేవలం 30 నిమిషాల నడక ఆరోగ్యానికి ఎంత మేలు చేస్తుందో తెలుసా? నేటి బిజీ లైఫ్‌లో కొందరు కనీసం ముప్పై నిమిషాలు కూడా నడవలేకపోవడం వల్ల తీవ్ర అనారోగ్య సమస్యల బారీన పడుతున్నారు. రెగ్యులర్ వాకింగ్ చేయడం వల్ల ఆయా సమస్యలను సులభంగా, సమర్థవంతంగా పరిష్కారించుకోవచ్చు.
ప్రతిరోజూ కనీసం 30 నిమిషాల పాటు వాకింగ్ చేయడం వల్ల శరీరానికి, ముఖ్యంగా గుండెకు రక్త ప్రసరణ మెరుగుపడుతుంది. దీంతో గుండె జబ్బులు వచ్చే ప్రమాదాన్ని తగ్గించుకోవచ్చు. రోజూ కాసేపు వాకింగ్ చేస్తే ఎండార్ఫిన్ హార్మోన్ రిలీజ్ అవుతుంది. తద్వారా ఒత్తిడి, ఆందోళన దూరమవుతాయి. మంచి మూడ్ లభిస్తుంది.
వాకింగ్ వల్ల శరీరంలోని రక్తంలో చక్కెర స్థాయి అదుపులో ఉంటుంది. నడక ఇన్సులిన్ సెన్సిటివిటీని పెంచడంలో సహాయపడుతుంది. టైప్ 2 డయాబెటిస్ ప్రమాదాన్ని కూడా తగ్గిస్తుంది. డయాబెటిక్ రోగులకు వాకింగ్ చాలా ఉపయోగకరంగా ఉంటుంది.
రోజూ వాకింగ్ చేయడం వల్ల మంచి నిద్ర పడుతుంది. విశ్రాంతి బాగా లభించినట్లుగా అనిపిస్తుంది. నిద్రలేమి సమస్యతో బాధపడేవారు రోజూ వాకింగ్ చేయడం మంచిది. వాకింగ్ రెగ్యులర్‌గా చేయడం ద్వారా దీర్ఘకాల అనారోగ్య సమస్యలు దూరం చేసుకోవచ్చు. డయాబెటిస్, స్ట్రోక్, కొన్ని రకాల క్యాన్సర్‌లు రాకుండా కాపాడుకోవచ్చు.
ప్రతిరోజూ 30 నిమిషాలు వాకింగ్ చేస్తే రక్త ప్రసరణ మెరుగుపడి, బాడీకి ఆక్సిజన్ రవాణా బాగా జరుగుతుంది. దీంతో అలసట దూరమవుతుంది. తక్షణ శక్తి లభిస్తుంది. బరువు తగ్గాలనుకునేవారు ప్రతిరోజూ వాకింగ్ చేయడం మంచిది. దీనివల్ల కేలరీల ఖర్చు ఎక్కువగా జరుగుతుంది. దీంతో బరువు ఆరోగ్యంగా ఉంటుంది. బీపీ అదుపులో ఉండాలంటే రోజూ వాకింగ్ చేయడం మంచిది. దీనివల్ల రక్తంలో చెడు కొలెస్ట్రాల్ కరిగిపోయి రక్తపోటు అదుపులోకి వస్తుంది.