జామకాయ vs ఉసిరికాయ.. మీ ఆరోగ్యానికి ఏది బెస్ట్..? ఈ తేడాలు తెలుసుకోండి..
Guava vs Amla: వాతావరణం మారగానే జలుబు, దగ్గు, జీర్ణ సమస్యలు చుట్టుముట్టేస్తుంటాయి. ఇలాంటి సమయంలో రోగనిరోధక శక్తిని పెంచుకోవడానికి మనకు గుర్తొచ్చే రెండు అద్భుతమైన పండ్లు జామకాయ, ఉసిరికాయ. విటమిన్ సి గనులైన ఈ రెండింటిలో ఏది మన ఆరోగ్యానికి ఎక్కువ మేలు చేస్తుంది? షుగర్, గుండె జబ్బులు, పేగు ఆరోగ్యానికి ఏ పండు బెస్ట్ ఛాయిస్? ఆసక్తికరమైన ఈ పోలికలను ఈ స్టోరీలో వివరంగా తెలుసుకుందాం..
పోషక విలువల పరంగా చూస్తే ఈ రెండూ ఒకదానితో ఒకటి పోటీ పడతాయి. ఒక సాధారణ జామకాయ శరీరానికి రోజువారీ అవసరమైన విటమిన్ సి లో 200 శాతానికి పైగా అందించగలదు. ఇందులో గుండె ఆరోగ్యానికి తోడ్పడే పొటాషియంతో పాటు పీచుపదార్థం, యాంటీఆక్సిడెంట్లు పుష్కలంగా ఉంటాయి. మరోవైపు ఉసిరికాయ విటమిన్ సి కి తిరుగులేని వనరుగా నిలుస్తుంది. 100 గ్రాముల ఉసిరిలో ఏకంగా 600 నుండి 700 మిల్లీగ్రాముల విటమిన్ సి లభిస్తుంది. అంతేకాకుండా ఇందులోని ఐరన్, కాల్షియం, టానిన్లు, ఫ్లేవనాయిడ్లు శరీరంలోని విష వ్యర్థాలను తొలగించడంలో సహాయపడతాయి. విటమిన్ సి రెండింటిలోనూ సమృద్ధిగా ఉన్నప్పటికీ, యాంటీఆక్సిడెంట్ల సాంద్రత దృష్ట్యా ఉసిరి స్వల్ప ఆధిక్యతను కనబరుస్తుంది.
వర్షాకాలంలో అత్యంత కీలకమైన రోగనిరోధక శక్తి పెంపుదలలో రెండూ అద్భుతంగా పనిచేస్తాయి. జామలోని విటమిన్ సి శరీర రోగనిరోధక వ్యవస్థను బలోపేతం చేసి, కణాలు దెబ్బతినకుండా కాపాడటమే కాక చర్మానికి మేలు చేసే కొల్లాజెన్ ఉత్పత్తిని పెంచుతుంది. ఉసిరికాయ రోగనిరోధక శక్తిని ఇవ్వడంతో పాటు ఒక సహజ డిటాక్సిఫైయర్ పనిచేస్తుంది. కాలేయ పనితీరును మెరుగుపరిచి, శరీరంలో చేరిన హానికర టాక్సిన్లను బయటకు పంపుతుంది. ఉసిరిలోని యాంటీ ఇన్‌ఫ్లమేటరీ గుణాలు ఆర్థరైటిస్, మధుమేహం వంటి దీర్ఘకాలిక సమస్యల నివారణలోనూ ఎంతగానో తోడ్పడతాయి.
వర్షాకాలంలో సాధారణంగా మందగించే జీర్ణక్రియను మెరుగుపరచడంలో ఈ రెండు పండ్లు వేర్వేరు రీతుల్లో మేలు చేస్తాయి. జామకాయలో ఫైబర్ మెండుగా ఉండటం వల్ల పేగుల ఆరోగ్యాన్ని సంరక్షించి, మలబద్ధకం రాకుండా అడ్డుకుంటుంది. దీని గింజలు సహజ విరేచనకారిగా కూడా ఉపయోగపడతాయి. మరోవైపు ఉసిరి జీర్ణవ్యవస్థను శాంతపరచి ఎసిడిటీని తగ్గిస్తుంది. జీర్ణ ఎంజైమ్‌ల ఉత్పత్తిని ప్రోత్సహించి ప్రేగుల కదలికలను క్రమబద్ధీకరించడం వల్ల అజీర్ణం, విరేచనాల నివారణకు ఆయుర్వేదంలో ఉసిరిని విస్తృతంగా సిఫార్సు చేస్తారు.
షుగర్, గుండె ఆరోగ్యంపై కూడా ఈ రెండు పండ్లు విశేషమైన ప్రభావాన్ని చూపుతాయి. జామకాయలో తక్కువ గ్లైసెమిక్ ఇండెక్స్, అధిక పీచు ఉండటం వల్ల రక్తంలోకి చక్కెర వేగంగా చేరకుండా నిరోధిస్తుంది. 2016 నాటి ఒక పరిశోధన ప్రకారం తొక్క తీసిన జామకాయ రక్తంలో గ్లూకోజ్ స్థాయిలను నియంత్రించడంలో ప్రభావవంతంగా పనిచేస్తుందని తేలింది. అలాగే ఇందులోని పొటాషియం, మెగ్నీషియం గుండెకు రక్షణ కల్పిస్తాయి. ఇక ఉసిరికాయ ఇన్సులిన్ సున్నితత్వాన్ని మెరుగుపరిచి చక్కెర స్థాయిలను సమర్థవంతంగా అదుపు చేస్తుంది. రక్తనాళాలను పటిష్టపరిచి, శరీరంలో పేరుకుపోయే చెడు కొలెస్ట్రాల్‌ను తగ్గించడంలో ఉసిరి మరింత ప్రభావవంతంగా ఉపయోగపడుతుంది.
మొత్తంగా చూస్తే.. వర్షాకాలంలో వచ్చే అనారోగ్య సమస్యలను తిప్పికొట్టడానికి ఈ రెండు పండ్లనూ సమతుల్యంగా తీసుకోవడం మంచిది. విరేచనం సాఫీగా సాగడానికి, పేగు ఆరోగ్యాన్ని కాపాడుకోవడానికి జామకాయ ఎంతగానో ఉపయోగపడితే.. శరీర నిర్విషీకరణకు, కొలెస్ట్రాల్ నియంత్రణకు, శక్తివంతమైన యాంటీఆక్సిడెంట్ల కోసం ఉసిరికాయ అత్యుత్తమ ఎంపికగా నిలుస్తుంది. కాబట్టి ఈ వర్షాకాల డైట్‌లో జామ, ఉసిరి రెండింటినీ భాగం చేసుకోవడం ద్వారా సంపూర్ణ ఆరోగ్యాన్ని మరియు పటిష్టమైన రోగనిరోధక శక్తిని సొంతం చేసుకోవచ్చు.