చేపల కూర నీచు వాసన రాకుండా ఉండాలంటే ఇలా చేయండి.. కూర మరింత రుచిగా
చేపల కూర అనగానే చాలా మందికి నీచు వాసన, ముక్కలు విరిగిపోవడం వంటి సమస్యలు ఎదురవుతుంటాయి. అయితే, సరైన పద్ధతిలో వండితే చేపల కూర రుచికరంగా, చిక్కటి గ్రేవీతో, మంచి రంగుతో, ఎటువంటి నీచు వాసన లేకుండా ఉంటుంది. ఈ రెసిపీ మొదటిసారి వండేవారు కూడా పర్ఫెక్ట్‌గా చేయగలిగేలా సులభమైన చిట్కాలు ఇక్కడ ఉన్నాయి.
కావాల్సిన పదార్థాలు: చేపలు: 1 కిలో, కారం: 2 టేబుల్‌స్పూన్‌లు , ఉప్పు: రుచికి సరిపడా, పసుపు: కొద్దిగా, నూనె: 4-5 టేబుల్‌స్పూన్‌లు కరివేపాకు: కొద్దిగా, పచ్చిమిరపకాయలు: 5-6, ఉల్లిపాయలు: 2-3 మీడియం సైజు, అల్లం వెల్లుల్లి పేస్ట్: 1 టేబుల్‌స్పూన్, టమాటా ప్యూరీ: 1/2 కప్పు, చింతపండు గుజ్జు: 1/2 కప్పు , నీరు: 1 గ్లాసు, ఆనియన్స్: కొద్దిగా , కొత్తిమీర: కొద్దిగా , ధనియాలు: 1 టేబుల్‌స్పూన్, జీలకర్ర: 1/2 టీస్పూన్, దాల్చిన చెక్క: చిన్న ముక్క, లవంగాలు: 3, పచ్చి వెల్లుల్లి రెబ్బలు: 4-5 తీసుకోవాలి.
చేప ముక్కలను కొట్టించుకునేటప్పుడు కారం, ఉప్పు బాగా పట్టడానికి మీడియం సైజులో కొట్టించుకోండి. ముక్కలను శుభ్రంగా కడగడానికి గల్లుప్పు ఉపయోగించండి. ఇది నీచు వాసనను సమర్థవంతంగా తొలగిస్తుంది. కడిగిన ముక్కలలో ఒక టేబుల్‌స్పూన్ కారం, రుచికి సరిపడా ఉప్పు, కొద్దిగా పసుపు, ఒక టేబుల్‌స్పూన్ నూనె వేసి బాగా కలిపి, మూత పెట్టి 20 నిమిషాల పాటు పక్కన పెట్టండి. ఒక చిన్న రోలు తీసుకుని అందులో ధనియాలు, జీలకర్ర, దాల్చిన చెక్క, లవంగాలు వేసి కచ్చాపచ్చాగా దంచండి. మిక్సీలో కూడా పట్టుకోవచ్చు కానీ రోట్లో దంచితే రుచి మరింత మెరుగ్గా ఉంటుంది. ఇది కొద్దిగా నలిగిన తర్వాత, పొట్టు తీయని పచ్చి వెల్లుల్లి రెబ్బలను వేసి మరీ మెత్తగా కాకుండా కచ్చాపచ్చాగా దంచుకోండి. ఈ మసాలా కూరకు అద్భుతమైన సువాసనను, రుచిని ఇస్తుంది.
స్టవ్ ఆన్ చేసి, మందపాటి, వెడల్పాటి కడాయిని పెట్టుకోండి. వెడల్పాటి కడాయిలో ముక్కలు విరగకుండా సులభంగా వండవచ్చు. నాలుగు నుండి ఐదు టేబుల్‌స్పూన్‌ల నూనె వేసి వేడి అయ్యాక, కొద్దిగా కరివేపాకు, చీల్చిన పచ్చిమిరపకాయలు వేసి కొద్దిగా వేగనివ్వండి తరిగిన ఉల్లిపాయ ముక్కలను వేసి, పింక్ రంగులోకి మారేంత వరకు వేయించండి. చేపల కూరకు ఆయిల్, కారం, ఉప్పు సరిపడా ఉండడం చాలా ముఖ్యం.ఉల్లిపాయలు వేగిన తర్వాత, ఒక టేబుల్‌స్పూన్ అల్లం వెల్లుల్లి పేస్ట్, కొద్దిగా పసుపు వేసి పచ్చి వాసన పోయేంత వరకు వేయించండి. నూనె పైకి తేలే వరకు వేయించాలి. ఆ తర్వాత అర కప్పు టమాటా ప్యూరీ వేసి, పచ్చి వాసన పోయి చిక్కబడే వరకు కలుపుతూ ఉడికించండి.
గ్రేవీ బాగా ఉడికిన తర్వాత, ముందుగా మాగ్నెట్ చేసి పెట్టుకున్న చేప ముక్కలను జాగ్రత్తగా గ్రేవీలో పెట్టండి. ఒక నిమిషం పాటు వేగనిచ్చి, ఆ తర్వాత నెమ్మదిగా మరొక వైపుకి తిప్పి మరో నిమిషం వేగనివ్వండి. ఇలా చేయడం వల్ల నీచు వాసన రాదు. ఇప్పుడు ఇంకొక టేబుల్‌స్పూన్ కారం, కొద్దిగా ఉప్పు వేయండి. మొత్తంగా ఒక కిలో చేపలకు రెండు టేబుల్‌స్పూన్‌ల కారం పడుతుంది. ఒక గ్లాసు నీరు పోసుకోండి. ముందే ఎక్కువ నీరు పోయకుండా, ముక్కలు మునిగేంత వరకు పోస్తే సరిపోతుంది. గరిటె పెట్టి చేప ముక్కలను తిప్పకూడదు. కడాయిని అటూఇటూ పట్టుకుని నెమ్మదిగా కదుపుతూ కారం, ఉప్పు, పసుపు సమానంగా కలిసేలా చూడండి. మూత పెట్టి ఐదు నిమిషాల పాటు బాగా ఉడకనివ్వండి. ఐదు నిమిషాల తర్వాత మూత తీసి, చిక్కటి చింతపండు గుజ్జు వేసి మళ్లీ కడాయిని నెమ్మదిగా కదుపుకోండి. చిక్కటి గుజ్జు వల్ల గ్రేవీ చిక్కగా వస్తుంది.
మరో ఐదు నిమిషాల పాటు దగ్గరపడే వరకు ఉడికించండి. చేపల కూర ఉడకడానికి ఎక్కువ సమయం పట్టదు. కూర దగ్గరపడి నూనె పైకి తేలిన తర్వాత, ముందుగా దంచుకున్న పొడి మసాలాను వేయండి. రెండు నిమిషాలు ఉడికించి స్టవ్ ఆఫ్ చేయండి. స్ప్రింగ్ ఆనియన్స్ కూరకు అద్భుతమైన రుచిని ఇస్తాయి. స్టవ్ ఆఫ్ చేస్తే, చల్లారిన తర్వాత గ్రేవీ మరింత చిక్కబడుతుంది. మీకు పల్చగా కావాలంటే కొద్దిగా నీరుగా ఉన్నప్పుడే ఆఫ్ చేయవచ్చు. చివరగా కొత్తిమీర చల్లితే రుచికరమైన చేపల కూర రెడీ.