Ulava Vadalu: నూనె పీల్చకుండా అదిరిపోయే బలవర్ధకమైన ఉలవ వడలు
తెలుగు సంప్రదాయ వంటకాల్లో ఉలవచారుకు ప్రత్యేకమైన అభిమానులు ఉంటారు. అయితే ఉలవచారు కాచుకున్న తర్వాత రసాన్ని తీసుకుని, మిగిలిన ఉడికించిన ఉలవలను ఏం చేయాలో తెలియక చాలామంది పారేస్తుంటారు. కానీ ఉలవల్లో అత్యధికంగా ప్రోటీన్, ఐరన్ మరియు ఫైబర్ ఉంటాయి; ఇవి శరీరంలోని అనవసర కొవ్వును కరిగించడంలో, స్టామినా పెంచడంలో మరియు పిల్లల ఎదుగుదలలో కీలక పాత్ర పోషిస్తాయి.
కావలసిన పదార్థాలు: 1 కప్పు ఉలవచారు కాచగా మిగిలిన ఉడికించిన ఉలవలు, 1 చిన్న గ్లాసు పొట్టు పెసరపప్పు, 5 పచ్చిమిరపకాయలు, 1 చిన్న అల్లం ముక్క, సన్నగా తరిగిన 2 ఉల్లిపాయలు, 2 టేబుల్ స్పూన్ల బియ్యప్పిండి, తాజా కరివేపాకు తరుగు, రుచికి సరిపడా ఉప్పు, డీప్ ఫ్రైకి సరిపడా నూనె
తయారీ విధానం: ఒక గంట ముందుగా చిన్న గ్లాసు పొట్టు పెసరపప్పును నీటిలో నానబెట్టుకోవాలి. గ్రైండ్ చేయడానికి ముందు ఒక చెంచా నానిన పప్పును పక్కన పెట్టుకోవాలి. వడల్లో నమిలేటప్పుడు క్రంచీగా తగలడం కోసం. ఇప్పుడు మిక్సీ జార్లో ఉడికించిన ఉలవలు, మిగిలిన నానబెట్టిన పెసరపప్పు, 5 పచ్చిమిర్చి, చిన్న అల్లం ముక్క, సరిపడా ఉప్పు వేయాలి. నీళ్లు ఎక్కువగా పోయకుండా, మిక్సీని ఆపుతూ ఆపుతూ కాస్త గట్టిగా బరకగా ఉండేలా గ్రైండ్ చేసుకోవాలి.
రుబ్బిన ఉలవల మిశ్రమాన్ని ఒక వెడల్పాటి గిన్నెలోకి తీసుకోవాలి. ఇందులో పక్కన ఉంచిన నానబెట్టిన పెసరపప్పు, సన్నగా తరిగిన రెండు ఉల్లిపాయ ముక్కలు, తాజా కరివేపాకు తరుగు వేయాలి. వడలు నూనె పీల్చకుండా, పైన కరకరలాడుతూ క్రిస్పీగా రావడానికి రెండు చెంచాల బియ్యప్పిండిని వేసి చేతితో ముద్దలా బాగా కలుపుకోవాలి.
స్టవ్ వెలిగించి బాండీలో డీప్ ఫ్రైకి సరిపడా నూనె పోసి వేడిచేయాలి. నూనె కాగిన తర్వాత అరచేతికి కొద్దిగా నీళ్లు అద్దుకుంటూ నిమ్మకాయ సైజు పిండి ముద్దను తీసుకుని వడలా పలుచగా ఒత్తుకోవాలి. ఒక్కొక్కటిగా కాగిన నూనెలో వేస్తూ మీడియం మంటపై వేయించాలి.
ఉలవలు ఇప్పటికే ఉడికినవి కాబట్టి ఇవి వేగడానికి ఎక్కువ సమయం పట్టదు; చాలా వేగంగా వేగుతాయి . రెండు వైపులా అటూ ఇటూ తిప్పుతూ మంచి గోల్డెన్ బ్రౌన్ కలర్ వచ్చి కరకరలాడే వరకు వేయించి జాలి గరిటెతో తీసుకోవాలి. అంతే, ఎంతో రుచికరమైన ఆరోగ్యకరమైన 'ఉలవ వడలు' సిద్ధం! సాయంత్రం వేడి టీతో గానీ, టమాటో చట్నీ లేదా అల్లం చట్నీతో గానీ తింటే ప్రతి ముక్కా ఎంతో కమ్మగా ఉంటుంది.