Baingan Tawa Fry: చుక్క నూనెతో 10 నిమిషాల్లో వంకాయ తవా ఫ్రై.. పప్పు, సాంబార్లో తింటే అద్భుతమే
భోజనంలో పప్పు, చారు లేదా సాంబార్ చేసుకున్నప్పుడు పక్కన నంజుకోవడానికి ఏదైనా క్రిస్పీగా, రుచికరమైన వేపుడు ఉంటే ఆ భోజనమే పరిపూర్ణమవుతుంది. అలాంటి సైడ్ డిష్లలో బెంగాలీ సంప్రదాయ వంటకమైన 'బెగున్ భాజా' లేదా 'బైంగన్ తవా ఫ్రై' ఎంతో ప్రసిద్ధి చెందింది. పెద్ద గుండ్రటి వంకాయలను గుండ్రటి చక్రాల్లా కోసి, శనగపిండి మరియు సుగంధ మసాలాలతో కోట్ చేసి పెనంపై తక్కువ నూనెతో వేయిస్తే అద్భుతమైన రుచి వస్తుంది.
డీప్ ఫ్రై చేసే పని లేకుండా, కేవలం కొద్దిపాటి నూనెతో పైన క్రిస్పీగా లోపల ఎంతో మృదువుగా ఉండేలా చేసుకునే ఈ బైంగన్ తవా ఫ్రై తయారీ విధానాన్ని ఇప్పుడు చూద్దాం. దీనికి దీనికి కావలసిన పదార్థాలు: పెద్ద సైజు భర్తా వంకాయ సుమారు 250 గ్రాములు, రెండు టేబుల్ స్పూన్ల శనగపిండి, అర టీస్పూన్ వేయించిన జీలకర్ర పొడి, ఒక టీస్పూన్ ఆమ్చూర్, ఒక టీస్పూన్ కశ్మీరీ కారం పొడి, అర టీస్పూన్ పసుపు, పావు టీస్పూన్ ఇంగువ, రుచికి సరిపడా ఉప్పు, వేయించడానికి సరిపడా ఆవనూనె లేదా ఏదైనా వంట నూనె రెండు నుండి మూడు టేబుల్ స్పూన్లు.
డ్రై మసాలా కోటింగ్ మిశ్రమం: ఒక వెడల్పాటి ప్లేట్లోకి రెండు టేబుల్ స్పూన్ల శనగపిండి తీసుకోవాలి. అందులో వేయించిన జీలకర్ర పొడి, ఆమ్చూర్ పొడి, కశ్మీరీ కారం పొడి, పసుపు, ఇంగువ మరియు తగినంత ఉప్పు వేసి బాగా కలుపుకోవాలి.
వంకాయ ముక్కలు & మసాలా పట్టించే విధానం: వంకాయను శుభ్రంగా కడిగి తడి తుడవాలి. ఆ తర్వాత సుమారు 1 సెంటీమీటర్ మందంతో సమానమైన గుండ్రటి చక్రాల్లా కోసుకోవాలి. ముక్కలు మరీ సన్నగా కాకుండా, మరీ లావుగా కాకుండా సరైన మందంలో ఉండాలి.
కట్ చేసిన ప్రతి వంకాయ చక్రాన్ని సిద్ధం చేసుకున్న డ్రై మసాలా పిండిలో రెండు వైపులా బాగా అద్దాలి. వంకాయలోని సహజ తేమ వల్ల ఈ పొడి చక్కగా అతుక్కుంటుంది. ఇలా అన్ని ముక్కలకు మసాలా పట్టించిన తర్వాత ఒక 7 నుండి 8 నిమిషాల పాటు పక్కన ఉంచాలి. దీనివల్ల మసాలాలు వంకాయలోకి చక్కగా ఇంకిపోయి తేమతో పిండి ముద్దలా పట్టుకుంటుంది.
తవా ఫ్రై చేసే విధానం: స్టవ్ మీద పెనం పెట్టి రెండు టేబుల్ స్పూన్ల ఆవనూనె వేసి వేడిచేయాలి. ఆవనూనె వాడటం వల్ల సాంప్రదాయ ఘాటైన రుచి వస్తుంది. నూనె కాగిన తర్వాత మసాలా పట్టిన వంకాయ ముక్కలను ఒక్కొక్కటిగా తవాపై పేర్చాలి. మంటను లో-మీడియం ఫ్లేమ్లో ఉంచి 4 నుండి 5 నిమిషాల పాటు వేగనివ్వాలి. అడుగు భాగం చక్కగా వేగి క్రిస్పీగా మారిన తర్వాత పైభాగంలో కొద్దిగా నూనె చల్లి రెండో వైపునకు తిప్పుకోవాలి. రెండు వైపులా మంచి గోల్డెన్ బ్రౌన్ కలర్ వచ్చే వరకు క్రిస్పీగా కాల్చుకుని ప్లేట్లోకి తీసుకోవాలి. అంతే, ఎంతో నోరూరించే క్రిస్పీ బైంగన్ తవా ఫ్రై సిద్ధం! వేడివేడి పప్పు అన్నం, సాంబార్ అన్నంతో నంజుకుని తింటే ప్రతి ముద్ద ఎంతో కమ్మగా అమృతంలా అనిపిస్తుంది.