Hair Care: కొబ్బరి నూనెలో ఇదొక్కటి కలిపి రాస్తే.. జుట్టు వద్దన్నా ఒత్తుగా పెరుగుతుంది!
మనకు ఊహ తెలిసినప్పటి నుంచి జుట్టు సంరక్షణ కోసం కొబ్బరినూనెను వాడుతూనే ఉన్నాం. ఇందులో జుట్టు ఆరోగ్యానికి కావాల్సిన పోషకాలు పుష్కలంగా ఉంటాయి. ఇవి జుట్టును బలంగా ఉంచడమే కాకుండా రాలిపోకుండా, పొడిబారకుండా, స్కాల్ప్ సంబంధిత సమస్యలు రాకుండా అడ్డుకుంటాయి. మన వంటింట్లో దొరికే కొన్ని పదార్థాలను కొబ్బరినూనెలో కలిపి రాసుకోవడం వల్ల మరిన్ని ప్రయోజనాలు పొందవచ్చని ఆరోగ్య నిపుణులు చెబుతున్నారు.
కొబ్బరినూనె, ఉసిరి: ఉసిరిలో జుట్టు ఆరోగ్యానికి సహాయపడే విటమిన్-సి, యాంటీఆక్సిడెంట్లు పుష్కలంగా ఉంటాయి. ఇవి స్కాల్ప్లో రక్తప్రసరణను పెంచి జుట్టు త్వరగా తెల్లబడకుండా చూస్తాయి, కుదుళ్లను బలంగా మారుస్తాయి. అలాగే చుండ్రు సమస్యను కూడా దూరం చేస్తాయి. ఎండబెట్టిన ఉసిరి ముక్కలను కొబ్బరినూనెలో వేసి తక్కువ మంటపై మరిగించండి. ఆ తర్వాత చల్లారిన నూనెను వడకట్టి జుట్టుకు రాసుకోవాలి. గంట తర్వాత మైల్డ్ షాంపూతో తలస్నానం చేస్తే సరిపోతుంది.
కరివేపాకు: కరివేపాకులో జుట్టుకు కావాల్సిన యాంటీఆక్సిడెంట్లు, ప్రొటీన్లు పుష్కలంగా లభిస్తాయి. ఇవి జుట్టును పాడుచేసే ఫ్రీరాడికల్స్తో పోరాడి కుదుళ్ల ఆరోగ్యాన్ని మెరుగుపరుస్తాయి. వీటిలోని విటమిన్-బి జుట్టు సహజ రంగును కాపాడుతూ రాలడాన్ని తగ్గిస్తుంది. కొబ్బరినూనెలో కొన్ని తాజా కరివేపాకు రెబ్బలు వేసి తక్కువ మంటపై వేడి చేయండి. ఆకులు నల్లగా మారిన తర్వాత స్టవ్ ఆపేసి, చల్లారాక వడకట్టి జుట్టుకు పట్టించండి.
మెంతులు: మెంతుల్లో ప్రొటీన్, ఫైబర్ సమృద్ధిగా ఉంటాయి. జుట్టు సంరక్షణకు ఉపయోగించే సహజ పదార్థాల్లో మెంతులు ఎప్పుడూ ముందుంటాయి. వీటిలోని పోషకాలు జుట్టు కుదుళ్లను దృఢంగా, మృదువుగా ఉంచుతాయి. కొబ్బరినూనెలో కొద్దిగా మెంతులు వేసి తక్కువ మంటపై వేడి చేసి, చల్లారిన తర్వాత ఆ నూనెను తలకు రాసుకోవచ్చు.
అలోవెరా (కలబంద): కలబంద చర్మానికే కాకుండా జుట్టుకు కూడా అద్భుతంగా పనిచేస్తుంది. ఇది జుట్టును తేమగా ఉంచి చిట్లిపోకుండా కాపాడుతుంది. తాజా అలోవెరా జెల్ను నేరుగా వేడి నూనెలో కలపకూడదు. కలబంద గుజ్జును తలకు పట్టించి, కడిగిన తర్వాత కొబ్బరినూనె రాసుకోవడం లేదా సహజ పద్ధతిలో మిక్స్ చేసి వాడటం మంచిది.
రోజ్మేరీ: రోజ్మేరీలో యాంటీఆక్సిడెంట్, యాంటీ ఇన్ఫ్లమేటరీ గుణాలు ఎక్కువగా ఉంటాయి. రోజ్మేరీ ఆకులను మరిగించే సమయం లేకపోతే మార్కెట్లో దొరికే రోజ్మేరీ ఎసెన్షియల్ ఆయిల్ను కొబ్బరినూనెలో కొద్ది చుక్కలు కలిపి రాసుకోవచ్చు. ఎసెన్షియల్ ఆయిల్ను ఎప్పుడూ నేరుగా స్కాల్ప్పై రాయకూడదు; నూనెతో కలిపే వాడాలి. ఈ సహజ చిట్కాలు అందరి చర్మతత్వానికి ఒకేలా పనిచేయకపోవచ్చు. కాబట్టి ఉపయోగించే ముందు తప్పనిసరిగా ప్యాచ్ టెస్ట్ చేసుకోండి. ఏవైనా సమస్యలు లేదా సందేహాలు ఉంటే సంబంధిత నిపుణులను సంప్రదించడం మంచిది.