Virupaksha: బాక్సాఫీస్ వద్ద కలెక్షన్ల ఊచకోత.. విరూపాక్షతో తేజ్ విధ్వంసం.. 3 రోజుల్లోనే
యాక్సిడెంట్ అనంతరం సాయి ధరమ్ తేజ్ చేసిన మూవీ విరూపాక్ష. ఈ సినిమా బాక్సాఫీస్ వద్ద కలెక్షన్లతో దుమ్మురేపుతుంది. సినిమా స్క్రీన్ ప్లే, బ్యాగ్రౌండ్ స్కోర్ అద్భుతమని.. తేజ్, సంయుక్త మీనన్ చక్కగా నటించారని సినిమా చూసిన ప్రేక్షకులు చెబుతున్నారు.
సాయిధరమ్ కమ్ బ్యాక్ అదిరిపోయింది. 'విరూపాక్ష' మూవీ హిట్ టాక్‌తో దూసుకుపోతుంది.ఏప్రిల్ 21న సినిమాకు జనాలు బాగా ఆదరిస్తున్నారు. యాక్సిడెంట్ తరువాత తేజూ నటించిన ఫస్ట్ సినిమా కావడంతో విరూపాక్షపై మెగా ఫ్యాన్స్‌లో కూడా ఎంతో ఆసక్తి ఉంది. క్రియేటివ్ డైరెక్టర్ సుకుమార్ స్క్రీన్‌ప్లే ఇవ్వడంతో పాటు, ఈ సినిమా ప్రొడక్షన్‌లో కూడా భాగస్వామి కావడంతో అంచనాలు పెరిగాయి. ఆ అంచనాలు అందుకోవడంతో విరూపాక్ష సక్సెస్ అయ్యింది.
సుకుమార్ వద్ద పనిచేసిన కార్తిక్ వర్మ దండు ఈ సినిమాను తెరకెక్కించాడు. ఫస్ట్ డే వరల్డ్ వైడ్ రూ.12 కోట్ల గ్రాస్ వసూలు చేసిన విరూపాక్ష.. రెండు రోజుల్లో రూ.28 కోట్ల గ్రాస్ రాబట్టిందని తెలిసింది.
హిట్ టాక్ రావడంతో తొలి రోజుతో పోలిస్తే రెండో రోజు శనివారం కలెక్షన్స్ పెరిగాయి. ఇక మూడవ రోజు ఆదివారం.. బాక్సాఫీస్ వద్ద విరూపాక్ష ఫీవర్ నడిచింది. ప్రపంచ వ్యాప్తంగా రూ.44 కోట్ల మేర గ్రాస్ వసూలైందట.
షేర్ కలెక్షన్ విషయానికి వస్తే.. 3 రోజుల్లో వరల్డ్ వైడ్ వసూలైన షేర్ సుమారు రూ.22 కోట్లు అని ట్రేడ్ నిపుణుల ద్వారా తెలిసింది. ఒక మీడియం రేంజ్ హీరోకు 3 రోజుల్లో రూ.20 కోట్ల షేర్ అంటే మాములు విషయం కాదు. విరూపాక్షకు వరల్డ్ వైడ్ సుమారు రూ.22 కోట్ల ప్రీ-రిలీజ్ బిజినెస్ జరిగింది. రూ.23 కోట్ల మేర షేర్ వసూలైతే బ్రేక్ ఈవెన్ దాటినట్లే. దీంతో ఈ సినిమాకు లాభాల పంట ఖాయంగా కనిపిస్తుంది.
తెలుగు రాష్ట్రాల విషయానికి వస్తే.. 3 రోజుల్లో తెలుగు రాష్ట్రాల గ్రాస్ రూ.27.75 కోట్లుగా ఉంది. దీనిలో డిస్ట్రిబ్యూటర్ షేర్ విలువ సుమారు రూ.16.5 కోట్లు. ఫస్ట్ డే తెలుగు స్టేట్స్ బాక్సాఫీసు షేర్ రూ.4.79 కోట్ల మేర ఉండగా.. రెండవ రోజు రూ.5.8 కోట్లు, మూడో రోజు రూ.5.77 కోట్ల మేర ఉంది. అటు యూఎస్‌లో సైతం విరూపాక్ష దూసుకుపోతుంది. ఫస్ట్ వీకెండ్ ముగిసేసరికి యూఎస్‌లో విరూపాక్ష 7 లక్షల 60 వేల డాలర్ల కలెక్షన్స్ రాబట్టింది.