Cinema: ఓటీటీలో దుమ్మురేపుతున్న సినిమాలు.. మీ భార్యలతో కలిసి చూడాలంటే ధైర్యం ఉండాల్సిందే..
చాలా మంది సినిమా ప్రేమికులు ఇప్పుడు తమ కుటుంబాలతో కలిసి ఓటీటీ ప్లాట్‌ఫామ్‌లలో సినిమాలు చూడటానికి ఇష్టపడుతున్నారు. అయితే, కుటుంబంతో కలిసి చూడటానికి కొంచెం ఇబ్బందిగా అనిపించే సినిమాలు కొన్ని ఉన్నాయి. అలాగే భార్యలతో కలిసి సినిమాలు చూడాలంటే భర్తలు భయపడే చిత్రాలు కూడా ఉన్నాయి. ఎందుకంటే ఒక మహిళ అనుకుంటే ఏదైనా సాధించాలనుకుంటే ఎంతగైనా తెగిస్తుందనే అంశాలను వెల్లడించాయి.
ఓటీటీల రాకతో ప్రేక్షకులు వైవిధ్యమైన, సామాజిక కథాంశాలతో కూడిన చిత్రాలను బాగా ఆదరిస్తున్నారు. ముఖ్యంగా పవర్ ఫుల్ కథలతో, సమాజంలో మహిళలు ఎదుర్కొంటున్న పరిస్థితులపై తీసిన అనేక చిత్రాలకు IMDb (ఐఎమ్‌డీబీ) లో అత్యుత్తమ రేటింగ్‌లు లభించాయి. అయితే ఇటువంటి కొన్ని సినిమాలు దంపతుల మధ్య లేదా భార్యాభర్తలు కలిసి చూసినప్పుడు ఇంట్లో తీవ్రమైన చర్చలు, విభేదాలు లేదా చిన్నపాటి గొడవలకు కారణమయ్యే అవకాశం ఉందని సోషల్ మీడియాలో సరదాగా చర్చ సాగుతోంది.
ది గ్రేట్ ఇండియన్ కిచెన్: మలయాళంలో వచ్చి సంచలనం సృష్టించిన ఈ సినిమాకు ఐఎమ్‌డీబీలో 8.1 పైగా రేటింగ్ ఉంది. పెళ్లయిన ఒక మహిళ ఇంట్లో వంటింటి పనులకే ఎలా పరిమితమైపోతుంది, పితృస్వామ్య వ్యవస్థలో ఆమె స్వేచ్ఛ ఎలా హరించబడుతుంది అనే అంశాన్ని చాలా సహజంగా చూపించారు. ఈ చిత్రం చూసిన తర్వాత ప్రతి ఇంట్లో వంటింటి పనుల విభజన , సమానత్వంపై భార్యాభర్తల మధ్య పెద్ద చర్చ నడవడం ఖాయం.
థప్పడ్: తాప్సీ పన్ను ప్రధాన పాత్రలో నటించిన బాలీవుడ్ చిత్రం 'థప్పడ్'. ఈ సినిమాకు ఐఎమ్‌డీబీలో 7.0 రేటింగ్ లభించింది. భర్త కోపంలో కొట్టిన ఒక్క చెంపదెబ్బ (థప్పడ్) ఆత్మగౌరవానికి సంబంధించిన విషయమని, దానిని సహించాల్సిన అవసరం లేదని నాయిక కోర్టుకెక్కుతుంది. "ఒక్క దెబ్బే కదా" అని సర్దుకుపోవాలనే పాతాళపు ఆలోచనలపై ఈ సినిమా గట్టిగా ప్రశ్నిస్తుంది. ఈ చిత్రం చూశాక భార్యాభర్తల మధ్య ఆత్మగౌరవానికి సంబంధించి వేడివేడి చర్చలు జరుగుతాయనడంలో సందేహం లేదు.
మిసెస్: సన్యా మల్హోత్రా నటించిన 'మిసెస్' ('ది గ్రేట్ ఇండియన్ కిచెన్' రీమేక్) కూడా సమాజంలో గృహిణుల శ్రమకు లభించని గుర్తింపును ఎత్తిచూపింది. పెళ్లి తర్వాత తన సొంత కలలను, ఆశలను అణచివేసుకుని బతికే మహిళా జీవితాన్ని ఇది కళ్ళకు కట్టినట్లు చూపుతుంది. ఇలాంటి చిత్రాలు మహిళల హక్కులను, ఆత్మగౌరవాన్ని బలంగా ఆవిష్కరిస్తాయి. సినిమా పరంగా అద్భుతమైన ప్రశంసలు దక్కించుకున్నప్పటికీ, వీటిని చూసిన భార్యాభర్తలు తమ నిజ జీవితంతో పోల్చుకుంటే గొడవలు రాక తప్పవని నెటిజన్లు సరదాగా అంటారు.
'ఇంగ్లీష్ వింగ్లిష్' చిత్రం ఒక సాధారణ గృహిణి కథను చెబుతుంది. ఆమెకు ఇంగ్లీష్ రానందున ఆమె భర్త, కూతురు ఆమెను చిన్నచూపు చూస్తారు. అయితే, తన ఆత్మగౌరవాన్ని తిరిగి పొందడానికి, ఆమె రహస్యంగా ఇంగ్లీష్ మాట్లాడే కోర్సులో చేరుతుంది. క్రమంగా, ఆమె ఆత్మవిశ్వాసాన్ని పొంది, తన కుటుంబం ముందు తన స్థానాన్ని సుస్థిరం చేసుకుంటుంది.