Cinema : అల్లుడు అత్తారింటికి ఇల్లరికం వెళ్తే.. ఓటీటీలో ట్రెండింగ్ అవుతున్న సినిమా.. నవ్వులే నవ్వులు..
దర్శకుడు ఇలన్ తెరకెక్కించిన ఒక సినిమా నెట్‌ఫ్లిక్స్‌లో విడుదలైన అతి తక్కువ సమయంలోనే మొదటి స్థానాన్ని దక్కించుకుని ప్రేక్షకులను విశేషంగా అలరిస్తోంది. ప్రస్తుతం ఈ మూవీని డిజిటల్ ప్లాట్ ఫామ్ లో చూస్తూ జనాలు తెగ ఎంజాయ్ చేస్తున్నారు. చిన్న సినిమా.. ఊహించని కామెడీ సీన్స్ ప్రేక్షకులను పొట్ట చెక్కలయ్యేలా నవ్విస్తుంది. అందుకే ఈ సినిమా ఇప్పుడు అందరి దృష్టిని ఆకర్షిస్తుంది.
ప్రముఖ ఓటీటీ వేదిక నెట్‌ఫ్లిక్స్‌లో ఇటీవల విడుదలైన తమిళ రొమాంటిక్ కామెడీ ఎంటర్‌టైనర్ 'ప్యార్ ప్రేమ కళ్యాణం' ఇంటర్నెట్‌లో సెన్సేషన్ సృష్టిస్తోంది. ఎలాంటి అంచనాలు లేకుండా నేరుగా ఓటీటీలోకి వచ్చిన ఈ చిత్రం, విడుదలైన అతి తక్కువ కాలంలోనే వ్యూవర్షిప్ పరంగా రికార్డులు సృష్టిస్తూ ట్రెండింగ్ జాబితాలో నంబర్ వన్ స్థానాన్ని కైవసం చేసుకుంది. యువతను మరియు కుటుంబ ప్రేక్షకులను ఒకేలా ఆకట్టుకునే కథాంశంతో ఈ సినిమా తెరకెక్కింది.
ఈ చిత్రానికి ప్రముఖ దర్శకుడు ఇలన్ దర్శకత్వం వహించడమే కాకుండా, ఇందులో ప్రధాన పాత్రలో నటించి నటుడిగానూ అరంగేట్రం చేశారు. ఆయన సరసన శాన్వి మేఘన కథానాయికగా నటించి తన నటనతో అందరినీ ఆకట్టుకున్నారు. పెళ్లి తర్వాత సాధారణంగా అమ్మాయి అత్తింటికి వెళ్లే సాంప్రదాయానికి భిన్నంగా, అబ్బాయి అమ్మాయి ఇంటికి వెళ్లి కాపురం పెట్టే విభిన్నమైన కథాంశంతో ఈ సినిమా రూపొందింది.
సామాజిక మాధ్యమాల్లో చురుగ్గా ఉండే ఓ యువతి, సాధారణ కుటుంబానికి చెందిన యువకుడు ప్రేమించుకోవడం, ఆ తర్వాత వారిద్దరి పెళ్లి, కుటుంబాల మధ్య జరిగే ఆసక్తికరమైన సంఘటనల చుట్టూ ఈ కథ తిరుగుతుంది. ఆధునిక సంబంధాలు, భార్యాభర్తల మధ్య ఉండాల్సిన భాగస్వామ్యం, కుటుంబ బంధాల ప్రాముఖ్యతను దర్శకుడు చాలా వినోదాత్మకంగా వెండితెరపై ఆవిష్కరించారు. ఈ చిత్రంలో రాధికా శరత్‌కుమార్, ఎం.ఎస్. భాస్కర్, యోగి బాబు వంటి దిగ్గజ నటులు కీలక పాత్రల్లో నటించి సినిమాకు అదనపు బలాన్ని చేకూర్చారు.
ముఖ్యంగా యోగి బాబు తనదైన శైలి కామెడీతో ప్రేక్షకులను కడుపుబ్బా నవ్విస్తున్నారు. సినిమాలోని సన్నివేశాలు చాలా సహజంగా సాగుతూ నేటి తరానికి అద్దం పట్టేలా ఉన్నాయని ప్రేక్షకులు సోషల్ మీడియా వేదికగా ప్రశంసిస్తున్నారు. ఇక ఈ సినిమా విజయానికి సంగీత దర్శకుడు యువన్ శంకర్ రాజా అందించిన మ్యూజిక్ ప్రధాన కారణమని చెప్పవచ్చు. చిత్రంలోని పాటలు , నేపథ్య సంగీతం ఇప్పటికే శ్రోతలను విపరీతంగా ఆకట్టుకున్నాయి.
రొమాన్స్, కామెడీ, సెంటిమెంట్ అన్నీ సమపాళ్లలో కుదిరిన ఈ ఫ్యామిలీ ఎంటర్‌టైనర్ వీకెండ్‌లో చూడటానికి చక్కటి ఎంపికగా నిలిచింది. ప్రస్తుతం సోషల్ మీడియాలో ఎక్కడ చూసినా 'ప్యార్ ప్రేమా కళ్యాణం' గురించే చర్చ జరుగుతోంది. నెట్‌ఫ్లిక్స్ ట్రెండింగ్స్ లో మొదటి స్థానంలో నిలవడంతో ఈ సినిమా క్రేజ్ మరింత పెరిగింది. కుటుంబ సమేతంగా చూడదగ్గ మంచి క్లీన్ ఎంటర్‌టైనర్ కోసం వెతుకుతున్న సినీ ప్రియులకు ఈ చిత్రం చక్కటి అనుభూతిని పంచుతుంది.