Tollywood : వెయ్యి కోట్ల క్లబ్‌లో ‘రామాయణ’.. ఇప్పటివరకు 1000 కోట్లు దాటిన భారతీయ సినిమాలివే..
'రామాయణ' ప్రపంచవ్యాప్తంగా వెయ్యి కోట్ల రూపాయల వసూళ్లు దాటింది. నితేశ్ తివారీ దర్శకత్వంలో రణ్‌బీర్ కపూర్, సాయిపల్లవి, యశ్ నటించిన ఈ సినిమా నవంబర్ 5న విడుదలైంది. కేవలం ఎనిమిది రోజుల్లోనే ఈ మైలురాయిని చేరింది. ఇప్పటివరకు ఈ క్లబ్‌లో చేరిన సినిమాలు.. ఏ సినిమా ఎన్ని కోట్లు వసూలు చేసిందో తెలుసుకుందాం.
నితేశ్ తివారీ దర్శకత్వంలో రణ్‌బీర్ కపూర్, సాయిపల్లవి, యశ్ నటించిన 'రామాయణ' ప్రపంచవ్యాప్తంగా వెయ్యి కోట్ల రూపాయల వసూళ్లు దాటింది. నవంబర్ 5న విడుదలైన ఈ సినిమా కేవలం ఎనిమిది రోజుల్లోనే ఈ ఘనత సాధించింది. సాక్నిల్క్ అంచనాల ప్రకారం ఎనిమిదో రోజు నాటికి దీని ప్రపంచవ్యాప్త వసూళ్లు రూ.1,033.55 కోట్లుగా ఉన్నాయి.
వీటిలో భారత్ నెట్ వసూళ్లు రూ.564.60 కోట్లు. ఈ మైలురాయిని వేగంగా చేరిన మూడో భారతీయ సినిమా ఇది. 'పుష్ప 2', 'ధురంధర్ 2' ఏడు రోజుల్లోనే ఈ ఘనత సాధించాయి. 'బాహుబలి 2'కు పది నుంచి పదకొండు రోజులలో ఈ మైలురాయిని చేరుకుంది. రణ్‌బీర్ కెరీర్‌లో వెయ్యి కోట్లు దాటిన తొలి సినిమా కూడా ఇదే. ఆయన గత అత్యధిక వసూళ్ల చిత్రం 'యానిమల్' వసూళ్లను ఈ సినిమా దాటేసింది.
ఇప్పటివరకు వెయ్యి కోట్ల క్లబ్‌లో చేరిన సినిమాల్లో 'రామాయణ'ది పదకొండో స్థానం. ఈ జాబితాలో అగ్రస్థానంలో ఉన్నది ఆమిర్ ఖాన్ నటించిన 'దంగల్' (2016). సాక్నిల్క్ లెక్కల ప్రకారం దీని వసూళ్లు సుమారు రూ.2,070 కోట్లు. చైనా మార్కెట్‌లో వచ్చిన భారీ వసూళ్లు ఇందుకు ప్రధాన కారణం. రెండో స్థానంలో 'ధురంధర్ 2' (2026) ఉంది. దీని వసూళ్లు రూ.1,813 కోట్లు. మూడో స్థానం తెలుగు సినిమా 'బాహుబలి 2: ది కన్‌క్లూజన్'ది (2017). దీని వసూళ్లు రూ.1,788 కోట్లు. వెయ్యి కోట్ల క్లబ్‌ను భారతీయ సినిమాకు పరిచయం చేసింది ఈ సినిమానే.
నాలుగో స్థానంలో అల్లు అర్జున్ 'పుష్ప 2' (2024) ఉంది. దీని వసూళ్లు రూ.1,742 కోట్లు. ఐదో స్థానంలో 2025లో వచ్చిన మొదటి 'ధురంధర్' ఉంది. దీని వసూళ్లు రూ.1,307 కోట్లు. ఆ తర్వాత రాజమౌళి 'ఆర్ఆర్ఆర్' (2022) రూ.1,230 కోట్లతో ఆరో స్థానంలో నిలిచింది. యశ్ నటించిన కన్నడ చిత్రం 'కేజీఎఫ్ చాప్టర్ 2' (2022) రూ.1,215 కోట్లతో ఏడో స్థానంలో ఉంది. షారుఖ్ ఖాన్ సినిమాలు 'జవాన్' (2023) రూ.1,160 కోట్లతో ఎనిమిదో స్థానంలో, 'పఠాన్' (2023) రూ.1,055 కోట్లతో తొమ్మిదో స్థానంలో ఉన్నాయి.
ప్రభాస్ 'కల్కి 2898 ఏడీ' (2024) రూ.1,042 కోట్లతో పదో స్థానంలో ఉంది. అంటే 'రామాయణ'కు ముందు వెయ్యి కోట్లు దాటిన పది సినిమాల్లో నాలుగు తెలుగు చిత్రాలు ఉన్నాయి. నాలుగు హిందీ సినిమాలు, ఒక కన్నడ సినిమా కూడా ఉన్నాయి. 'ధురంధర్' ఫ్రాంచైజీలో రెండు సినిమాలూ వెయ్యి కోట్లు దాటడం మరో విశేషం. రామయాణం రెండో భాగం షూటింగ్ ఇప్పటికే 60 శాతం పూర్తైనట్లు సినిమాటోగ్రాఫర్ పంకజ్ కుమార్ చెప్పారు.