నెల రోజుల పాటు నిల్వ ఉండే కాకరకాయ కారం.. ఎలా తయారు చేయాలంటే?
కాకరకాయ అనగానే చాలా మందికి ముందుగా గుర్తొచ్చేది దాని చేదు గుణమే. అయితే, చేదు అస్సలు లేకుండా, పిల్లల నుండి పెద్దల వరకు అందరూ ఇష్టపడేలా రుచికరమైన కాకరకాయ కారం తయారు చేసుకోవచ్చు. ఈ స్పెషల్ రెసిపీ ఒక నెల రోజుల పాటు నిల్వ ఉంటుంది. కాకరకాయలో విటమిన్లు, ఖనిజాలు పుష్కలంగా ఉంటాయి.
కాకరకాయ అనగానే చాలా మందికి ముందుగా గుర్తొచ్చేది దాని చేదు గుణమే. అయితే, చేదు అస్సలు లేకుండా, పిల్లల నుండి పెద్దల వరకు అందరూ ఇష్టపడేలా రుచికరమైన కాకరకాయ కారం తయారు చేసుకోవచ్చు. ఈ స్పెషల్ రెసిపీ ఒక నెల రోజుల పాటు నిల్వ ఉంటుంది. కాకరకాయలో విటమిన్లు, ఖనిజాలు పుష్కలంగా ఉంటాయి. ఇది జీర్ణశక్తిని మెరుగుపరుస్తుంది, రక్తంలో చక్కెర స్థాయిలను నియంత్రిస్తుంది, ముఖ్యంగా కడుపులోని నులిపురుగులను నాశనం చేయడంలో సహాయపడుతుంది
కావలసిన పదార్థాలు: కాకరకాయలు – 1 కేజీ, ఉప్పు – రుచికి సరిపడా (నానబెట్టడానికి 1 టేబుల్ స్పూన్), నూనె – 5 టేబుల్ స్పూన్లు పసుపు – 1 టీ స్పూన్, వెల్లుల్లి – 1 పూర్తి పాయ (సుమారు 50 గ్రాములు), జీలకర్ర – 2 టీ స్పూన్లు, కొబ్బరి తురుము – 50 గ్రాములు కారం – 3-4 టేబుల్ స్పూన్లు ( రుచికి తగినట్లు)
ముందుగా 1 కేజీ కాకరకాయలను తీసుకోవాలి. వాటి పైన ఉన్న కొంచెం మందమైన పొట్టును మాత్రమే గీసి తొలగించాలి, పూర్తిగా చెక్కకూడదు. ఇది చేదును తగ్గించడంలో మొదటి మెట్టు. కాకరకాయలకు ఉన్న తొడిమలను కట్ చేసి, వాటిని సన్నగా, గుండ్రంగా ముక్కలుగా తరుగుకోవాలి. ఇలా సన్నగా తరగడం వల్ల ముక్కలు త్వరగా వేగి, చేదు లేకుండా ఉంటాయి.తరిగిన కాకరకాయ ముక్కలను ఒక గిన్నెలోకి తీసుకుని, అందులో ఒక టేబుల్ స్పూన్ ఉప్పు వేసి బాగా కలుపుకోవాలి. గిన్నెను ఎగరేసినా, లేదా చేతితో కలిపినా ముక్కలన్నింటికీ ఉప్పు పట్టాలి. ఇలా ఉప్పు పట్టించి పదిహేను నిమిషాల పాటు పక్కన ఉంచాలి. పదిహేను నిమిషాల తర్వాత, కాకరకాయ ముక్కల నుండి నీరు బయటకు వస్తుంది. ఈ నీటిని చేదు నీరు అంటారు. ముక్కలను గట్టిగా పిండి ఆ నీటిని పూర్తిగా తీసివేసి పక్కన పెట్టుకోవాలి. ఈ ప్రక్రియ చేదును పూర్తిగా తొలగిస్తుంది.
ఒక పాన్లో ఐదు టేబుల్ స్పూన్ల నూనె వేసి వేడి చేయాలి. నూనె వేడెక్కాక, పిండిన కాకరకాయ ముక్కలను వేసి బాగా కలుపుకోవాలి. స్టవ్ మంటను లో నుండి మీడియం ఫ్లేమ్లో ఉంచి, మూత పెట్టి ఐదు నిమిషాల పాటు మగ్గనివ్వాలి. మధ్యమధ్యలో కలుపుకుంటూ ఉండాలి. ఐదు నిమిషాల తర్వాత మూత తీసి, ఒక టీ స్పూన్ పసుపు కలపాలి. ముక్కలు పూర్తిగా వేగి, కరకరలాడే వరకు సుమారు 20 నిమిషాల పాటు వేయించుకోవాలి. హై ఫ్లేమ్లో పెడితే పైకి మాడి లోపల పచ్చిగా ఉంటాయి, కాబట్టి ఓపికగా లో-మీడియం ఫ్లేమ్లో వేయించుకోవాలి. కాకరకాయలు వేగేలోపు, ఒక మిక్సీ జార్లో ఒక పూర్తి వెల్లుల్లి పాయ, రెండు టీ స్పూన్ల జీలకర్ర, 50 గ్రాముల కొబ్బరి తురుము తీసుకుని మెత్తని పొడిలా చేసుకోవాలి.
కాకరకాయ ముక్కలు చక్కగా వేగిన తర్వాత, ముందుగా సిద్ధం చేసుకున్న వెల్లుల్లి-కొబ్బరి-జీలకర్ర మసాలా పొడిని వేసి బాగా కలపాలి. ఆ తరువాత మూడు నుండి నాలుగు టేబుల్ స్పూన్ల కారం పొడి వేసి బాగా మిక్స్ చేయాలి. కూర అడుగంటుతున్నట్లు అనిపిస్తే కొద్దిగా నూనె కలుపుకోవచ్చు. కారం పచ్చి వాసన పోయేలా మూత పెట్టి ఐదు నిమిషాల పాటు మగ్గనివ్వాలి. ఈ సమయంలో కారాన్ని ఒకసారి రుచి చూసి, అవసరమైతే ఉప్పును వేసుకోవాలి. ఉప్పు కరిగేందుకు కొద్దిసేపు వేడి చేయాలి. అంతే, ఎంతో రుచిగా ఉండే, అస్సలు చేదు లేని కాకరకాయ కారం రెడీ. దీనిని వేడి వేడి అన్నంలో, ఒక టీ స్పూన్ నెయ్యితో కలిపి తింటే చాలా రుచికరంగా ఉంటుంది. ఈ కారం నెల రోజుల పాటు నిల్వ ఉంటుంది.