జిగురు లేని కమ్మనైన బెండకాయ కొబ్బరి పచ్చడి.. రుచి చూస్తే వారంలో 2-3 రోజులు చేయాల్సిందే
బెండకాయలతో వేపుడు లేదా పులుసు చేయడం అందరికీ అలవాటే. కానీ చాలామంది బెండకాయతో రోటి పచ్చడి చేయడానికి వెనుకాడుతుంటారు; కారణం బెండకాయలోని జిగురు వల్ల పచ్చడి జారుడుగా ముద్దలా మారుతుందనే భయం. అయితే ఈ చిన్న వంటింటి చిట్కా పాటిస్తే చుక్క జిగురు లేకుండా అచ్చం పెళ్లిళ్ల విందుల్లో వడ్డించే కమ్మనైన 'బెండకాయ పచ్చికొబ్బరి పచ్చడి'ని తయారుచేసుకోవచ్చు.
కావలసిన పదార్థాలు: పావు కేజీ ముక్కలుగా తరిగిన లేత బెండకాయలు, అర చెక్క ముక్కలుగా తరిగిన పచ్చికొబ్బరి ముక్కలు, 2 టేబుల్ స్పూన్ల పల్లీలు, 7 నుండి 8 ఎండు మిరపకాయలు, 2 టేబుల్ స్పూన్ల తెల్ల నువ్వులు, 4 నుండి 5 వెల్లుల్లి రెబ్బలు, అర టీస్పూన్ జీలకర్ర, అర టీస్పూన్ మినప్పప్పు, 1 రెమ్మ చింతపండు, పావు టీస్పూన్ పసుపు, 1 రెమ్మ కరివేపాకు, కొద్దిగా తాజా కొత్తిమీర, పావు టీస్పూన్ ఇంగువ, రుచికి సరిపడా కల్లుప్పు, 3 టేబుల్ స్పూన్ల నువ్వుల నూనె
తయారీ విధానం: పావు కేజీ బెండకాయలను కడిగి తొడిమెలు తీసి మీడియం సైజు ముక్కలుగా కట్ చేసుకోవాలి. కట్ చేసిన ముక్కలను పొడి కాటన్ క్లాత్‌పై వేసి చేత్తో సున్నితంగా తుడవాలి. ఇలా తుడుచుకోవడం వల్ల బెండకాయల్లోని 90% జిగురు పూర్తిగా పోయి పచ్చడి పొడిపొడిగా వస్తుంది. అలాగే అర చెక్క పచ్చికొబ్బరిని చిన్న చిన్న ముక్కలుగా తరిగి సిద్ధం చేసుకోవాలి.
స్టవ్‌పై పాన్ పెట్టి 1 టేబుల్ స్పూన్ నూనె వేడిచేయాలి. నూనె కాగిన తర్వాత జీలకర్ర, మినప్పప్పు, 4-5 వెల్లుల్లి రెబ్బలు వేసి వేయించాలి. ఆ తర్వాత 2 టేబుల్ స్పూన్ల పల్లీలు వేసి లో ఫ్లేమ్‌పై మాడకుండా దోరగా వేయించాలి. పల్లీలు వేగాక 7-8 ఎండుమిరపకాయలు, పచ్చికొబ్బరి ముక్కలు, కరివేపాకు వేసి కొబ్బరి కాస్త రంగు మారే వరకు వేయించాలి. చివరగా 2 టేబుల్ స్పూన్ల తెల్ల నువ్వులు వేసి వెంటనే స్టవ్ ఆఫ్ చేయాలి. ఆ పాన్ వేడికే నువ్వులు వేగిపోతాయి; స్టవ్ ఆన్‌లో ఉంటే నువ్వులు మాడి చేదు వస్తాయి. ఈ మిశ్రమాన్ని ఒక బౌల్‌లోకి తీసుకుని చల్లారనివ్వాలి.
అదే పాన్‌లో 1 టేబుల్ స్పూన్ నువ్వుల నూనె వేడిచేసి, తుడిచి పెట్టుకున్న బెండకాయ ముక్కలు, కొద్దిగా పసుపు వేయాలి. ఇందులోనే 1 రెమ్మ చింతపండు, కొద్దిగా కొత్తిమీర వేసి లో ఫ్లేమ్‌పై బెండకాయ ముక్కలు మెత్తబడే వరకు వేయించి స్టవ్ ఆఫ్ చేసి చల్లారనివ్వాలి.
మిక్సీ జార్‌లో ముందుగా చల్లారిన కొబ్బరి-పల్లీల మిశ్రమం, బెండకాయలతో వేయించిన చింతపండు రెమ్మ, రుచికి సరిపడా కల్లుప్పు వేయాలి. కొద్దిగా నీళ్లు పోసి మొదట మెత్తటి పేస్ట్‌లా గ్రైండ్ చేసుకోవాలి. ఇప్పుడు ఈ కొబ్బరి పేస్ట్‌లో వేయించిన బెండకాయ ముక్కలను వేయాలి. మిక్సీని వేగంగా తిప్పకుండా.. పల్స్ మోడ్‌లో కేవలం రెండు సార్లు మాత్రమే కచ్చాపచ్చాగా బరకగా తిప్పి బౌల్‌లోకి తీసుకోవాలి.
పాన్‌లో 1 టేబుల్ స్పూన్ నువ్వుల నూనె వేడిచేసి పోపు దినుసులు వేయించాలి. పోపు వేగాక గ్రైండ్ చేసుకున్న బెండకాయ పచ్చడిని వేసి, పావు టీస్పూన్ ఇంగువ చల్లి నూనె పైకి తేలే వరకు లో ఫ్లేమ్‌పై నిమిషం పాటు మగ్గించి స్టవ్ ఆఫ్ చేయాలి. అంతే, నోరూరించే కమ్మనైన 'బెండకాయ పచ్చికొబ్బరి పచ్చడి' సిద్ధం! నువ్వుల నూనె వాడటం వల్ల రెండు మూడు రోజులు తాజాగా నిల్వ ఉండటమే కాకుండా.. వేడివేడి అన్నంలో నెయ్యి కలుపుకుని తింటుంటే అద్భుతమైన రుచితో కడుపు నిండిపోతుంది!