Fish Curry Recipe: ఘుమఘుమలాడే పక్కా పల్లెటూరి స్టైల్ చేపల పులుసు.. ఈ చల్లగాలికి తింటే అబ్బా..
ఆదివారం వచ్చిందంటే చాలు నాన్-వెజ్ ప్రియులకు నోరూరుతుంది. అందులోనూ వేడివేడి అన్నంలోకి చిక్కటి చేపల పులుసు ఉంటే ఆ మజానే వేరు! చాలామందికి చేపల కూర తినడం ఇష్టమే కానీ, దానిని క్లీన్ చేయడం, నీచు వాసన లేకుండా వండడం పెద్ద టాస్క్లా అనిపిస్తుంది. మార్కెట్ నుండి తెచ్చిన చేపలను ఇంటికి తెచ్చాక కొద్దిగా కరుకుగా ఉన్న రాయిపై వేసి రుద్దడం ద్వారా వాటిపై ఉండే నలుపుదనం, వదలకుండా ఉన్న పొలుసులు పూర్తిగా తొలగిపోతాయి. చేపల పులుసు నీచు వాసన రాకుండా ఉండాలంటే పొలుసులు లేకుండా చక్కగా కడగడం చాలా ముఖ్యం.
చేపలు కడిగిన తర్వాత ఒక అద్భుతమైన చిట్కా ఉంది. శుభ్రం చేసిన ముక్కల్లో ఒక కప్పు పెరుగు వేసి బాగా కలిపి పక్కన పెట్టుకోవాలి. పెరుగులో నానబెట్టడం వల్ల చేప ముక్క అస్సలు మెత్తబడదు, పైగా ఫ్రిజ్లో పెట్టకపోయినా ఐదు గంటల పాటు బయటే ఎంతో ఫ్రెష్గా ఉంటుంది. వండినప్పుడు ముక్క బిగుతుగా మారి కొబ్బరి ముక్కలా కరెక్ట్గా కుదురుతుంది.
ఆ తర్వాత ముక్కలకు ఉప్పు, రెండు చెంచాల కారం, కొద్దిగా పసుపు, ఫ్రెష్ అల్లం వెల్లుల్లి పేస్ట్ పట్టించి మ్యారినేట్ చేసుకోవాలి. ఈలోగా ఒక పెద్ద నిమ్మకాయ సైజు అంత చింతపండును నీళ్లలో నానబెట్టి ఉంచుకోవాలి. కూరకు కావలసిన ప్రత్యేక మసాలా కోసం ధనియాలు, దాల్చినచెక్క, లవంగాలు, కొద్దిగా జీలకర్ర దోరగా వేయించి, అందులో రెండు వెల్లుల్లిపాయలు వేసి మెత్తగా గ్రైండ్ చేసుకోవాలి. అలాగే గసగసాలు, చిన్న కొబ్బరి ముక్కను విడిగా పేస్ట్ చేసి పెట్టుకోవాలి.
ఇప్పుడు వెడల్పాటి గిన్నెలో నూనె వేడి చేసి, కొద్దిగా మెంతులు వేసి, ఆపై కచ్చాపచ్చాగా నూరిన ఉల్లిపాయ పేస్ట్, కరివేపాకు, పచ్చిమిర్చి వేసి వేయించాలి. అందులోనే అల్లం వెల్లుల్లి పేస్ట్, కాశ్మీరీ కారం వేయడం వల్ల కూరకు మంచి రంగు వస్తుంది. ఆ తర్వాత మ్యారినేట్ చేసిన చేప ముక్కలను ఒకదాని పక్కన ఒకటి సర్ది, కొద్దిగా నీళ్లు పోసి ఉడికించాలి.
చేపల పులుసు చిక్కగా రావాలంటే మొదట చింతపండు నుండి తీసిన చిక్కటి గుజ్జును మాత్రమే వేయాలి. ఎక్కువ నీళ్లు పోస్తే కూర పలచబడి రుచి తగ్గుతుంది. ముక్కలు మునిగేలా మాత్రమే నీళ్లు పోసి, ముందుగా సిద్ధం చేసుకున్న గసగసాల పేస్ట్, గరం మసాలా పొడిని కూడా వేసి పది నిమిషాలు ఉడికించాలి.
చేపల కూరలో ఎప్పుడూ గరిట పెట్టకూడదు, కేవలం గిన్నెను క్లాత్తో పట్టుకుని తిప్పాలి. చివరగా పచ్చిమిర్చి, కొత్తిమీర చల్లి దించేయాలి. స్టవ్ ఆఫ్ చేశాక నూనె పైకి తేలి పులుసు ముక్కలకు బాగా పడుతుంది. చేపల పులుసు వండిన వెంటనే తినడం కంటే, కొన్ని గంటలు ఆగి లేదా మరుసటి రోజు తింటే అమృతంలా ఉంటుంది!