వ్యభిచారం ముఠా గుట్టురట్టు చేసిన పోలీసులు.. స్వయంగా వివరాలు వెల్లడించిన ముఖ్యమంత్రి..

మద్యప్రదేశ్‌లో రాష్ట్రంలో వ్యభిచార ముఠాలు చెలరేగిపోతున్నాయి. బంగ్లాదేశ్ నుంచి పేద బాలికలు, యువతులను అక్రమంగా తీసుకొచ్చి కొంతమంది గుట్టుగా ఈ దందా నడిపిస్తున్నారు. ఉద్యోగాల పేరుతో యువతులకు గాలం వేసి ట్రాప్ చేసి, ఈ రొంపిలోకి దించుతున్నారు. అమాయాకులైన అమ్మాయిల ధన, మాన, ప్రాణాలతో ఆటలాడుతున్నారు. ఇది మెట్రో నగరాలకే పరిమితం కాకుండా ఓ చైన్ సిస్టమ్‌లా పాకి చిన్న చిన్న పట్టణాలకు పాకింది.

తాజాగా పోలీసులు ఇటీవల ఓ వ్యభిచార ముఠా గుట్టురట్టు చేశారు. ఈ ఘటనకు సంబంధించి ఏకంగా ఆ రాష్ట్ర ముఖ్యమంత్రి శివరాజ్ సింగ్ వివరాలను వెల్లడించారు. బంగ్లాదేశ్ నుంచి ఇండోర్ కు బాలికలను తీసుకొచ్చి వ్యభిచారాన్ని నిర్వహిస్తున్న ముఠాను పట్టుకున్నామని తెలిపారు. 21 మంది బంగ్లాదేశ్ బాలికలను రక్షించామని పేర్కొన్నారు. బాలికలకు డ్రగ్స్ ఇచ్చి, వారితో వ్యభిచారం చేయించారని, ఈ ముఠాకు చెందిన 9 మందిని అరెస్ట్ చేశామని వివరించారు. ఈ ముఠాలో నైజీరియా డ్రగ్ రాకెట్ పాత్ర కూడా ఉందంటున్నారు కొంతమంది. జిమ్ కోచ్‌లతో కుమ్మక్కై కొంతమంది డ్రగ్స్ కూడా సరఫరా చేస్తున్నారని ఆరోపించారు. ఇలాంటి సంఘ విద్రోహ పనులు చేస్తే సహించబోమని ఈ సందర్భంగా సీఎం హెచ్చరించారు.