Heart Health Study: గుండె ఆరోగ్యంగా ఉండాలంటే పరిగెత్తడం మంచిదా, ఈత కొట్టడం మంచిదా?
మనం ఆరోగ్యంగా ఉండటానికి వ్యాయామం చాలా ముఖ్యం. చాలామంది గుండె ఆరోగ్యానికి పరుగెత్తడం (Running) మంచిదా లేక ఈత కొట్టడం (Swimming) మంచిదా అని తరచుగా సందేహిస్తుంటారు. ఫిట్నెస్ను పెంచడంలో ఈ రెండు వ్యాయామాలు అద్భుతమైనవే అయినప్పటికీ, గుండెను బలోపేతం చేయడంలో ఈత కొట్టడం కీలకమని తాజాగా జరిగిన ఒక కొత్త అధ్యయనం వెల్లడించింది.
గుండె ఆరోగ్యానికి ఏ వ్యాయామం ఉత్తమమైనది అనే ప్రశ్నకు ఫెడరల్ యూనివర్శిటీ ఆఫ్ సావో పాలో శాస్త్రవేత్తలు ఒక ఆసక్తికరమైన సమాధానాన్ని కనుగొన్నారు. పరిగెత్తడం ఈత కొట్టడం రెండూ శరీర ఫిట్నెస్ను పెంచుతాయి. కానీ గుండె నిర్మాణం, పనితీరును మెరుగుపరచడంలో ఈత కొట్టడం పరుగు కంటే ఎక్కువ ప్రభావవంతంగా ఉంటుందని ఈ అధ్యయనం పేర్కొంది. ఈత కొట్టడం వల్ల గుండె మరింత బలంగా, సమర్థంగా పనిచేయడానికి అవసరమైన మార్పులు లోతైన జీవశాస్త్ర స్థాయిలో జరుగుతాయని నిపుణులు వివరిస్తున్నారు.
అధ్యయనం వెల్లడించిన కీలక అంశాలు
శాస్త్రవేత్తలు ఎలుకలపై ఎనిమిది వారాల పాటు ఈ పరిశోధన నిర్వహించారు. ఎలుకలను మూడు సమూహాలుగా విభజించి – వ్యాయామం చేయనివి, పరుగెత్తేవి ఈత కొట్టేవిగా విడదీశారు. శరీరంలో ఆక్సిజన్ను ఎలా ఉపయోగిస్తారో తెలిపే ‘VO₂ గరిష్ట విలువను’ (VO₂ Max) కొలమానంగా తీసుకున్నారు.
గుండె నిర్మాణంలో మార్పులు
పరుగు ఈత సమూహాలు రెండూ తమ ఫిట్నెస్ స్థాయిలను 5 శాతానికి పైగా మెరుగుపరుచుకున్నాయి. అయితే, గుండె పరిమాణం రక్తాన్ని పంప్ చేసే ‘ఎడమ జఠరిక’ (Left Ventricle) ద్రవ్యరాశి పెరుగుదల కేవలం ఈత కొట్టిన సమూహంలో మాత్రమే కనిపించింది. పరుగు సమూహంలో అటువంటి నిర్మాణపరమైన మార్పులు కనిపించలేదు.
అణు స్థాయి మార్పులు (MicroRNAs)
ఈ అధ్యయనంలో అత్యంత కీలకమైన అంశం మైక్రోఆర్ఎన్ఏలు. ఇవి జన్యువుల పనితీరును నియంత్రిస్తాయి. ఈత కొట్టడం వల్ల ఈ అణువులపై ప్రభావం పడి, గుండె కణాల పెరుగుదల, కొత్త రక్తనాళాల ఏర్పాటు గుండె సంకోచ సామర్థ్యం వంటి ప్రక్రియలు మరింత మెరుగ్గా జరిగాయి.
అన్ని ఏరోబిక్ వ్యాయామాలు గుండెపై ఒకే విధమైన ప్రభావాన్ని చూపుతాయనే సాధారణ నమ్మకాన్ని ఈ అధ్యయనం సవాలు చేస్తోంది. ఏ వ్యాయామమైనా గుండె ఆరోగ్యాన్ని మెరుగుపరుస్తుంది, కానీ ఒక ప్రత్యేకమైన స్థాయికి గుండెను బలోపేతం చేయడంలో ఈత కొట్టడం మంచి ఫలితాలను ఇస్తుందని శాస్త్రవేత్తలు అభిప్రాయపడుతున్నారు.
గమనిక: ఈ సమాచారం ‘సైంటిఫిక్ రిపోర్ట్స్’ జర్నల్లో ప్రచురితమైన పరిశోధన ఆరోగ్య నిపుణుల విశ్లేషణల ఆధారంగా రూపొందించబడింది. ఇది కేవలం అవగాహన కోసం మాత్రమే. గుండెకు సంబంధించిన సమస్యలు ఉన్నవారు ఎటువంటి వ్యాయామం మొదలుపెట్టే ముందు తప్పనిసరిగా వైద్యుని సలహా తీసుకోవాలి.