Viral Video: సిలిండర్లో గ్యాస్ ఎంత ఉందో తెలుసుకోవడం ఇక చిటికెలో పని.. 2 నిమిషాల ట్రిక్ చూసేయండి..
వంట మధ్యలో గ్యాస్ ఆగిపోతే ఆ టెన్షన్ మామూలుగా ఉండదు. ముఖ్యంగా గెస్టులు వచ్చినప్పుడో లేదా ఆఫీసు హడావిడిలో ఉన్నప్పుడో ఈ సమస్య వస్తే ఏం చేయాలో అర్థం కాదు. మరి సిలిండర్లో గ్యాస్ ఎంత ఉందో తెలుసుకోవడం ఎలా? అయితే ఈ ఒక్క చిన్న ట్రిక్ తెలిస్తే.. కేవలం రెండు నిమిషాల్లో సిలిండర్లో గ్యాస్ ఎంత ఉందో ఈజీగా తెలుసుకోవచ్చు..
ప్రతి ఇంట్లో వంటగదిలో గ్యాస్ సిలిండర్ ఒక ముఖ్యమైన వస్తువు. అయితే సిలిండర్ ఎప్పుడు ఖాళీ అవుతుందో ముందే అంచనా వేయడం చాలామందికి పెద్ద సవాలు. ముఖ్యంగా అత్యవసరంగా వంట చేస్తున్నప్పుడు లేదా అతిథులు వచ్చినప్పుడు అకస్మాత్తుగా గ్యాస్ ఆగిపోతే ఆ ఇబ్బంది వర్ణనాతీతం. పారదర్శకత లేని ఈ ఇనుప సిలిండర్లలో గ్యాస్ స్థాయిని కనిపెట్టడం ఎలా అని ఆలోచిస్తున్నారా? అయితే ఈ సింపుల్ చిట్కాలు మీకోసమే..
తడి గుడ్డతో మ్యాజిక్ ట్రిక్
- ఇన్స్టాగ్రామ్లో వైరల్ అవుతున్న ఒక చిన్న ఐడియా ద్వారా నిమిషాల్లో గ్యాస్ స్థాయిని తెలుసుకోవచ్చు.
- ముందుగా ఒక గుడ్డను నీటిలో బాగా నానబెట్టి, సిలిండర్ చుట్టూ తడి చేయండి.
- రెండు నిమిషాల తర్వాత సిలిండర్ను పరిశీలించండి. సిలిండర్ పైభాగం త్వరగా ఎండిపోతుంది, కానీ గ్యాస్ ఉన్న భాగం మాత్రం తడిగానే ఉంటుంది.
- సిలిండర్ లోపల గ్యాస్ ద్రవరూపంలో ఉండి చాలా చల్లగా ఉంటుంది. అందుకే గ్యాస్ ఉన్న భాగంపై తేమ త్వరగా ఆరిపోదు. ఎక్కడైతే నీరు ఆరిపోయి పొడిగా కనిపిస్తుందో, అక్కడ గ్యాస్ లేదని అర్థం.
మరికొన్ని సులభమైన మార్గాలు
వేడి నీటి ప్రయోగం: ఒక గ్లాసు నీటిని సిలిండర్ పైనుంచి నెమ్మదిగా పోయండి. ఆ తర్వాత సిలిండర్ను పైనుంచి కిందకు చేత్తో తాకండి. పైన వేడిగా ఉన్నా, ఎక్కడైతే చల్లగా అనిపిస్తుందో అక్కడ గ్యాస్ ఉన్నట్లు లెక్క.
బరువు తనిఖీ: గ్యాస్ సిలిండర్ మీద ఖాళీ బరువు ముద్రించి ఉంటుంది. ఉదాహరణకు ఖాళీ సిలిండర్ బరువు 15.5 కేజీలు అనుకుందాం. మీరు తూకం వేసినప్పుడు 20 కేజీలు వస్తే అందులో సుమారు 4.5 కేజీల గ్యాస్ ఉన్నట్లు అర్థం. సాధారణంగా కొత్త సిలిండర్లో 14.2 కిలోల గ్యాస్ ఉంటుంది. సిలిండర్ స్థాయిని తనిఖీ చేసేటప్పుడు రెగ్యులేటర్ ఆఫ్లో ఉండేలా చూసుకోండి.
గ్యాస్ అయిపోవడానికి కనీసం రెండు మూడు రోజుల ముందే ఈ పద్ధతుల ద్వారా చెక్ చేసుకుంటే, ముందే సిలిండర్ బుక్ చేసుకునే వీలుంటుంది. తద్వారా వంట మధ్యలో వచ్చే అంతరాయాలను నివారించవచ్చు.