హైబీపీని చిటికెలో తగ్గించే పండు.. రోజూ తింటే ఎన్ని లాభాలో..
హై బీపీ.. ఎలాంటి లక్షణాలు లేకుండా ప్రాణాలు తీసే సైలెంట్ కిల్లర్. నేటి రోజుల్లో యువతను సైతం కలవరపెడుతున్న ఈ సమస్యను ఖరీదైన మందులు లేకుండా రోజూ మనం తినే ఒక సాధారణ పండుతోనే కంట్రోల్ చేయవచ్చని డాక్టర్లు చెబుతున్నారు. అరటిపండు తింటే బీపీ నిజంగా తగ్గుతుందా? గుండెను కాపాడే ఆ పోషకాలు ఏంటి? పరగడుపున ఎందుకు తినకూడదు? అనే విషయాలు తెలుసుకుందాం..
మారుతున్న జీవనశైలి, తీవ్ర మానసిక ఒత్తిడి, ఆహారపు అలవాట్ల కారణంగా ప్రస్తుతం అధిక రక్తపోటు అనేది సర్వసాధారణమైన సమస్యగా మారింది. ఎటువంటి ముందస్తు హెచ్చరికలు లేకుండా శరీరంలో తిష్టవేసే లక్షణం ఉండటంతో దీనిని వైద్య పరిభాషలో సైలెంట్ కిల్లర్ అని పిలుస్తారు. గతంలో కేవలం వయసు పైబడిన వారిలోనే కనిపించే ఈ సమస్య, ఇప్పుడు యువతలోనూ వేగంగా విస్తరిస్తోంది. అయితే ఖరీదైన మందుల జోలికి వెళ్లకుండా రోజువారీ ఆహారంలో తీసుకునే సాధారణ పండ్లతోనే బీపీని నియంత్రించవచ్చని ప్రముఖ వైద్యులు డాక్టర్ సలీం జైదీ సూచిస్తున్నారు. ముఖ్యంగా అరటిపండు అధిక రక్తపోటును అదుపులో ఉంచడానికి అద్భుతమైన సహజ పరిష్కారంగా పనిచేస్తుందని ఆయన స్పష్టం చేశారు.
బీపీని అరటిపండు ఎలా అదుపు చేస్తుంది?
వైద్య నిపుణుల ప్రకారం.. రక్తపోటు స్థాయిలను నియంత్రించడంలో అరటిపండులోని పోషకాలు అత్యంత కీలకంగా వ్యవహరిస్తాయి.
పొటాషియం ప్రభావం: ఆహారంలో ఉప్పు శాతం పెరిగినప్పుడు రక్తపోటు అకస్మాత్తుగా పెరుగుతుంది. అరటిపండ్లలో పొటాషియం పుష్కలంగా లభిస్తుంది. ఈ పొటాషియం శరీరంలోని అదనపు సోడియం ప్రభావాన్ని తగ్గించడమే కాకుండా, మూత్రం ద్వారా సోడియం బయటకు వెళ్లిపోయేలా తోడ్పడుతుంది.
రక్తనాళాల్లో ఒత్తిడి తగ్గింపు: పొటాషియం రక్తనాళాల గోడలను విశ్రాంత పరుస్తుంది. ఫలితంగా రక్తప్రసరణ సజావుగా సాగి, రక్తాన్ని పంప్ చేసే క్రమంలో గుండెపై పడే అధిక భారం తగ్గుతుంది.
మెగ్నీషియం, పీచుపదార్థాలు: అరటిపండులో లభించే మెగ్నీషియం నరాలను శాంతపరిచి మానసిక ప్రశాంతతను ఇవ్వడంతో పాటు రక్తపోటు అదుపులో ఉండేలా చూస్తుంది. ఇందులో ఉండే పీచుపదార్థం జీర్ణక్రియను మెరుగుపరుస్తుంది.
అరటిపండు తినడానికి సరైన సమయం ఏది?
ఏ ఆహారమైనా సరైన పద్ధతిలో, సరైన సమయంలో తీసుకున్నప్పుడే పూర్తిస్థాయి ఆరోగ్య ప్రయోజనాలు దక్కుతాయని డాక్టర్ సలీం జైదీ పేర్కొన్నారు.
సరైన సమయం: ఉదయం టిఫిన్ ముగించిన ఒకటి లేదా రెండు గంటల వ్యవధి తర్వాత అరటిపండు తినడం అత్యంత మంచిది. ఈ సమయంలో తీసుకోవడం వల్ల శరీరానికి అవసరమైన పోషకాలు సంపూర్ణంగా గ్రహించబడతాయి, అలాగే రోజంతా కావాల్సిన శక్తి లభిస్తుంది.
ఖాళీ కడుపుతో తినకూడదు: ఉదయం నిద్రలేవగానే పరగడుపున అరటిపండును అస్సలు తినకూడదని వైద్యులు హెచ్చరిస్తున్నారు. ఖాళీ కడుపుతో తింటే రక్తంలో మెగ్నీషియం, పొటాషియం స్థాయిలు ఆకస్మికంగా పెరిగి సమతుల్యత దెబ్బతింటుంది. దీనివల్ల కడుపులో అసౌకర్యం, అజీర్తి కలగడమే కాకుండా రక్తంలో షుగర్ స్థాయిల్లో హెచ్చుతగ్గులు ఏర్పడే ప్రమాదం ఉంది.
సహజసిద్ధమైన ఆహార మార్పులతో పాటు క్రమం తప్పకుండా వ్యాయామం చేయడం ద్వారా అధిక రక్తపోటు బారిన పడకుండా ఆరోగ్యాన్ని కాపాడుకోవచ్చని నిపుణులు సూచిస్తున్నారు.
(గమనిక: ఈ సమాచారం కేవలం అవగాహన కోసం మాత్రమే.. ముఖ్యమైన ఆరోగ్య సమస్యలు లేదా దీర్ఘకాలిక వ్యాధుల విషయంలో ఎల్లప్పుడూ అర్హులైన వైద్య నిపుణులను సంప్రదించి తగిన సలహాలు తీసుకోవడం మంచిది.)