Moonglet Recipe: గుడ్లు తినని వారికి ఇది వరం.. వెన్న సువాసనతో అదిరిపోయే ‘వెజ్ ఆమ్లెట్’ సీక్రెట్ ఇదే!

Moonglet Recipe

పెసరపప్పులోని పోషకాలు, రంగురంగుల కూరగాయల కలయిక, వెన్న కమ్మని వాసన.. వెరసి ‘మూంగ్లెట్’. తక్కువ సమయంలో, ఇంట్లో ఉన్న పదార్థాలతోనే రెస్టారెంట్ స్థాయి రుచిని ఎలా పొందాలో ఇప్పుడు చూద్దాం. పిండిని రుబ్బే విధానం నుండి, అది ప్లఫీగా రావడానికి వాడే చిన్న చిన్న చిట్కాల వరకు అన్నీ ఇక్కడ సవివరంగా ఉన్నాయి. ఆలస్యం చేయకుండా ఈ హై-ప్రోటీన్ వెజిటేబుల్ మూంగ్లెట్ తయారీ విధానంలోకి వెళ్ళిపోదాం.

కావలసిన పదార్థాలు:

పెసరపప్పు (Moong Dal) – 1 కప్పు

తరిగిన క్యారెట్, ఉల్లిపాయ, బెల్ పెప్పర్, టమోటా – ఒక్కొక్కటి 2 టేబుల్ స్పూన్లు

పచ్చిమిర్చి – 2, అల్లం ముక్క

పసుపు, జీలకర్ర, బేకింగ్ సోడా

వెన్న, నూనె – వేయించడానికి

ఉప్పు, కొత్తిమీర తరుగు – తగినంత

తయారీ విధానం:

నానబెట్టడం, రుబ్బడం

పెసరపప్పును 2 గంటలు నానబెట్టి, నీరు లేకుండా మిక్సీలో వేయాలి. 2-3 స్పూన్ల నీరు పోసి ఇడ్లీ పిండి కంటే కొంచెం గట్టిగా రుబ్బుకోవాలి. పిండి మరీ నీరుగా ఉంటే మూంగ్లెట్ సరిగ్గా రాదు.

పిండిని కలిపే టెక్నిక్

రుబ్బిన పిండిని ఒక గిన్నెలోకి తీసుకుని, ఒకే దిశలో 5 నిమిషాల పాటు బాగా కలపాలి. దీనివల్ల పిండిలోకి గాలి చేరి, మూంగ్లెట్ చాలా మృదువుగా, స్పాంజిలా వస్తుంది.

కూరగాయల కలయిక

ఇప్పుడు ఈ పిండిలో పసుపు, జీలకర్ర, ఉప్పు తరిగిన కూరగాయలన్నీ వేసి బాగా కలుపుకోవాలి.

బేకింగ్ సోడా మ్యాజిక్

కాల్చే ముందు మాత్రమే పిండిలో బేకింగ్ సోడా వేయాలి. సోడా వేయగానే పిండి నురుగులా వస్తుంది, అప్పుడు మెల్లగా కలిపి వెంటనే పెనంపై వేయాలి.

కాల్చే విధానం

పాన్ వేడి చేసి వెన్న, నూనె వేసి పిండిని మందపాటి పొరలా పోయాలి. పైన కొత్తిమీర చల్లి మూత పెట్టి మీడియం మంట మీద కాల్చాలి. ఒక వైపు వేగాక తిప్పి రెండో వైపు కూడా కాల్చాలి.

వెన్న సీక్రెట్

తిప్పిన తర్వాత మధ్యలో ‘X’ లాగా చిన్న కోత పెట్టి అక్కడ కొంచెం వెన్న వేయండి. ఆ వెన్న లోపలికి వెళ్లి మూంగ్లెట్ అద్భుతమైన రుచిని, క్రిస్పీ టెక్స్చర్‌ను ఇస్తుంది.