Garlic Egg Rice: ఫ్రైడ్ రైస్ కి గుడ్ బై.. ఇంట్లోనే ఘుమఘుమలాడే గార్లిక్ ఎగ్ రైస్! రుచి చూస్తే ఫిదా అవుతారు!

Garlic Egg Rice Recipe

ఆరోగ్యానికి ఆరోగ్యం, రుచికి రుచి.. అదే ఈ ‘గార్లిక్ ఎగ్ రైస్’. వెల్లుల్లి తింటే రోగనిరోధక శక్తి పెరుగుతుందని మనందరికీ తెలుసు, కానీ దానిని గుడ్డుతో కలిపి ఇలా ఫ్రైడ్ రైస్ లా చేస్తే పిల్లలు కూడా ఇష్టంగా తింటారు. తక్కువ ఖర్చుతో, తక్కువ సమయంలో రెడీ అయ్యే ఈ పోషక ఆహారం ఎలా చేయాలో ఇప్పుడు చూద్దాం.

కావలసిన పదార్థాలు:

మిగిలిపోయిన అన్నం – 2 కప్పులు

గుడ్లు – 2 లేదా 3

వెల్లుల్లి రెబ్బలు – 8 నుండి 10 (సన్నగా తరిగినవి)

ఉల్లిపాయ – 1 (సన్నగా తరిగినది)

పచ్చిమిర్చి – 2 (పొడవుగా తరిగినవి)

ఆవనూనె లేదా రిఫైన్డ్ ఆయిల్ – 2 టేబుల్ స్పూన్లు

సోయా సాస్ – 1 టీస్పూన్

మిరియాల పొడి – అర టీస్పూన్

ఉప్పు – రుచికి సరిపడా

కొత్తిమీర లేదా ఉల్లికాడలు – గార్నిష్ కోసం

తయారీ విధానం :

స్టవ్ మీద పాన్ పెట్టి నూనె వేయండి. నూనె వేడయ్యాక సన్నగా తరిగిన వెల్లుల్లి వేసి బంగారు రంగులోకి వచ్చే వరకు వేయించండి. వెల్లుల్లి సువాసన ఈ వంటకానికి ప్రాణం.

ఇప్పుడు ఉల్లిపాయ ముక్కలు, పచ్చిమిర్చి వేసి దోరగా వేయించాలి.

ఉల్లిపాయలు వేగాక, గుడ్లను పగులగొట్టి వేయండి. అందులోనే ఉప్పు, మిరియాల పొడి వేసి గుడ్డు ముక్కలు అయ్యే వరకు కలపాలి.

ఇప్పుడు మిగిలిన అన్నాన్ని వేసి మంటను హై ఫ్లేమ్‌లో ఉంచి బాగా కలపండి. చివరగా సోయా సాస్ వేసి మరో రెండు నిమిషాలు టాస్ చేయండి.

చివరగా సన్నగా తరిగిన కొత్తిమీర లేదా ఉల్లికాడలు చల్లుకుంటే వేడివేడి వెల్లుల్లి ఎగ్ రైస్ సిద్ధం!