Chicken Recipe: చికెన్లో ఈ పార్ట్కు సెపరేట్ ఫ్యాన్ బేస్.. ఇలా ఫ్రై చేస్తే ప్లేట్ కూడా వదలరు!
సాధారణంగా చికెన్ వంటకాల్లో కందనకాయ (గిజార్డ్)ను చాలామంది ఇష్టపడరు. దీనిని పక్కన పెట్టేయడం లేదా పారేయడం చేస్తుంటారు. అయితే, సరైన పద్ధతిలో వండితే దీని రుచి మామూలుగా ఉండదు. అందరినీ ఆశ్చర్యపరిచే విధంగా, నమ్మశక్యం కాని రుచితో ఉండే ఈ వంటకం గురించి చాలామందికి తెలియదు. ఒకసారి ఇలా కందనకాయ ఫ్రైని ప్రయత్నిస్తే, ఆ రుచికి ప్లేట్ కూడా వదిలిపెట్టకుండా లాగించేస్తారు. మరి ఈ ప్రత్యేకమైన, నోరూరించే వంటకాన్ని ఎలా తయారుచేయాలో చూద్దాం.
చాలామంది చికెన్ వంటకాల్లో లివర్, ఇతర భాగాలు ఇష్టపడతారు. కానీ కందనకాయ (గిజార్డ్)ను మాత్రం పక్కన పెడుతుంటారు. అయితే సరైన పద్ధతిలో ఈ కందనకాయలను వండితే వాటి రుచి అద్భుతంగా ఉంటుంది. వహ్వా అని మెచ్చుకోవాల్సిందే. సాధారణంగా పులుసు, ఫ్రై, ఇగురు వంటి వాటితో పాటు కందనకాయల ఫ్రై చాలామందికి కొత్తగా అనిపించవచ్చు. కందనకాయలతోనే ప్రత్యేకంగా ఫ్రై చేసుకునే విధానాన్ని ఇక్కడ తెలుసుకుందాం.
కావాల్సిన పదార్థాలు:
కందనకాయలు: 1 కిలో
ఉల్లిపాయలు: 4 (మీడియం సైజు)
పచ్చిమిర్చి: 10
టమాటాలు: 4
అల్లం-వెల్లుల్లి పేస్ట్: 1.5 సర్వింగ్ స్పూన్
పసుపు: 1 టీస్పూన్
కారం: 4 టేబుల్ స్పూన్లు
ధనియాల పొడి: 1 టేబుల్ స్పూన్
జీలకర్ర పొడి: 1 టేబుల్ స్పూన్
గరం మసాలా: 1 టేబుల్ స్పూన్
కరివేపాకు: కొద్దిగా
కొత్తిమీర: కొద్దిగా
నూనె: 50 గ్రాములు
ఉప్పు: రుచికి సరిపడా
తయారీ విధానం:
ముందుగా కందనకాయలను శుభ్రం చేసి, వాటి పైన ఉన్న పొరను తీసి చిన్న ముక్కలుగా కట్ చేసుకోవాలి.
పొయ్యిపై కళాయి పెట్టి, నూనె వేడి చేయాలి. నూనె వేడెక్కిన తర్వాత, చిన్నగా తరిగిన ఉల్లిపాయ ముక్కలు వేసి దోరగా వేయించాలి.
ఉల్లిపాయలు వేగిన తర్వాత పసుపు, అల్లం-వెల్లుల్లి పేస్ట్ వేసి పచ్చి వాసన పోయే వరకు వేగనివ్వాలి.
తర్వాత కందనకాయ ముక్కలు వేసి బాగా కలపాలి. కూర మాడిపోకుండా చూసుకోవాలి. తర్వాత రుచికి సరిపడా ఉప్పు వేసి, మూత పెట్టి ఉడికించాలి. మధ్య మధ్యలో కూరను కలుపుతూ ఉండాలి.
కందనకాయలు ఉడికిన తర్వాత టమాటా ముక్కలు వేసి బాగా కలపాలి. ఆ తర్వాత కారం, ధనియాల పొడి, జీలకర్ర పొడి వేసి మరోసారి కలపాలి.
మళ్లీ మూత పెట్టి ఉడికించాలి. టమాటాల నుంచి వచ్చిన నీరు పూర్తిగా ఆవిరై, కూర దగ్గరగా అయ్యేవరకు ఉడికించాలి. మధ్య మధ్యలో కలుపుతూ ఉండాలి.
చివరగా ముందుగా చీల్చుకున్న పచ్చిమిర్చి, కరివేపాకు వేసి బాగా ఫ్రై చేయాలి. కూర కాస్త నల్లగా అయ్యేవరకు వేయించాలి.
గరం మసాలా వేసి మరోసారి కలపాలి. ఆ తర్వాత కొత్తిమీరతో గార్నిష్ చేసి దించేయాలి.
అంతే, ఎంతో రుచికరమైన, నోరూరించే కందనకాయ ఫ్రై ఇప్పుడు సిద్ధం.