
ఈ నీళ్ల తయారీలో జీలకర్ర, ఇంగువతో పెట్టే తాలింపు ప్రత్యేకమైన సువాసనను, రుచిని అందిస్తుంది. ఎక్కువ ఖర్చు లేకుండా, ప్రత్యేకమైన పదార్థాలు అవసరం లేకుండానే బండి దగ్గర దొరికే గోల్గప్పా నీళ్ల తరహా రుచిని ఇంట్లోనే పొందవచ్చు. మరి ఇంకెందుకు ఆలస్యం.. కావలసిన పదార్థాలు, తయారీ విధానం తెలుసుకుందాం.
పుదీనా ఆకులు – ఒక కప్పు
కొత్తిమీర – ఒక కప్పు
పచ్చిమిర్చి – 2 నుంచి 3
అల్లం – చిన్న ముక్క
చింతపండు – చిన్న నిమ్మకాయ పరిమాణంలో
నిమ్మకాయ – 1 పెద్దది
నీళ్లు – 500 మి.లీ.
తెల్ల ఉప్పు – తగినంత
నల్ల ఉప్పు – అర టీస్పూన్
చాట్ మసాలా – 1 టీస్పూన్
ఆమ్చూర్ పొడి – అర టీస్పూన్
ఇంగువ – చిటికెడు
కారం పొడి – కొద్దిగా (ఐచ్ఛికం)
బెల్లం – కొద్దిగా (అవసరమైతే)
తాలింపు కోసం:
నూనె – 1 టీస్పూన్
జీలకర్ర – అర టీస్పూన్
ఇంగువ – చిటికెడు
ముందుగా పుదీనా ఆకులు, కొత్తిమీరను శుభ్రంగా కడిగి తీసుకోవాలి. వీటితో పాటు పచ్చిమిర్చి, అల్లం ముక్కలను మిక్సీ జార్లో వేసి కొద్దిగా నీళ్లు పోసి మెత్తని పేస్ట్లా తయారు చేసుకోవాలి.
మరోవైపు చింతపండును కొద్దిసేపు నీటిలో నానబెట్టి గుజ్జును తీసుకోవాలి. ఇప్పుడు ఒక పెద్ద గిన్నెలో సుమారు 500 మి.లీ. నీళ్లు తీసుకుని అందులో తెల్ల ఉప్పు, నల్ల ఉప్పు, చాట్ మసాలా, ఆమ్చూర్ పొడి, ఇంగువ వేసి బాగా కలపాలి.
తర్వాత ఒక పెద్ద నిమ్మకాయ రసాన్ని, ముందుగా సిద్ధం చేసుకున్న చింతపండు గుజ్జును అందులో కలపాలి. ఇప్పుడు పుదీనా, కొత్తిమీర పేస్ట్ను కూడా వేసి బాగా కలపాలి. మీకు మరింత కారం కావాలనిపిస్తే కొద్దిగా కారం పొడి కలుపుకోవచ్చు. పులుపు ఎక్కువగా అనిపిస్తే కొద్దిగా బెల్లం వేసి రుచిని సరిచేసుకోవచ్చు.
ఇప్పుడు చిన్న బాణలిలో నూనె వేడి చేసి అందులో జీలకర్ర వేయాలి. అది వేగిన తర్వాత చిటికెడు ఇంగువ వేసి స్టవ్ ఆపేయాలి. ఈ తాలింపును గోల్గప్పా నీళ్లలో కలపాలి. జీలకర్ర, ఇంగువ సువాసనతో నీళ్ల రుచి మరింత పెరుగుతుంది.
చివరగా ఈ నీళ్లను ఫ్రిజ్లో కొద్దిసేపు చల్లబరచాలి. కావాలనుకుంటే కొన్ని ఐస్ ముక్కలు, కొద్దిగా బూందీ వేసుకోవచ్చు. అంతే.. పుల్లగా, కారంగా, చటపటలాడించే గోల్గప్పా నీళ్లు సిద్ధం. వీటిని గోల్గప్పాల్లో పోసుకుని ఆలుగడ్డ లేదా శనగల స్టఫింగ్తో కలిపి తింటే ఆ రుచే వేరు!
గమనిక: పులుపు, కారం, ఉప్పు మీ అభిరుచికి అనుగుణంగా సర్దుబాటు చేసుకోవచ్చు. నీళ్లను తయారు చేసేటప్పుడు శుభ్రమైన తాగునీరు, శుభ్రమైన పాత్రలు ఉపయోగించాలి. తయారుచేసిన నీళ్లను ఫ్రిజ్లో ఉంచి తాజాగా ఉన్నప్పుడే తీసుకోవడం మంచిది.