ఇలా కనిపిస్తే మటన్ను అస్సలు కొనొద్దు.. ఫ్రెష్ మాంసాన్ని ఎలా గుర్తించాలో తెలుసా..?
ఆదివారం వచ్చిందంటే చాలు.. చాలా ఇళ్లలో మటన్ ఘుమఘుమలాడుతుంది. అయితే మార్కెట్కు వెళ్లి మటన్ కొనేటప్పుడు అది నిజంగా ఫ్రెష్గా ఉందా? లేక రోజుల తరబడి నిల్వ ఉంచిన మాంసమా? అన్నది వ్యాపారి మాటలను బట్టి మాత్రమే నమ్ముతున్నారా? అయితే జాగ్రత్త.. షాపులో మోసపోకుండా నాణ్యమైన, తాజా మటన్ ఎలా సెలక్ట్ చేసుకోవాలో ఈ స్టోరీలో తెలుసుకుందాం..
ఆదివారమైనా, ఇంటికి చుట్టాలు వచ్చినా ప్లేట్లో మటన్ ముక్క ఉండాల్సిందే. మటన్ కర్రీ నుంచి బిర్యానీ వరకు ఎన్నో రకాల ఘుమఘుమలాడే వంటకాలు సిద్ధమవుతాయి. అయితే వంటకం ఎంత రుచిగా ఉండాలనేది మనం కొనుగోలు చేసే మటన్ నాణ్యత, తాజాదనంపైనే ఆధారపడి ఉంటుంది. చాలా సందర్భాల్లో మటన్ దుకాణానికి వెళ్లినప్పుడు వ్యాపారులు చెప్పిన మాటలు నమ్మి కొనేస్తుంటారు. కానీ కొన్ని చిన్నపాటి విషయాలు పరిశీలించడం ద్వారా తాజాగా ఉన్న నాణ్యమైన మటన్ను సులభంగా గుర్తించవచ్చు.
తాజా మటన్ను గుర్తించేందుకు ముఖ్యమైన సూత్రాలు
రంగు పరిశీలన: తాజా మటన్ సాధారణంగా లేత గులాబీ నుంచి ఎరుపు రంగులో ఉంటుంది. అయితే జంతువు వయస్సు, గాలి తగలడం బట్టి రంగులో చిన్న మార్పులు ఉండవచ్చు. రంగు మరీ నల్లబడినా లేదా అసహజంగా కనిపించినా అనుమానించాల్సిందే.
వాసన గమనించండి: తాజా మాంసానికి తేలికపాటి సహజ వాసన ఉంటుంది. అలా కాకుండా తీవ్రమైన పుల్లటి, కుళ్ళిన లేదా ఘాటైన అసహ్యకరమైన దుర్వాసన వస్తుంటే ఆ మటన్ ఖచ్చితంగా పాడైపోయినట్లే.
ఉపరితల జిగురు: మాంసం కాస్త తేమగా ఉన్నా పరవాలేదు కానీ, మరీ జిగటగా లేదా చేతికి అంటుకునేలా ఉంటే అది నిల్వ ఉంచిన లేదా పాడైన మాంసానికి సంకేతం.
కొవ్వు రంగు: మటన్లోని కొవ్వు సాధారణంగా తెలుపు నుంచి లేత క్రీమ్ రంగులో ఉండాలి. కొవ్వు రంగు మారి దుర్వాసన వస్తున్నా ఆ మాంసాన్ని తీసుకోకూడదు.
ఎముకల పరిమాణం: చిన్న ఎముకలు లేత మాంసానికి సూచిక అని కొందరు భావిస్తారు. అయితే జంతువు జాతి, శరీర భాగాన్ని బట్టి ఎముకల సైజు మారుతుంది కాబట్టి కేవలం దీనిపైనే ఆధారపడకుండా మొత్తం నాణ్యతను చూడాలి.
షాపు పరిశుభ్రత – నిల్వ పద్ధతులు
మటన్ కొనే దుకాణంలో ఈగలు, దుమ్ము లేకుండా పరిశుభ్రంగా ఉండాలి. మాంసం కోసే కత్తులు, చెక్క పలకలు శుభ్రంగా ఉన్నాయో లేదో గమనించాలి. గది ఉష్ణోగ్రత వద్ద ఎక్కువ గంటలు నిల్వ ఉంచిన మాంసాన్ని కొనకపోవడమే మంచిది.
ప్యాక్డ్ మటన్ కొనేటప్పుడు
సూపర్మార్కెట్లలో ప్యాక్ చేసిన మటన్ కొనేవారు లేబుల్పై ప్యాకింగ్ తేదీ, ఎక్స్పైరీ డేట్ తప్పక చూడాలి. ప్యాకెట్ లీకైనా, ఉబ్బిపోయినా కొనకూడదు.
ఏ వంటకానికి ఎలాంటి ముక్కలు?
బిర్యానీకి: సమతుల్యంగా మాంసం, కొద్దిగా ఎముకలు ఉండే ముక్కలు ముద్దగా మారకుండా మంచి టెక్స్చర్ను ఇస్తాయి.
మటన్ కర్రీకి: ఎముకలతో కూడిన ముక్కలు పులుసు, గ్రేవీకి అదిరిపోయే రుచిని అందిస్తాయి.
ఇంటికి తెచ్చిన తర్వాత తీసుకోవాల్సిన జాగ్రత్తలు
మటన్ తెచ్చిన వెంటనే ఎక్కువ సమయం బయట ఉంచకుండా రిఫ్రిజిరేటర్లో భద్రపరచాలి. పచ్చి మాంసాన్ని వండే ఇతర కూరగాయలు, ఆహార పదార్థాలకు దూరంగా ఉంచడం వల్ల బ్యాక్టీరియా వ్యాప్తిని అరికట్టవచ్చు. మటన్ను బాగా ఉడికించి వండటం ద్వారా మాత్రమే సంపూర్ణ ఆహార భద్రత లభిస్తుంది.