Constipation Diet: మలబద్ధకానికి చెక్ పెట్టాలా..? ఈ పండ్లను మీ డైట్‌లో చేర్చుకోండి!

fruits for constipation

మలబద్ధకం చాలా మందిని ఇబ్బంది పెట్టే సాధారణ జీర్ణ సమస్య. తగినంత ఫైబర్, నీరు తీసుకోకపోవడం, జీర్ణక్రియ మందగించడం వంటి కారణాలతో ఈ సమస్య వస్తుంది. ఇలాంటి సమయంలో వెంటనే మందులపై ఆధారపడకుండా ఆహారంలో కొన్ని మార్పులు చేసుకోవడం ద్వారా ఉపశమనం పొందే అవకాశం ఉంటుంది. ముఖ్యంగా ఫైబర్, నీరు, సహజ మొక్కల సమ్మేళనాలు అధికంగా ఉండే కొన్ని పండ్లు పేగుల కదలికలను మెరుగుపరిచి మలబద్ధకం సమస్య నుంచి ఊరట కలిగిస్తాయి.

మలబద్ధకం సమస్యకు ఈ పళ్లతో విరుగుడు

ఫ్లోరిడాకు చెందిన గ్యాస్ట్రోఎంటరాలజిస్ట్ డాక్టర్ జోసెఫ్ సల్హాబ్ మలబద్ధకం నుంచి ఉపశమనానికి సహాయపడే పండ్ల జాబితాను సోషల్ మీడియాలో పంచుకున్నారు. ఆయన సూచించిన వాటిలో చెర్రీస్, పీచెస్, యాపిల్స్, ప్లమ్స్, ప్రూన్స్, బేరిపండ్లు, పుచ్చకాయ, రాస్ప్‌బెర్రీస్, డ్రాగన్ ఫ్రూట్, చింతపండు, కివీ ఉన్నాయి.

చెర్రీస్, పీచెస్, యాపిల్స్

ఈ పండ్లలో ఫైబర్‌తో పాటు సహజంగా ఉండే సోర్బిటాల్ వంటి సమ్మేళనాలు ఉంటాయి. ఇవి పేగుల్లోకి నీటిని ఆకర్షించి మలాన్ని మృదువుగా చేయడంలో సహాయపడవచ్చని గ్యాస్ట్రో ఎంటరాలజిస్ట్ డాక్టర్ జోసెఫ్ సల్హాబ్ పేర్కొన్నారు.

ప్లమ్స్, ప్రూన్స్, బేరిపండ్లు

ఈ పండ్లు కూడా సోర్బిటాల్, ఫైబర్ వంటి పదార్థాలను కలిగి ఉంటాయి. ఇవి మలాన్ని మృదువుగా చేసి పేగుల కదలికలు సక్రమంగా జరిగేందుకు సహాయపడుతాయి.

పుచ్చకాయ

పుచ్చకాయలో నీటి శాతం ఎక్కువగా ఉంటుంది. ఇందులో మన్నిటాల్ అనే సహజ చక్కెర ఆల్కహాల్ కూడా ఉంటుందని డాక్టర్ జోసెఫ్ సల్హాబ్ పేర్కొన్నారు. ఇది సహజంగా మలవిసర్జనకు తోడ్పడవచ్చని ఆయన తెలిపారు.

రాస్ప్‌బెర్రీస్, డ్రాగన్ ఫ్రూట్, చింతపండు

ఈ పండ్లలో ఫైబర్‌తో పాటు పేగుల ఆరోగ్యానికి ఉపయోగపడే ఇతర మొక్కల సమ్మేళనాలు, ప్రీబయోటిక్స్ ఉంటాయి. ఇవి పేగుల్లోని మంచి బ్యాక్టీరియాకు ఆహారంగా పనిచేసి గట్ మైక్రోబయోమ్‌ను సమతుల్యంగా ఉంచడంలో సహాయపడుతాయి.

కివీ ఫ్రూట్

కివీ కూడా ఫైబర్ సమృద్ధిగా ఉండే పండు. మలబద్ధకం సమస్య ఉన్నవారు కివీని ఆహారంలో చేర్చుకోవడం వల్ల పేగుల కదలికలకు సహాయం లభించవచ్చని డాక్టర్ జోసెఫ్ సల్హాబ్ సూచించారు.

మలబద్ధకం సమస్యకు బెస్ట్ ఫ్రూట్స్ ఇవే..

ఎక్కువగా తింటే సమస్యలు రావచ్చు

ఫైబర్ ఎక్కువగా ఉన్న ఆహారాన్ని ఒక్కసారిగా అధిక పరిమాణంలో తీసుకోవడం మంచిది కాదు. ముఖ్యంగా శరీరం అధిక ఫైబర్‌కు అలవాటు లేకపోతే గ్యాస్, కడుపు ఉబ్బరం, కడుపునొప్పి లేదా విరేచనాలు రావచ్చు. కాబట్టి కొద్దికొద్దిగా ప్రారంభించి, తగినంత నీరు తీసుకోవడం ముఖ్యం.

(గమనిక: ఈ సమాచారం ఆరోగ్య అవగాహన కోసం మాత్రమే. పై పండ్లు మలబద్ధకానికి సహాయపడవచ్చని నిపుణుడి సూచనల ఆధారంగా కథనం పేర్కొంటోంది. దీర్ఘకాలంగా మలబద్ధకం కొనసాగినా, తీవ్రమైన కడుపునొప్పి, రక్తస్రావం లేదా ఇతర అసాధారణ లక్షణాలు ఉన్నా వైద్యుడిని సంప్రదించాలి.)