ఫైనల్ రిపోర్ట్.. ఆయనది ఆత్మహత్యే..!

కేఫ్ కాఫీ డే కింగ్ వీజీ సిద్ధార్థది ఆత్మహత్యేనని మంగుళూరు పోలీస్ కమిషన్ పీఎస్ హర్ష తేల్చిచెప్పారు. దీనికి సంబంధించిన అటాప్సీ రిపోర్టు విశేషాలను ఆయన వెల్లడించారు. అయితే తదుపరి విచారణలో ఆయన ఏ కారణంతో ఆత్మహత్య చేసుకున్నారో అన్న అంశాన్ని తేలుస్తామని సీపీ హర్ష అన్నారు. అయితే దర్యాప్తు చేస్తున్న అధికారులు ఇచ్చిన తుది నివేదిక ఆధారంగా సిద్ధార్థది ఆత్మహత్యేనని కన్ఫామ్ అయినట్లు ఆయన చెప్పారు. ద‌ర్యాప్తులో భాగంగా ఇప్పటికే కాఫీడే ఉద్యోగులు, బోర్డు డైర‌క్ట‌ర్ల‌ను పోలీసులు విచారించారు. ఈ కేసులో మ‌రికొంత మందిని ప్ర‌శ్నించ‌నున్నారు, అన్ని కోణాల్లోనూ విచార‌ణ ఉంటుంద‌ని సీపీ అన్నారు. గ‌త జూలై 29వ తేదీన మంగుళూరు వ‌ద్ద ఉన్న నేత్రావ‌తి న‌దిలో దూకి సిద్ధార్థ ఆత్మ‌హ‌త్య‌కు పాల్ప‌డ్డాడు. ఆయ‌న మృత‌దేహాన్ని స్థానిక జాల‌ర్లు జూలై 31వ తేదీన గుర్తించారు. నీటిలో దూకడం వల్ల శ్వాస స‌మ‌స్య త‌లెత్తింద‌ని, దాని వ‌ల్ల సిద్ధార్థ మృతిచెందిన‌ట్లు అటాప్సీ నిపుణులు పోలీసుల‌కు చెప్పారు. ఇక తుది రిపోర్ట్‌, ప్రిలిమిన‌రీ రిపోర్ట్ ఒకే విధంగా ఉన్న‌ట్లు పోలీసులు తెలిపారు.