సరికొత్త రికార్డు సొంతం చేసుకున్న భారత రైల్వే.. పట్టాలపై పరుగులు పెట్టిన అత్యంత పొడవైన గూడ్స్ రైలు

Longest Freight Train vasuki : భార‌తీయ రైల్వే సంస్థ మరోసారి స‌రికొత్త రికార్డు నెల‌కొల్పింది. ఒక‌టి కాదు రెండు కాదు ఏకంగా 295 వేగ‌న్ల‌తో ఐదు రైళ్లను అనుసంధానించి న‌డిపించింది. ‘వాసుకి’ అని భార‌తీయ రైల్వే పేరు పేట్టింది. ఈ సరుకు రవాణా వాసుకి రైలును ఛత్తీస్‌గడ్‌లోని భిలై నుంచి కోర్బా వరకు నడుపుతూ భార‌తీయ రైల్వే ఈ కొత్త రికార్డు సృష్టించింది. ఈ రెండు స్టేషన్ల మధ్య సుమారు 224 కిలో మీట‌ర్ల దూరం ఉంటుంది. ఐదు రైళ్లను అనుసంధానించిన త‌రువాత ఈ రైలు పొడ‌వు 3.5 కిలోమీటర్ల అని రైల్వ అధికారులు తెలిపారు.

భారతీయ రైల్వే ఈ ఘనత సాధించినందుకు రైల్వే మంత్రి పియూష్ గోయల్ ట్విటర్ వేదికగా ప్రశంసించారు. పారిశ్రామిక ఉత్పత్తులను అధికంగా మొత్తంలో పంపిణీ చేయడంతో పాటు సరుకు రవాణా రంగంలో కీలక మార్పులను ఈ రైలు తీసుకొచ్చిందని పేర్కొన్నారు. దీనిని ఒక లోకో పైలట్, ఒక అసిస్టెంట్ లోకో పైలట్, ఒక గార్డు సహాయంతో నడిపినట్లు ఆయన వెల్లడించారు. త‌క్కువ స‌మ‌యంలో ఎక్కువ సరుకులు ర‌వాణా చేసేందుకే ఈ వాసుకి’ని చేప‌ట్టిన‌ట్లు చెప్పారు.

ఇదిలావుంటే, గతంలోనూ భారీ గూడ్స్ రైలును నడిపి రికార్డు సృష్టించింది భారత రైల్వే. తాజా ఆ రికార్డును బ్రేక్ చేస్తూ వాసికి ప్రవేశపెట్టింది. గ‌తంలో 177 వేగ‌న్లతో మూడు గూడ్స్ రైళ్లను అనుసంధానించి న‌డిపింది. దీనికి ‘సూప‌ర్ అన‌కొండ’ అనే పేరు పెట్టారు. బిలాస్ పూర్ నుంచి చక్రధర్‌పూర్ డివిజన్ల మీదుగా ఈ అనకొండ గూడ్స్ రైలు సాగింది.

Read Also..  రైతు సంఘాల ట్రాక్టర్ ర్యాలీకి అనుమతి.. షరతులు వర్తిస్తాయన్న ఢిల్లీ పోలీసులు.!