ఐదేళ్ల వయసులోనే 3,000 పుస్తకాలు.. ఐఐక్యూ స్కోర్ చూస్తే షాకవ్వాల్సిందే! ఎవరీ బాలుడు?

Arjun Prajapati Iq Levels

ప్రపంచంలో కొందరు పిల్లలు తమ అసాధారణ ప్రతిభతో చిన్న వయసులోనే అందరి దృష్టిని ఆకర్షిస్తుంటారు. అలాంటి బాల మేధావుల జాబితాలో ఐదేళ్ల అర్జున్ ప్రజాపతి ప్రత్యేకంగా నిలుస్తున్నాడు. సాధారణంగా ఈ వయసులో పిల్లలు ఆటపాటలు, బొమ్మలు, చిన్నచిన్న కథలతో కాలక్షేపం చేస్తుంటారు. కానీ అర్జున్ మాత్రం గణితం, అంతరిక్షం, బ్లాక్ హోల్స్, మానవ జన్యుశాస్త్రం, రోగనిరోధక వ్యవస్థ వంటి క్లిష్టమైన అంశాలపై ఆసక్తి కనబరుస్తున్నాడు. ఇప్పటివరకు 3,000కు పైగా పుస్తకాలు చదివినట్లు అతని తల్లిదండ్రులు చెబుతున్నారు. అతని అసాధారణ జ్ఞాపకశక్తి, నేర్చుకోవాలనే తపన ఇప్పుడు అందరినీ ఆశ్చర్యానికి గురిచేస్తున్నాయి.

18 నెలల వయసులోనే చదవడం ప్రారంభం

అర్జున్ ప్రజాపతి గుజరాత్‌లోని వడోదరలో జన్మించాడు. అతని కుటుంబం ప్రస్తుతం కెనడాలో స్థిరపడింది. చిన్నతనం నుంచే అతనికి పుస్తకాలపై విపరీతమైన ఆసక్తి ఉండేదని తల్లిదండ్రులు చెబుతున్నారు. కేవలం 18 నెలల వయసులోనే చదవడం ప్రారంభించిన అర్జున్.. క్రమంగా వివిధ అంశాలపై పరిజ్ఞానాన్ని పెంచుకున్నాడు. మొదట బొమ్మల పుస్తకాలు, బాలగేయాలు, చిన్న కథలతో ప్రారంభమైన అతని ప్రయాణం.. ఆ తర్వాత సైన్స్, టెక్నాలజీ, ఇంజనీరింగ్, గణితం వంటి విభిన్న రంగాలవైపు మళ్లింది.

అర్జున్‌కు ఎక్కడికి వెళ్లినా పుస్తకాలు వెంట ఉండాల్సిందేనట. అందుకే అతని తల్లిదండ్రులు కారులో ఎప్పుడూ ఎనిమిది నుంచి పది పుస్తకాలను అందుబాటులో ఉంచుతారు. ఒకవేళ తనకు బోర్ కొడితే చదువుకోవడానికి పుస్తకం ఉండాలని అర్జున్ చెబుతుంటాడని అతని తండ్రి వెల్లడించారు. ఈ మాటలు చిన్న వయసులోనే అతనికి పఠనంపై ఉన్న మక్కువను తెలియజేస్తున్నాయి.

నాలుగేళ్లకే అంతర్జాతీయ గుర్తింపు

అర్జున్ ప్రతిభకు అతని జ్ఞాన సామర్థ్య పరీక్షలు మరో నిదర్శనంగా నిలిచాయి. నాలుగేళ్ల పది నెలల వయసులో అతనికి అధికారికంగా జ్ఞానాత్మక మదింపు నిర్వహించారు. 2026 జూన్ 11 నాటి నిర్ధారణ పత్రం ప్రకారం, స్టాన్‌ఫోర్డ్-బినెట్ ఇంటెలిజెన్స్ స్కేల్స్ ఐదో ఎడిషన్ పరీక్షలో అతను 141 ఐక్యూ స్కోరు సాధించాడు. ఈ స్కోరు అతడిని సుమారు 99.7వ పర్సంటైల్‌లో నిలిపినట్లు పేర్కొంది. అదనపు పరీక్షల్లో నాన్-వెర్బల్ ఐక్యూ 149, ఫ్లూయిడ్ రీజనింగ్ స్కోరు 144, వర్కింగ్ మెమరీ స్కోరు 146గా నమోదయ్యాయి. ఈ ఫలితాల ఆధారంగా అతని మానసిక సామర్థ్యాలను ‘ప్రతిభావంతుడు’ అనే విభాగంలో వర్గీకరించారు. అంతేకాదు, నాలుగేళ్ల వయసులోనే మెన్సా, ఇంటర్‌టెల్ అనే అంతర్జాతీయ అధిక ఐక్యూ సంఘాల్లో సభ్యత్వానికి అర్హత సాధించినట్లు కుటుంబసభ్యులు తెలిపారు.

సైన్స్ నుంచి డైనోసార్ల వరకు.. అన్నింటిపైనా ఆసక్తి

అర్జున్ ఆసక్తులు ఒక్క రంగానికే పరిమితం కాలేదు. మానవ రోగనిరోధక వ్యవస్థ, మైక్రోబయాలజీ, ఇమ్యునాలజీతో పాటు బ్లాక్ హోల్స్, డైనోసార్ల గురించి కూడా తెలుసుకోవడానికి ఆసక్తి చూపిస్తున్నాడు. చిన్నప్పటి నుంచే సంఖ్యలు, నమూనాలు, పదాలను గుర్తించడం, విన్న విషయాలను గుర్తుంచుకోవడం వంటి లక్షణాలు అతనిలో కనిపించాయని తల్లిదండ్రులు చెబుతున్నారు. అర్జున్ ప్రతిభను గుర్తించిన కెనడా ప్రధానమంత్రి మార్క్ కార్నీ నుంచి కూడా అభినందన లేఖ అందుకున్నట్లు సమాచారం. దీంతో ఈ చిన్నారి పేరు మరింతగా చర్చలోకి వచ్చింది.

తల్లిదండ్రుల ప్రోత్సాహమే కీలకం

చిన్న వయసులోనే ఇన్ని విషయాలు నేర్చుకుంటున్న అర్జున్ ప్రయాణంలో కుటుంబ ప్రోత్సాహం కీలక పాత్ర పోషిస్తోంది. పిల్లల్లో ఆసక్తిని గుర్తించి, వారికి నచ్చిన అంశాలను అన్వేషించేందుకు అవకాశం కల్పిస్తే వారి సామర్థ్యాలు మరింతగా అభివృద్ధి చెందుతాయని ఈ ఉదంతం సూచిస్తోంది. అయితే, అధిక ఐక్యూ స్కోరు ఒక్కటే ఒక వ్యక్తి భవిష్యత్ విజయాలను నిర్ణయించదు. పిల్లల అభివృద్ధిలో భావోద్వేగాలు, సామాజిక నైపుణ్యాలు, సృజనాత్మకత, సమతుల్యమైన విద్య కూడా ముఖ్యమే. అర్జున్ వంటి పిల్లల విషయంలో వారి ప్రతిభను ప్రోత్సహించడంతో పాటు, బాల్యాన్ని ఆస్వాదించేలా చూడటం కూడా అంతే అవసరం. ఐదేళ్ల వయసులోనే వేలాది పుస్తకాలతో పరిచయం పెంచుకున్న ఈ బాలుడు భవిష్యత్తులో ఏ రంగంలో రాణిస్తాడో చూడాలి.

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..