Shivarajkumar Vedha : శివన్న కోసం కదలిరానున్న నటసింహం.. వేద మూవీ ప్రీరిలీజ్ ఈవెంట్ కు గెస్ట్ గా బాలయ్య
తాజాగా శివ రాజ్కుమార్ చేసిన చిత్రం వేద. ఈ సినిమా చిత్రం శివ రాజ్కుమార్ కి చాలా ప్రత్యేకమైన చిత్రం. ఈ సినిమాతో ఆయన 125 చిత్రాల మైలురాయిని అందుకున్నారు.
కన్నడ చలనచిత్ర పరిశ్రమలో శివ రాజ్కుమార్ ఓ స్టార్ హీరో.. ఆయనకు ఉన్న ఫాలోయింగ్ అంత ఇంతాకాదు. సూపర్ హిట్ సినిమాలతో దూసుకుపోతున్నారు శివన్న. తాజాగా శివ రాజ్కుమార్ చేసిన చిత్రం వేద. ఈ సినిమా చిత్రం శివ రాజ్కుమార్ కి చాలా ప్రత్యేకమైన చిత్రం. ఈ సినిమాతో ఆయన 125 చిత్రాల మైలురాయిని అందుకున్నారు. అలాగే తన భార్య గీతా శివ రాజ్కుమార్ నేతృత్వంలోని గీతా పిక్చర్స్ అయన హోమ్ బ్యానర్‌లో ఇది మొదటి వెంచర్‌గా కూడా రావడం విశేషం. ఇటీవలే కన్నడలో విడుదలై సంచలనం సృష్టించిన ఈ సినిమా ఫిబ్రవరి 9న గురువారం తెలుగులో రిలీజ్ కు సిద్దమవుతుంది. మాములుగా ఇండస్ట్రీలో సినిమాలు శుక్రవారం రిలీజ్ అవుతుంటాయి. కంటెంట్ మీద ఉన్న నమ్మకంతో ఈ సినిమాను ఒకరోజు ముందుగానే రిలీజ్ చేస్తున్నారు .
కంచి కామాక్షి కలకత్తా కాళీ క్రియేషన్స్ ద్వారా ఈ సినిమా తెలుగులో రిలీజ్ కానుంది. దీనికి సంబంధించిన టైటిల్ మరియు మోషన్ పోస్టర్స్ ను ఇదివరకే ఆవిష్కరించింది చిత్ర బృందం. ఈ సినిమాను సపోర్ట్ చేస్తున్న పాన్ ఇండియా స్టార్ ప్రభాస్ కి ఈ చిత్ర బృందం ప్రత్యేక కృతజ్ఞతలు తెలిపింది. అలానే ఈ సినిమా గురించి మెగాపవర్ స్టార్ రామ్ చరణ్ ట్వీట్ చేస్తూ ఈ చిత్రబృందానికి అభినందనలు తెలిపారు.
ఇక ఈ సినిమా ప్రీరిలీజ్ ఈవెంట్ కు గెస్ట్ గా నటసింహం నందమూరి బాలకృష్ణ హాజరు కానున్నారు. ఈ రోజు హైదరాబాద్ లో ఈ సినిమా ప్రీరిలీజ్ ఈవెంట్ ను గ్రాండ్ గా నిర్వహించనున్నారు. బాలకృష్ణ కు శివరాజ్ కుమార్ ఫ్యామిలీకి మంచి అనుబంధం ఉన్న విషయం తెలిసిందే. ఇక కన్నడలో సూపర్ హిట్ గా నిలిచిన వేద తెలుగులో ఎలా ఆకట్టుకుంటుందో చూడాలి.