వెంకీ మామ నైంన్టీస్లోనే బాలీవుడ్ సినిమా చేశారని మీకు తెలుసా..?
చంటి చిత్రం కేవలం వెంకటేష్ కెరీర్లోనే కాకుండా తెలుగు సినిమా చరిత్రలోనూ ఓ మైలురాయి. ఓ రీమేక్ కథకు ప్రాణం పోసి, అనేక అంచనాలను అధిగమించి, బాక్సాఫీస్ వద్ద కోట్లు కురిపించి, లెక్కలేనన్ని రికార్డులను సృష్టించిన ఈ సినిమా అసలు కథ, తెర వెనుక విశేషాలు ఎన్నో.
వెంకటేష్ కెరీర్లో చంటి చిత్రం ఒక అద్భుతమైన మలుపు. తన ఇంటి పేరుగా విజయాలను మార్చుకున్న వెంకటేష్, విభిన్న కథలను ఎంచుకుంటూ ప్రేక్షకులను అలరిస్తూ వచ్చారు. 1991లో శత్రువు, కూలీ నెంబర్ వన్, సూర్య ఐపీఎస్, క్షణక్షణం వంటి నాలుగు యాక్షన్ చిత్రాలలో నటించిన తర్వాత, ఒక వెరైటీగా కుటుంబ కథా చిత్రం చేయాలని వెంకటేష్ భావించారు. ఆ సమయంలో నిర్మాత కేఎస్ రామారావుకు ఒక అవకాశం లభించింది. చిరంజీవితో నిర్మించిన స్టువర్ట్ పురం పోలీస్ స్టేషన్ చిత్రం ఫ్లాప్ కావడంతో, బయ్యర్లు నష్టపోవడం ఆయనను కలచివేసింది. వారికి అండగా నిలవాలని నిర్ణయించుకున్న రామారావు, తమిళంలో విడుదల సిద్ధంగా ఉన్న చిన్నతంబి చిత్రాన్ని చూశారు. అప్పటికే చాలా మంది ప్రముఖులు చూసి నచ్చకపోయినా, రామారావుకి మాత్రం ఆ సినిమా బాగా నచ్చింది. చిన్న హీరోతో తక్కువ బడ్జెట్లో రీమేక్ చేస్తే బాగుంటుందని భావించి రీమేక్ హక్కులు కొన్నారు. రాజేంద్ర ప్రసాద్తో సినిమా చేయాలని తొలుత అనుకున్నా, సురేష్ బాబు ఫోన్ చేసి వెంకటేష్ చిన్నతంబి రీమేక్ చేయాలనుకుంటున్నారని చెప్పడంతో రామారావు ఆనందానికి అవధులు లేవు. వెంకటేష్ అప్పటికే దర్శకుడు రవిరాజా పినిశెట్టితో చేయాలనుకున్న ప్రాజెక్టును పక్కన పెట్టి, చంటి చిత్రానికి డేట్స్ ఇచ్చారు. చిత్రంలో హీరోయిన్ ఎంపిక ఒక పెద్ద సవాలుగా మారింది. తమిళంలో నటించిన కుష్బూ బిజీగా ఉండగా, ముంబైలో అనేకమందిని చూసినా ఎవరూ నచ్చలేదు. నటనతో పాటు అందం కూడా కావాలి. అప్పుడే విడుదలైన సీతారామయ్య గారి మనవరాలు చిత్రంలో నటించిన మీనా రామారావు దృష్టిని ఆకర్షించింది. స్టార్ హీరోల పక్కన ఆమెను తీసుకోవడానికి అప్పట్లో ఎవరూ ఆసక్తి చూపకపోయినా, ఆమె అమాయకత్వం, ముగ్ధమనోహర రూపం నచ్చడంతో రామారావు ఆమెను ఎంపిక చేయడంలో రిస్క్ తీసుకున్నారు. చంటి చిత్రంతో మీనా కెరీర్ పూర్తిగా మారిపోయింది. ఆమె అద్భుతంగా నటించి తనకంటూ ఒక ప్రత్యేక స్థానాన్ని ఏర్పరచుకున్నారు.
మీనా పెద్దన్న పాత్రకు నాజర్ను ఎంపిక చేయడంలో కూడా విమర్శలు ఎదురయ్యాయి. అయినప్పటికీ దర్శకుడు రవిరాజా, నిర్మాత రామారావు వెనక్కి తగ్గలేదు. నాజర్ ఆ పాత్రను అద్భుతంగా పోషించి నంది అవార్డు అందుకున్నారు. వెంకటేష్ ఈ తరహా పాత్రను పోషించగలడా అని చాలామంది సందేహాలు వ్యక్తం చేశారు. ఆయన దాన్ని ఛాలెంజ్గా తీసుకుని నటించారు. చంటి విజయం వెంకటేష్ను మరిన్ని రీమేక్ చిత్రాలు చేయడానికి, హిందీలో అనాడి చిత్రంతో బాలీవుడ్లోకి ప్రవేశించడానికి దోహదపడింది. ఈ చిత్రం షూటింగ్ 65 రోజుల్లో పూర్తయింది. కోటి రూపాయల బడ్జెట్తో నిర్మించిన ఈ సినిమా కోసం నిర్మాత 1946 మోడల్ మెర్సిడెస్ బెంజ్ కారును, ఒక ఎడ్ల బండిని కొనుగోలు చేశారు. ఇళయరాజా స్వరపరిచిన ఏడు పాటలు సినిమాకు పెద్ద బలం. సినిమా విడుదల కాకముందే ఆడియో క్యాసెట్లు రికార్డు స్థాయిలో అమ్ముడై డబుల్ ప్లాటినం డిస్క్ సాధించాయి. విడుదలైన తర్వాత కూడా మరో 50,000 క్యాసెట్లు అమ్ముడుపోవడం అప్పట్లో ఒక రికార్డు. పావురానికి పంజరానికి పెళ్లి చేసి చూడు లోకం వంటి పాట పెళ్లి వేడుకల్లో పాడకూడని ప్రత్యేకతను కలిగి ఉంది. 1992 జనవరి 10న విడుదలైన చంటి తొలి ఆట నుంచే సూపర్ హిట్ టాక్ సొంతం చేసుకుంది. ఏ, బి, సి అనే తేడా లేకుండా అన్ని సెంటర్లలో భారీ వసూళ్లు సాధించింది. విశాఖ జిల్లాలోని అనకాపల్లిలో 54 రోజులు, నాలుగు ఆటలతో హౌస్ ఫుల్ అయిన ఏకైక సినిమా ఇదే. తెలుగు చలనచిత్ర చరిత్రలో తొలిసారిగా 10 కోట్లు షేర్ వసూలు చేసిన చిత్రంగా చంటి నిలిచింది. కడపలోని కృష్ణ థియేటర్లో 56 రోజుల్లో 348 ఆటలు ప్రదర్శించి ఆల్ ఇండియా రికార్డు నెలకొల్పింది. హైదరాబాద్ సుదర్శన్ 35ఎంఎం లో డైరెక్టుగా 147 రోజులు ఆడింది.
హిందీ రీమేక్ అనాడి కూడా హైదరాబాద్ పరమేశ్వరి థియేటర్లో డైరెక్టుగా 119 రోజులు ఆడటం ఒక అరుదైన రికార్డు. ఈ చిత్రం 33 కేంద్రాలలో డైరెక్టుగా 100 రోజులు ప్రదర్శితమై ఆల్ టైం రికార్డు సృష్టించింది. నైజాం పంపిణీదారు జంగయ్య అత్యధిక ధరకు చంటిని కొని, చిత్రం విజయం సాధించాక తన మాట నిలబెట్టుకొని 100 మందిని తిరుపతికి తీసుకువెళ్లారు. చంటి కేవలం ఒక సినిమాగా కాకుండా, వెంకటేష్ కెరీర్కు, తెలుగు చిత్రసీమకు ఒక కొత్త దిశానిర్దేశం చేసిన చిత్రంగా నిలిచిపోయింది.