Cinema OTT: ఏం ట్విస్టులు రా బాబూ.. ఓటీటీలో దుమ్మురేపుతున్న క్రైమ్ థ్రిల్లర్ వెబ్ సిరీస్.. ట్రెండింగ్లో నంబర్ వన్..
షాహిద్ కపూర్, విజయ్ సేతుపతి ప్రధాన పాత్రల్లో రాజ్ అండ్ డీకే తెరకెక్కించిన 'ఫర్జీ' వెబ్ సిరీస్ అమెజాన్ ప్రైమ్ వీడియోలో అత్యధిక వ్యూస్ సాధించిన ఇండియన్ సిరీస్‌గా నిలిచి సరికొత్త రికార్డు సృష్టించింది. ప్రస్తుతం ఈ సిరీస్ గురించి అందరూ మాట్లాడుకుంటున్నారు. అంతేకాకుండా ట్రెండింగ్ లో నంబర్ వన్ స్థానంలో దూసుకుపోతుంది.
ఓటీటీ ప్లాట్‌ఫామ్‌లపై ఎన్ని జోనర్లు అందుబాటులో ఉన్నా, ప్రేక్షకులను ఉత్కంఠకు గురిచేసే క్రైమ్ థ్రిల్లర్ సిరీస్‌లకు ఎప్పుడూ ప్రత్యేక ఆదరణ ఉంటుంది. ఆ కోవలోనే 2023లో విడుదలై భారతీయ డిజిటల్ ప్రపంచంలో సంచలనం సృష్టించిన బ్లాక్ కామెడీ క్రైమ్ థ్రిల్లర్ వెబ్ సిరీస్ ‘ఫర్జీ’. బాలీవుడ్ స్టార్ షాహిద్ కపూర్, తమిళ విలక్షణ నటుడు విజయ్ సేతుపతి తొలిసారి కలిసి నటించిన ఈ సిరీస్ అమెజాన్ ప్రైమ్ వీడియోలో అత్యధిక మంది వీక్షించిన ఇండియన్ వెబ్ సిరీస్‌లలో ఒకటిగా నిలిచింది. విమర్శకుల ప్రశంసలతో పాటు ఈ సిరీస్‌కు ఐఎండీబీ (IMDb)లో ఏకంగా 8.3 రేటింగ్ దక్కడం విశేషం. గతంలో ‘ది ఫ్యామిలీ మ్యాన్’ వంటి బ్లాక్‌బస్టర్ సిరీస్‌ను అందించిన దర్శక ద్వయం రాజ్ అండ్ డీకే ఈ కథను స్వయంగా రాసి, దర్శకత్వం వహించారు. మొత్తం 8 ఎపిసోడ్లతో రూపొందిన ఈ సిరీస్ విడుదలైనప్పటి నుంచి డిజిటల్ రంగంలో సరికొత్త బెంచ్‌మార్క్ సెట్ చేసింది. షాహిద్ కపూర్ తన కెరీర్‌లో తొలిసారిగా ఈ సిరీస్ ద్వారా ఓటీటీలోకి అడుగుపెట్టి ఘనవిజయాన్ని అందుకున్నారు.
కథాంశం విషయానికి వస్తే, సన్నీ (షాహిద్ కపూర్) ఒక అద్భుతమైన చిత్రకారుడు. అయితే తన తాతయ్య (అమోల్ పాలేకర్) ఎంతో ఇష్టంతో నడిపే ప్రింటింగ్ ప్రెస్ భారీ అప్పుల ఊబిలో కూరుకుపోయి మూతపడే పరిస్థితికి చేరుకుంటుంది. ఆ ప్రెస్‌ను ఎలాగైనా కాపాడుకోవాలని, తక్కువ సమయంలో ఎక్కువ డబ్బు సంపాదించాలని సన్నీ తన కళా నైపుణ్యాన్ని తప్పుదోవ పట్టిస్తాడు. తన ప్రాణ స్నేహితుడు ఫిరోజ్ (భువన్ అరోరా)తో కలిసి అచ్చం అసలు కరెన్సీ నోట్ల లాగే ఉండే నకిలీ నోట్లను ముద్రించడం ప్రారంభిస్తాడు. సన్నీ అత్యంత నాణ్యతతో తయారు చేసిన దొంగ నోట్ల వ్యవహారంపై అంతర్జాతీయ మాఫియా డాన్ మన్సూర్ దలాల్ (కేకే మీనన్) కన్ను పడుతుంది. మరోవైపు దేశ ఆర్థిక వ్యవస్థకు ముప్పుగా మారిన ఈ నకిలీ నోట్ల దందాను అరికట్టడానికి స్పెషల్ టాస్క్ ఫోర్స్ అధికారి మైఖేల్ (విజయ్ సేతుపతి) రంగంలోకి దిగుతాడు. ఒకవైపు క్రూరుడైన మాఫియా డాన్, మరోవైపు తెలివైన పోలీస్ ఆఫీసర్ మధ్య చిక్కుకున్న సన్నీ, ఫిరోజ్ ఈ ప్రమాదకరమైన వలయం నుంచి ఎలా బయటపడ్డారనేది ఈ సిరీస్‌లో అత్యంత ఉత్కంఠభరితంగా సాగుతుంది.
ఈ సూపర్ హిట్ ప్రాజెక్ట్ వెనుక ఒక ఆసక్తికరమైన తెరవెనుక విశేషం కూడా ఉంది. రాజ్ అండ్ డీకే మొదట ‘ఫర్జీ’ కథను వెబ్ సిరీస్‌గా కాకుండా ఒక ఫీచర్ ఫిల్మ్‌గా రూపొందించాలని భావించారు. అప్పట్లో ఈ సినిమాలో షాహిద్ కపూర్‌తో పాటు ప్రముఖ నటుడు నవాజుద్దీన్ సిద్దిఖీ నటిస్తారని అధికారిక ప్రకటన కూడా వెలువడింది. అయితే కథలోని విస్తృతి, పాత్రల లోతును దృష్టిలో ఉంచుకుని దీనిని వెబ్ సిరీస్‌గా మార్చాలని నిర్ణయించుకున్నారు. ఆ క్రమంలో నవాజుద్దీన్ సిద్దిఖీ స్థానంలో విజయ్ సేతుపతిని ఎంపిక చేశారు. నకిలీ కరెన్సీ తయారీ వెనుక ఉన్న సాంకేతిక అంశాలను ఎంతో సహజంగా చూపిస్తూనే, రాజ్ అండ్ డీకే పండించిన డార్క్ కామెడీ ఈ సిరీస్‌కు ప్రధాన బలంగా నిలిచింది. షాహిద్ కపూర్ ఎనర్జిటిక్ నటన, విజయ్ సేతుపతి సెటిల్డ్ పెర్ఫార్మెన్స్, కేకే మీనన్ విలనిజం ప్రేక్షకులను చివరి వరకు కట్టిపడేస్తాయి. క్రైమ్ థ్రిల్లర్లను ఇష్టపడే ప్రేక్షకులకు అమెజాన్ ప్రైమ్ వీడియోలో స్ట్రీమింగ్ అవుతున్న ఈ సిరీస్ ఒక గొప్ప వినోదాన్ని అందిస్తుంది.