HUID కోడ్‌ అంటే ఏంటి? హాల్‌మార్క్‌ ఉన్న బంగారం కొంటున్నా దాన్ని ఎందుకు చెక్‌ చేయాలి?

Huid Code

బంగారు ఆభరణాలు కొనుగోలు చేయడం భారతీయ కుటుంబాల్లో ఒక సంప్రదాయంగా కొనసాగుతున్నప్పటికీ, ప్రస్తుతం కేవలం హాల్‌మార్క్ చూసి బంగారం కొనడం సరిపోదని నిపుణులు హెచ్చరిస్తున్నారు. బంగారం అసలైనదేనా, దాని స్వచ్ఛత నిజంగానే ప్రకటించిన స్థాయిలో ఉందా అనే విషయాలను నిర్ధారించుకోవడానికి HUID (హాల్‌మార్క్‌ యూనిక్యూ ఐడెంటిఫికేషన్) కోడ్‌ను తప్పనిసరిగా తనిఖీ చేయాలని సూచిస్తున్నారు. భారత ప్రభుత్వం 2021 జూలై 1 నుంచి HUID ఆధారిత హాల్‌మార్కింగ్ వ్యవస్థను అమలు చేసింది. ఈ విధానంలో ప్రతి హాల్‌మార్క్ చేసిన బంగారు ఆభరణంపై BIS లోగో, బంగారం స్వచ్ఛత వివరాలు, అలాగే ప్రత్యేకమైన ఆరు అంకెల ఆల్ఫాన్యూమరిక్ HUID కోడ్ ముద్రించబడుతుంది.

ఈ కోడ్ ద్వారా ఆ ఆభరణం ఎక్కడ పరీక్షించబడింది, ఎవరు హాల్‌మార్క్ చేశారు, దాని స్వచ్ఛత ఎంత అనే వివరాలను సులభంగా తెలుసుకోవచ్చు. ఖురానా జ్యువెలరీ హౌస్ డైరెక్టర్ ప్రేరణా ఖురానా మాట్లాడుతూ, HUID వ్యవస్థ బంగారం కొనుగోళ్లలో పారదర్శకతను పెంచిందని తెలిపారు. కేవలం హాల్‌మార్క్ మాత్రమే కాకుండా, HUID ధృవీకరణ ద్వారా ఆభరణం నిజమైనదా కాదా అనే విషయంపై వినియోగదారులకు అదనపు భరోసా లభిస్తుందని చెప్పారు. ప్రస్తుతం మార్కెట్‌లో నకిలీ హాల్‌మార్క్ స్టాంపులు కూడా కనిపిస్తున్న నేపథ్యంలో HUID ప్రాముఖ్యత మరింత పెరిగింది. కొంతమంది అక్రమ వ్యాపారులు హాల్‌మార్క్ గుర్తులను దుర్వినియోగం చేస్తున్నారని, దీంతో సాధారణ కొనుగోలుదారులు మోసపోయే అవకాశాలు ఉన్నాయని నిపుణులు చెబుతున్నారు.

వినియోగదారులు అధికారిక BIS CARE మొబైల్ యాప్ లేదా BIS వెబ్‌సైట్ ద్వారా HUID నంబర్‌ను సులభంగా ధృవీకరించుకోవచ్చు. యాప్‌లో HUID నమోదు చేసిన వెంటనే నగల వ్యాపారి పేరు, స్వచ్ఛత స్థాయి, హాల్‌మార్కింగ్ కేంద్రం, ధృవీకరణ తేదీ వంటి పూర్తి వివరాలు కనిపిస్తాయి. నిపుణుల అభిప్రాయం ప్రకారం బంగారం కొనుగోలు చేసే ముందు కొన్ని నిమిషాలు వెచ్చించి HUIDను తనిఖీ చేయడం వల్ల భవిష్యత్తులో భారీ ఆర్థిక నష్టాలను నివారించుకోవచ్చు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి