కిలో రూ.లక్ష.. కోట్లలో వ్యాపారం.. ఈ నల్ల బంగారం రహస్యం మీకు తెలుసా..?
రాళ్ల నుంచి రక్తంలా చింది.. మార్కెట్లో బంగారం ధర పలుకుతూ.. హిమాలయ ప్రాంతాల ఆర్థిక చిత్రపటాన్నే మార్చేస్తోంది శిలాజిత్. కిలో లక్ష రూపాయల వరకు ధర పలికే ఈ నల్లటి జిగురు పదార్థాన్ని కేవలం ఔషధంగానే కాకుండా పర్వత ప్రాంత వాసులు నల్ల బంగారం అని ఎందుకు పిలుస్తున్నారు? ముడి రూపంలో ఉన్నప్పుడు తక్కువ ధరకు దొరికే శిలాజిత్, శుద్ధి చేసిన తర్వాత లక్షల విలువ ఎలా మారుతుందో తెలుసుకుందాం..
ప్రకృతి ప్రసాదించిన వర ప్రసాదాల్లో శిలాజిత్ ఒకటి. కేవలం ఆయుర్వేద ఔషధంగానే కాకుండా నేడు ఇది హిమాలయ ప్రాంత వాసులకు ప్రధాన ఆదాయ వనరుగా మారుతోంది. పర్వత శిలల నుండి రక్తంలా చిందే ఈ నల్లటి జిగురు పదార్థాన్ని నిపుణులు నల్ల బంగారం అని పిలుస్తున్నారు. ఎందుకంటే మార్కెట్లో దీనికి ఉన్న డిమాండ్, ధర అంతా ఇంతా కాదు. హిమాలయాల్లోని ఎత్తైన పర్వత ప్రాంతాల్లో మే, జూలై మధ్య ఉష్ణోగ్రతలు పెరిగినప్పుడు రాతి పగుళ్ల నుండి శిలాజిత్ ద్రవంలా బయటకు వస్తుంది. ఈ సమయంలోనే స్థానికులు తమ ప్రాణాలకు తెగించి, దుర్గమమైన కొండ ప్రాంతాల్లోకి వెళ్లి దీనిని సేకరిస్తారు.
ధర చూస్తే కళ్లు చెదరాల్సిందే
శిలాజిత్ ధర దాని నాణ్యత మరియు శుద్ధి ప్రక్రియపై ఆధారపడి ఉంటుంది. పర్వతాల నుండి సేకరించిన వెంటనే దీని ధర కిలోకు రూ.2,000 నుండి రూ.5,000 వరకు ఉంటుంది. దీనిని శాస్త్రీయ పద్ధతిలో శుద్ధి చేసి స్వచ్ఛమైన రెసిన్ లేదా పొడి రూపంలోకి మార్చిన తర్వాత మార్కెట్లో కిలోకు లక్ష రూపాయల వరకు ధర పలుకుతుంది. దేశంలోనే కాకుండా అమెరికా, యూరప్ దేశాల్లో కూడా దీనికి విపరీతమైన డిమాండ్ పెరగడంతో విదేశీ మారక ద్రవ్యం కూడా సమకూరుతోంది.
ఆయుర్వేదంలో అపర సంజీవని
ఆధునిక జీవనశైలిలో రోగనిరోధక శక్తి పెంచుకోవడానికి చాలామంది ఆయుర్వేదం వైపు మొగ్గు చూపుతున్నారు. శారీరక బలాన్ని పెంచడం, ఒత్తిడిని తగ్గించడం, యాంటీ ఏజింగ్ గుణాలు, దీర్ఘకాలిక వ్యాధుల నివారణలో శిలాజిత్ అద్భుతంగా పనిచేస్తుంది. ప్రస్తుతం ప్రముఖ కంపెనీలు దీనిని క్యాప్సూల్స్, పౌడర్, రెసిన్ రూపంలో మార్కెట్లోకి తెస్తున్నాయి.
తక్కువ పెట్టుబడి.. లక్షల లాభాలు
పర్వత ప్రాంతాల్లో నివసించే ప్రజలకు ఇది అద్భుతమైన ఉపాధి వనరు. సరైన శిక్షణ, నాణ్యమైన శుద్ధి ప్రక్రియను పాటిస్తే, తక్కువ పెట్టుబడితోనే లక్షల రూపాయల ఆదాయం గడించవచ్చని నిపుణులు చెబుతున్నారు. ఇది గ్రామీణ ఆర్థిక వ్యవస్థను బలోపేతం చేయడంలో కీలక పాత్ర పోషిస్తోంది.
జాగ్రత్త తప్పనిసరి
శిలాజిత్ సేకరించడం ఎంతో ప్రమాదకరమైన పని. ఎత్తైన శిఖరాల మీదకు వెళ్లేటప్పుడు భద్రతా జాగ్రత్తలు తీసుకోవడం అవసరం. అలాగే మార్కెట్లో కల్తీ శిలాజిత్ కూడా ఎక్కువగా దొరుకుతోంది. వినియోగదారులు దాని స్వచ్ఛతను పరీక్షించుకున్న తర్వాతే కొనుగోలు చేయాలని నిపుణులు సూచిస్తున్నారు. శిలాజిత్ కేవలం ఒక ఔషధం మాత్రమే కాదు ప్రకృతి హిమాలయాలకు ఇచ్చిన గొప్ప సంపద. దీనిని సరైన పద్ధతిలో వెలికితీసి, మార్కెటింగ్ చేయగలిగితే హిమాలయ ప్రాంతాల రూపురేఖలే మారిపోతాయనడంలో సందేహం లేదు.