ఎంత అవసరం వచ్చినా.. ఇలాంటోళ్ల నుంచి మాత్రం అప్పు తీసుకోకండి!
అత్యవసర పరిస్థితుల్లో రుణాలు తీసుకునేటప్పుడు సరైన మార్గాన్ని ఎంచుకోవడం ముఖ్యం. అధిక వడ్డీ, అక్రమ ఫైనాన్షియర్లు, అపరిచిత రుణ యాప్ల వల్ల ఆర్థిక, మానసిక సమస్యలు, సంబంధాల నష్టం సంభవించవచ్చు. బ్యాంకులను, గుర్తింపు పొందిన ఆర్థిక సంస్థల ను మాత్రమే ఆశ్రయించాలి.
అత్యవసర పరిస్థితుల్లో డబ్బు అవసరం వచ్చినప్పుడు చాలామంది పరిచయస్తులు, స్నేహితుల నుంచి అప్పు తీసుకోవడానికి ప్రయత్నిస్తుంటారు. అయితే ఎవరి వద్ద నుంచి డబ్బు తీసుకుంటున్నామన్నది కూడా ఆర్థిక భద్రతలో కీలక అంశమని ఆర్థిక నిపుణులు హెచ్చరిస్తున్నారు. కొంతమంది నుంచి అప్పు తీసుకోవడం వల్ల ఆర్థిక సమస్యలతో పాటు మానసిక ఒత్తిడి, సంబంధాల దెబ్బతినే ప్రమాదం కూడా ఉంటుందని చెబుతున్నారు.
ముఖ్యంగా అధిక వడ్డీలు వసూలు చేసే వ్యక్తుల నుంచి అప్పులు తీసుకోవడం ప్రమాదకరమని సూచిస్తున్నారు. కొంతమంది అత్యవసర పరిస్థితిని అవకాశంగా తీసుకుని నెలకు భారీ వడ్డీలు విధిస్తుంటారు. ప్రారంభంలో చిన్న మొత్తంగా కనిపించిన అప్పు, తర్వాత భారీ భారంగా మారే అవకాశం ఉంటుంది. అలాగే చట్టబద్ధమైన రాతపూర్వక ఒప్పందం లేకుండా డబ్బు ఇచ్చే వ్యక్తుల విషయంలో జాగ్రత్తగా ఉండాలని నిపుణులు చెబుతున్నారు. మౌఖిక ఒప్పందాలపై ఆధారపడితే తర్వాత వడ్డీ, గడువు, చెల్లింపుల విషయంలో వివాదాలు తలెత్తే అవకాశం ఉంటుంది.
సంబంధాలను ఒత్తిడికి గురిచేసే వ్యక్తుల నుంచి కూడా అప్పు తీసుకోకూడదని సూచిస్తున్నారు. కొందరు డబ్బు ఇచ్చిన తర్వాత వ్యక్తిగత జీవితంలో జోక్యం చేసుకోవడం, పదేపదే ఒత్తిడి చేయడం లేదా అవమానకరంగా ప్రవర్తించడం జరుగుతుందని చెబుతున్నారు. ఇది కుటుంబ, స్నేహ సంబంధాలపై ప్రతికూల ప్రభావం చూపవచ్చు. ఇక అక్రమ ఫైనాన్స్ కార్యకలాపాలు నిర్వహించే వ్యక్తులు లేదా గుర్తింపు లేని యాప్స్ ద్వారా రుణాలు తీసుకోవడం మరింత ప్రమాదకరమని హెచ్చరిస్తున్నారు. ఇటీవలి కాలంలో డిజిటల్ లోన్ యాప్స్ ద్వారా వేధింపులు, అధిక వడ్డీలు, వ్యక్తిగత డేటా దుర్వినియోగం వంటి ఘటనలు పెరుగుతున్నాయి.
అత్యవసర పరిస్థితుల్లో బ్యాంకులు, గుర్తింపు పొందిన ఆర్థిక సంస్థలు లేదా చట్టబద్ధమైన రుణ వనరులను మాత్రమే ఆశ్రయించడం మంచిదని నిపుణులు సూచిస్తున్నారు. అప్పు తీసుకునే ముందు వడ్డీ రేటు, చెల్లింపు గడువు, నిబంధనలు పూర్తిగా అర్థం చేసుకోవడం అత్యంత అవసరమని చెబుతున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి