పర్సనల్ లోన్ vs క్రెడిట్ కార్డ్ క్యాష్ లిమిట్.. ఎమర్జెన్సీలో ఏది బెస్ట్?
అత్యవసరంగా డబ్బు అవసరమైనప్పుడు క్రెడిట్ కార్డ్ క్యాష్ అడ్వాన్స్, పర్సనల్ లోన్ రెండు ఎంపికలు. చిన్న మొత్తాలు, తక్షణ అవసరాలకు క్రెడిట్ కార్డ్ క్యాష్ అనుకూలం, కానీ అధిక వడ్డీ, ఫీజులు ఉంటాయి. పెద్ద మొత్తాలకు, దీర్ఘకాలిక అవసరాలకు పర్సనల్ లోన్ తక్కువ వడ్డీతో మెరుగైన ఎంపిక.
అత్యవసర పరిస్థితుల్లో డబ్బు అవసరం వచ్చినప్పుడు చాలా మంది ముందుగా ఆలోచించే రెండు ప్రధాన ఎంపికలు క్రెడిట్ కార్డు క్యాష్ లిమిట్, పర్సనల్ లోన్. అయితే వీటిలో ఏది మంచి ఆప్షన్ అన్నది పరిస్థితి, అవసరమైన మొత్తం, తిరిగి చెల్లించే సామర్థ్యంపై ఆధారపడి ఉంటుందని ఆర్థిక నిపుణులు చెబుతున్నారు. క్రెడిట్ కార్డుల్లో అందుబాటులో ఉండే క్యాష్ అడ్వాన్స్ లేదా క్యాష్ లిమిట్ అత్యవసర పరిస్థితుల్లో వెంటనే నగదు పొందేందుకు సహాయపడుతుంది. బ్యాంక్ అనుమతి కోసం ఎక్కువ సమయం వేచి ఉండాల్సిన అవసరం ఉండదు. ఏటీఎంల ద్వారా తక్షణమే డబ్బు తీసుకోవచ్చు. ముఖ్యంగా చిన్న మొత్తాలు, తాత్కాలిక అవసరాల కోసం ఇది ఉపయోగకరంగా కనిపిస్తుంది.
అయితే దీనికి భారీ ఖర్చు ఉండొచ్చని నిపుణులు హెచ్చరిస్తున్నారు. సాధారణంగా క్యాష్ అడ్వాన్స్పై వడ్డీ వెంటనే ప్రారంభమవుతుంది. క్రెడిట్ కార్డు కొనుగోళ్లకు లభించే వడ్డీ రహిత కాలం ఇందులో వర్తించదు. చాలా బ్యాంకులు సంవత్సరానికి 30 శాతం నుంచి 45 శాతం వరకు వడ్డీ వసూలు చేస్తుంటాయి. అదనంగా క్యాష్ విత్డ్రాయల్ ఫీజులు కూడా ఉంటాయి. ఫలితంగా చిన్న మొత్తమే తీసుకున్నా, తిరిగి చెల్లించే సమయానికి భారీ భారం ఏర్పడే అవకాశం ఉంటుంది.
ఇక పర్సనల్ లోన్ విషయానికి వస్తే, పెద్ద మొత్తంలో డబ్బు అవసరమైనప్పుడు ఇది కొంత మెరుగైన ఎంపికగా భావిస్తున్నారు. పర్సనల్ లోన్లపై వడ్డీ రేట్లు సాధారణంగా క్రెడిట్ కార్డు క్యాష్ అడ్వాన్స్తో పోలిస్తే తక్కువగా ఉంటాయి. EMI రూపంలో నిర్దిష్ట కాలవ్యవధిలో చెల్లించే అవకాశం ఉండటంతో ఆర్థిక ప్రణాళిక సులభంగా ఉంటుంది. అయితే పర్సనల్ లోన్కు బ్యాంక్ అర్హత పరిశీలన, ఆదాయ ధృవీకరణ, క్రెడిట్ స్కోర్ వంటి అంశాలు కీలకం. డబ్బు విడుదల కావడానికి కొంత సమయం పట్టే అవకాశం కూడా ఉంటుంది.
ఆర్థిక నిపుణుల అభిప్రాయం ప్రకారం అత్యవసరంగా చిన్న మొత్తం అవసరమై, కొన్ని రోజుల్లో తిరిగి చెల్లించే సామర్థ్యం ఉంటే మాత్రమే క్రెడిట్ కార్డు క్యాష్ లిమిట్ ఉపయోగించడం మంచిది. కానీ పెద్ద మొత్తాలు లేదా ఎక్కువ కాలం అవసరమయ్యే పరిస్థితుల్లో పర్సనల్ లోన్ తక్కువ ఖర్చుతో కూడిన, సురక్షితమైన ఎంపికగా ఉంటుంది.
మరిన్ని బిజినెస్ వార్తల కోసం ఇక్కడ క్లిక్ చేయండి