RD స్కీమ్లో ఉన్నవారికి అలర్ట్! భారీ రాబడి రావాలంటే.. ఈ తప్పులు చేయకండి!
రికరింగ్ డిపాజిట్లో వరుసగా మూడు వాయిదాలు చెల్లించకపోతే ఖాతా ఇర్రెగ్యులర్గా మారే అవకాశం ఉందని నిపుణులు చెబుతున్నారు. దీనివల్ల పెనాల్టీలు, తక్కువ వడ్డీ, మెచ్యూరిటీ మొత్తంపై ప్రభావం పడొచ్చు. అయితే బకాయిలను తర్వాత చెల్లించి ఖాతాను కొనసాగించే అవకాశం చాలా బ్యాంకులు కల్పిస్తున్నాయని పేర్కొంటున్నారు.
ప్రస్తుతం చాలా మంది చిన్న మొత్తాల్లో క్రమంగా పొదుపు చేసేందుకు రికరింగ్ డిపాజిట్ (RD) పథకాలను ఎంచుకుంటున్నారు. బ్యాంకులు, పోస్టాఫీసులు అందించే ఈ పథకాల్లో ప్రతి నెలా ఒక నిర్దిష్ట మొత్తాన్ని జమ చేస్తూ భవిష్యత్తుకు నిధులు కూడబెట్టుకోవచ్చు. స్థిరమైన వడ్డీ రేటుతో పాటు పెట్టుబడిలో క్రమశిక్షణను అలవాటు చేసే ఈ పథకం మధ్యతరగతి కుటుంబాల్లో ఎంతో ప్రాచుర్యం పొందింది. అయితే కొన్నిసార్లు ఆర్థిక ఇబ్బందులు, మర్చిపోవడం లేదా ఇతర కారణాల వల్ల వాయిదాలు చెల్లించకుండా ఉండే పరిస్థితులు ఎదురవుతుంటాయి. ముఖ్యంగా వరుసగా మూడు వాయిదాలు మిస్ అయితే ఏమవుతుందనే సందేహం చాలామందిలో ఉంటుంది.
నిపుణుల ప్రకారం మూడు వాయిదాలు చెల్లించకపోయినా బ్యాంకులు లేదా పోస్టాఫీసులు వెంటనే RD ఖాతాను మూసివేయవు. అయితే ఆ ఖాతా ఇర్రెగ్యులర్ డిపాజిట్గా మారుతుంది. అంటే ఖాతా షెడ్యూల్ ప్రకారం కొనసాగడం లేదని పరిగణిస్తారు. ఈ సమయంలో బ్యాంకులు ఆలస్య రుసుములు లేదా పెనాల్టీలు విధించే అవకాశం ఉంటుంది. వాయిదాలు మిస్ కావడం వల్ల ప్రధాన ప్రభావం మెచ్యూరిటీ మొత్తంపై పడుతుంది. సాధారణంగా RDలో ప్రతి నెలా జమ చేసిన మొత్తంపై వడ్డీ లెక్కించబడుతుంది. కాబట్టి కొన్ని నెలలు చెల్లింపులు జరగకపోతే వడ్డీ లెక్కింపు కూడా తగ్గుతుంది. ఫలితంగా పథకం పూర్తయ్యే సమయానికి పొందే మొత్తం అంచనా వేసిన దానికంటే తక్కువగా ఉండే అవకాశం ఉంది.
అయితే ఖాతాదారులకు చెల్లించని వాయిదాలను తర్వాత ఒకేసారి చెల్లించే అవకాశం చాలా బ్యాంకులు కల్పిస్తాయి. పెనాల్టీతో పాటు బకాయి మొత్తాన్ని చెల్లించి ఖాతాను మళ్లీ సాధారణ స్థితికి తీసుకురావచ్చు. కానీ చాలా కాలం పాటు చెల్లింపులు జరగకపోతే బ్యాంక్ ఖాతాను ముందుగానే మూసివేయడం లేదా ప్రీమెచ్యూర్గా మార్చే అవకాశం ఉంటుంది. ఒకవేళ RD ఖాతాను గడువు పూర్తికాకముందే మూసివేస్తే వడ్డీ రేటు తగ్గే అవకాశముంది. అదనంగా ప్రీమెచ్యూర్ క్లోజర్ ఛార్జీలు కూడా వర్తించవచ్చు. దీంతో చివరికి పొందే రాబడి తగ్గిపోతుంది.
అందుకే నిపుణులు RD వాయిదాలను సమయానికి చెల్లించాలని సూచిస్తున్నారు. మొబైల్ రిమైండర్లు పెట్టుకోవడం లేదా ఆటో డెబిట్ సదుపాయం వినియోగించడం ద్వారా వాయిదాలు మిస్ కాకుండా చూసుకోవచ్చు. క్రమశిక్షణతో పెట్టుబడి కొనసాగిస్తేనే RD పథకం ద్వారా ఆశించిన ఆర్థిక లక్ష్యాలను చేరుకోవచ్చని ఆర్థిక నిపుణులు చెబుతున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి