House Construction: ఇల్లు కట్టిస్తున్నారా? ఏ పనికి ఎన్ని రోజులు పడుతుంది.. క్యూరింగ్ ఎన్ని రోజులు చేయాలి? పూర్తి వివరాలు!
House Construction: సొంతింటి నిర్మాణం అంటే కేవలం ఇటుకలు, సిమెంట్, స్టీల్‌తో గోడలు కట్టడం మాత్రమే కాదు. ప్రతి పనికి సరైన సమయం కేటాయించడం, నాణ్యమైన మెటీరియల్ ఉపయోగించడం, కాంక్రీట్‌కు తగినంత క్యూరింగ్ చేయడం కూడా అంతే ముఖ్యం. పనులు త్వరగా పూర్తి చేయాలనే తొందరలో నాణ్యతను పక్కన పెట్టకూడదు. సరైన ప్రణాళిక, నిపుణుల పర్యవేక్షణతో నిర్మించిన ఇల్లు మాత్రమే దీర్ఘకాలం మన్నికగా, సురక్షితంగా ఉంటుంది.
House Construction: సొంతింటి నిర్మాణం అనేది ప్రతి ఒక్కరి జీవితంలో ఎంతో ముఖ్యమైన కల. అయితే ఇంటి నిర్మాణం ప్రారంభించిన తర్వాత ఏ పని ఎప్పుడు చేయాలి? పునాదులు వేయడానికి ఎన్ని రోజులు పడుతుంది? పిల్లర్లు, బీమ్స్, స్లాబ్ నిర్మాణానికి ఎంత సమయం కేటాయించాలి? ముఖ్యంగా కాంక్రీట్ పనులు పూర్తయిన తర్వాత ఎన్ని రోజులు క్యూరింగ్ చేయాలి? అనే విషయాలపై చాలామందికి సరైన అవగాహన ఉండదు. నిర్మాణ పనుల్లో తొందరపాటు చేయడం వల్ల భవిష్యత్తులో ఇంటి నాణ్యతపై ప్రభావం పడే అవకాశం ఉంటుంది. మరి ఇంటి నిర్మాణంలో మొదటి రోజు నుంచి స్లాబ్, ఇటుకల పని వరకు ఏయే దశల్లో ఎలాంటి పనులు చేయాలో ఇప్పుడు తెలుసుకుందాం.
పునాదుల నిర్మాణం.. మొదటి 9 రోజులు కీలకం
ఇంటి నిర్మాణంలో పునాదుల పనులు అత్యంత కీలకమైనవి. భవనం మొత్తం బరువును భూమికి బదిలీ చేసే బాధ్యత పునాదులదే. కాబట్టి ఈ దశలో నాణ్యత విషయంలో ఎలాంటి రాజీ పడకూడదు. మొదట నిర్మాణ స్థలాన్ని పూర్తిగా శుభ్రం చేసి, రాళ్లు, చెత్త, మొక్కలను తొలగించాలి. ఆ తర్వాత ఇంటి ప్లాన్ ప్రకారం స్థలంలో మార్కింగ్ చేయాలి. సంప్రదాయం ప్రకారం భూమి పూజ కూడా ఇదే సమయంలో నిర్వహిస్తారు. మార్కింగ్ పూర్తయిన తర్వాత పునాదుల కోసం తవ్వకం చేపడతారు. జేసీబీ సహాయంతో ఒక రోజులోనే ఈ పని పూర్తయ్యే అవకాశం ఉంటుంది. కూలీలతో తవ్విస్తే రెండు రోజులు పట్టవచ్చు. అనంతరం గుంతలను సరిచేసి, సుమారు 6 అంగుళాల మందంతో పీసీసీ (PCC) బెడ్ వేస్తారు.
తర్వాత పీసీసీ బెడ్‌పై కాలమ్ స్థానాలను గుర్తించి, ఫుటింగ్‌లు, కాలమ్‌లకు అవసరమైన స్టీల్‌ను సిద్ధం చేస్తారు. షట్టరింగ్ ఏర్పాటు చేసిన అనంతరం M20 లేదా M25 గ్రేడ్ కాంక్రీట్‌తో ఫుటింగ్‌లను పోస్తారు. ఆ తర్వాత పెడెస్టల్ కాలమ్‌లకు స్టీల్, షట్టరింగ్ ఏర్పాటు చేసి కాంక్రీట్ వేస్తారు. కాంక్రీట్ తగినంత గట్టిపడిన తర్వాత షట్టరింగ్‌ను తొలగిస్తారు.
బ్యాక్‌ఫిల్లింగ్, ప్లింత్ బీమ్ పనులు.. 10 నుంచి 40వ రోజు వరకు
పెడెస్టల్ కాలమ్‌ల నిర్మాణం పూర్తయిన తర్వాత ప్లింత్ బీమ్ స్థాయి వరకు కాలమ్‌లను నిర్మిస్తారు. అనంతరం పునాదుల చుట్టూ మట్టిని పూడ్చే పనులు ప్రారంభమవుతాయి. ఈ ప్రక్రియనే బ్యాక్‌ఫిల్లింగ్ (Backfilling) అంటారు. బ్యాక్‌ఫిల్లింగ్ చేసేటప్పుడు ఒకేసారి ఎక్కువ మట్టిని పోయకూడదు. పొరల వారీగా మట్టిని నింపుతూ, ప్రతి పొరను తగిన తేమతో కాంపాక్షన్ చేయాలి. ఇలా చేయడం వల్ల భవిష్యత్తులో నేల కుంగిపోయే ప్రమాదం తగ్గుతుంది. అదే సమయంలో చెదల నివారణ కోసం యాంటీ టెర్మైట్ ట్రీట్‌మెంట్ కూడా చేయించాలి. నిర్మాణ నిపుణుల సూచనల మేరకు సరైన రసాయనాలు, మోతాదులు, పద్ధతులను అనుసరించాలి.
నేల నింపే పనులు పూర్తయిన తర్వాత ప్లింత్ బీమ్ కోసం బెడ్‌ను సిద్ధం చేస్తారు. సాధారణంగా సుమారు 3 అంగుళాల మందంతో PCC లేదా డిజైన్‌లో సూచించిన గ్రేడ్ కాంక్రీట్ వేస్తారు. అనంతరం ప్లింత్ బీమ్‌కు అవసరమైన మార్కింగ్, స్టీల్ కట్టడం, షట్టరింగ్ పనులు చేపడతారు. అన్ని ఏర్పాట్లు పూర్తయిన తర్వాత ప్లింత్ బీమ్‌కు కాంక్రీట్ పోస్తారు. కాంక్రీట్ వేసిన తర్వాత తగినంత క్యూరింగ్ చేయాలి. ఈ బీమ్ భవనానికి స్థిరత్వాన్ని అందించడంలో కీలక పాత్ర పోషిస్తుంది. ప్లింత్ బీమ్ పని పూర్తయిన తర్వాత దాని పైన బేస్‌మెంట్ గోడలను నిర్మిస్తారు. రోడ్డు స్థాయి నుంచి సుమారు 2.5 నుంచి 3 అడుగుల ఎత్తు వరకు సిమెంట్ ఇటుకలు లేదా ఎర్ర ఇటుకలతో గోడలు నిర్మించవచ్చు. ఈ పనికి సాధారణంగా 5 నుంచి 6 రోజులు పట్టవచ్చు.
తర్వాత బేస్‌మెంట్ లోపలి భాగాన్ని మొరం, ఇసుక లేదా ఇంజినీరింగ్ డిజైన్‌లో సూచించిన మెటీరియల్‌తో నింపుతారు. ఈ సమయంలో కూడా పొరల వారీగా కాంపాక్షన్ చేయడం ముఖ్యం. చివరగా నేలపై సుమారు 3 నుంచి 4 అంగుళాల మందంతో M15 కాంక్రీట్ లేదా డిజైన్ ప్రకారం సూచించిన బెడ్ వేస్తారు. దీనివల్ల ఇంటి ఫ్లోరింగ్‌కు గట్టి ఆధారం ఏర్పడుతుంది.
కాలమ్‌ల నిర్మాణం నుంచి స్లాబ్ పోరింగ్ వరకు
బేస్‌మెంట్ పనులు పూర్తయిన తర్వాత ప్రధాన కాలమ్‌ల నిర్మాణం ప్రారంభమవుతుంది. కాలమ్‌లను రూఫ్ బీమ్‌ల దిగువ స్థాయి వరకు డిజైన్ ప్రకారం నిర్మిస్తారు. ఇందుకోసం స్టీల్ కట్టడం, షట్టరింగ్ ఏర్పాటు చేయడం, కాంక్రీట్ పోయడం వంటి పనులు చేపడతారు.
కాలమ్‌లకు కాంక్రీట్ పోసిన తర్వాత కనీసం 7 రోజుల పాటు తగిన క్యూరింగ్ చేయడం మంచిది. ముఖ్యంగా వేసవిలో కాంక్రీట్ త్వరగా తేమ కోల్పోకుండా గన్నీ బ్యాగులతో కప్పి నీటిని అందించాలి. కాలమ్‌ల పనులు పూర్తయ్యాక స్లాబ్ నిర్మాణానికి అవసరమైన సెంటరింగ్, షట్టరింగ్ పనులు ప్రారంభిస్తారు. నగర ప్రాంతాల్లో కార్మికుల లభ్యతను బట్టి ఈ పనులు 4 రోజుల్లో పూర్తయ్యే అవకాశం ఉంటుంది. గ్రామీణ ప్రాంతాల్లో వారం రోజులు పట్టవచ్చు. సెంటరింగ్ పనులు పూర్తయిన తర్వాత బీమ్‌లకు స్టీల్ అమర్చడం, స్లాబ్‌కు అవసరమైన రీబార్ వేయడం, ఎలక్ట్రికల్ కండ్యూట్లు ఏర్పాటు చేయడం వంటి పనులు నిర్వహిస్తారు. ఇంజినీర్ తనిఖీ చేసిన తర్వాతే కాంక్రీట్ పోయాలి. స్లాబ్ పోరింగ్ అనేది ఇంటి నిర్మాణంలో అత్యంత ముఖ్యమైన దశల్లో ఒకటి. కాంక్రీట్ వేసేటప్పుడు సరైన మిక్స్ డిజైన్, వైబ్రేషన్, లెవలింగ్ వంటి అంశాలను జాగ్రత్తగా పాటించాలి. ముఖ్యంగా కాంక్రీట్‌లో గాలి ఖాళీలు ఏర్పడకుండా వైబ్రేటర్ ఉపయోగించడం అవసరం.
స్లాబ్ క్యూరింగ్.. కనీసం 14 రోజులు
స్లాబ్ పోరింగ్ పూర్తయిన తర్వాత క్యూరింగ్‌పై ప్రత్యేక శ్రద్ధ పెట్టాలి. కాంక్రీట్‌కు అవసరమైన బలం రావడానికి తగినంత తేమ ఉండటం చాలా ముఖ్యం. సాధారణంగా స్లాబ్‌పై చిన్న గట్లు ఏర్పాటు చేసి నీటిని నిల్వ ఉంచే విధానాన్ని అనుసరిస్తారు. ఇలా చేయడం వల్ల కాంక్రీట్ త్వరగా ఎండిపోకుండా ఉంటుంది. సాధారణ పోర్ట్‌లాండ్ సిమెంట్‌తో చేసిన కాంక్రీట్‌కు కనీసం 7 రోజుల క్యూరింగ్ అవసరం. బ్లెండెడ్ సిమెంట్ లేదా మినరల్ అడ్మిక్చర్స్ ఉపయోగించినప్పుడు కనీసం 10 రోజులు అవసరం కావచ్చు. వేడి, పొడి వాతావరణంలో ఈ వ్యవధిని మరింత పెంచాలని నిర్మాణ నిపుణులు సూచిస్తారు. స్లాబ్ వంటి ముఖ్యమైన RCC పనులకు 14 రోజుల క్యూరింగ్‌ను లక్ష్యంగా పెట్టుకోవడం మంచిది. క్యూరింగ్ పూర్తయిందని వెంటనే సెంటరింగ్, సపోర్టింగ్‌లన్నింటినీ తొలగించకూడదు. స్లాబ్ మందం, స్పాన్, కాంక్రీట్ బలం, ఉష్ణోగ్రత, షట్టరింగ్ విధానం ఆధారంగా ఇంజినీర్ సూచనల మేరకు మాత్రమే వాటిని తొలగించాలి.
ఇటుకల పని.. గోడల నిర్మాణానికి ఎంత సమయం పడుతుంది?
స్లాబ్ పనులు పూర్తయి, అవసరమైన భద్రతా ప్రమాణాల ప్రకారం షట్టరింగ్ సపోర్టులు తొలగించిన తర్వాత ఇటుకల పని ప్రారంభిస్తారు. ఇంటి ప్లాన్‌ను బట్టి 9 అంగుళాలు లేదా 4.5 అంగుళాల మందంతో గోడలు నిర్మిస్తారు. సాధారణంగా 1,000 నుంచి 2,000 చదరపు అడుగుల విస్తీర్ణంలో ఉన్న డబుల్ బెడ్‌రూమ్ ఇంటికి ఇటుకల పని పూర్తి కావడానికి సుమారు 14 నుంచి 15 రోజులు పట్టవచ్చు. అయితే కూలీల సంఖ్య, ఇటుకల లభ్యత, గోడల సంఖ్య, ఇంటి డిజైన్ ఆధారంగా ఈ సమయం మారుతుంది. ఇటుకల పని పూర్తయిన తర్వాత గోడలకు అవసరమైన క్యూరింగ్ చేయాలి. సిమెంట్ మోర్టార్‌లో తేమ ఉండేలా నీటిని అందించడం వల్ల మోర్టార్ సరిగా గట్టిపడుతుంది. అనంతరం ప్లాస్టరింగ్, ఎలక్ట్రికల్, ప్లంబింగ్, ఫ్లోరింగ్ వంటి తదుపరి పనులను ప్రారంభించవచ్చు.
ఇంటి నిర్మాణంలో ఏ పనికి ఎన్ని రోజులు క్యూరింగ్ చేయాలి?
నిర్మాణంలో కాంక్రీట్ పనులన్నింటికీ ఒకే రకమైన క్యూరింగ్ వ్యవధి ఉండదు. ఉపయోగించిన సిమెంట్ రకం, వాతావరణ పరిస్థితులు, కాంక్రీట్ గ్రేడ్ ఆధారంగా క్యూరింగ్ సమయం మారుతుంది.
నిర్మాణ పని సాధారణ క్యూరింగ్:
- ఫుటింగ్‌లు – 7–14 రోజులు
- పెడెస్టల్ కాలమ్‌లు – 7–14 రోజులు
- ప్రధాన కాలమ్‌లు -7–14 రోజులు
- ప్లింత్ బీమ్ – 7–14 రోజులు
- బేస్‌మెంట్ కాంక్రీట్ బెడ్ – 7 రోజులు లేదా అంతకంటే ఎక్కువ
- రూఫ్ స్లాబ్ – 14 రోజులు లక్ష్యంగా పెట్టుకోవాలి
- ఇటుకల గోడలు – సాధారణంగా 7 రోజులు
మరిన్ని బిజినెస్ వార్తల కోసం ఇక్కడ క్లిక్ చేయండి