Andhra: కుల సర్టిఫికెట్ కోసం ఆఫీసుల చుట్టూ తిరగాల్సిన పని లేదు.. వాట్సాప్‌లోనే పొందండి!
ఏపీ ప్రభుత్వం కుల ధ్రువీకరణ పత్రం జారీ ప్రక్రియను మరింత సులభతరం చేసింది. ఇకపై రెవెన్యూ కార్యాలయాలు, సచివాలయాలు, మీ సేవా కేంద్రాల చుట్టూ తిరగాల్సిన అవసరం లేకుండా మనమిత్ర వాట్సాప్ గవర్నెన్స్ ద్వారా కుల సర్టిఫికెట్ కోసం దరఖాస్తు చేసుకోవచ్చు.
కుల ధ్రువీకరణ పత్రం కావాలంటే ఇకపై రెవెన్యూ ఆఫీస్.. సచివాలయం.. మీ సేవా కేంద్రం అంటూ తిరగాల్సిన అవసరం లేదు. చేతిలో స్మార్ట్‌ఫోన్ ఉంటే చాలు.. వాట్సాప్‌లోనే అప్లై చేసి క్యాస్ట్ సర్టిఫికెట్ పొందొచ్చు. ఆంధ్రప్రదేశ్ ప్రభుత్వం ఈ సేవను మరింత సులభతరం చేసింది.
వాట్సాప్‌లోనే అప్లికేషన్.. ఫోన్‌లోనే సర్టిఫికెట్
ఏపీ ప్రభుత్వం అందుబాటులోకి తీసుకొచ్చిన మనమిత్ర వాట్సాప్ గవర్నెన్స్ ద్వారా కుల ధ్రువీకరణ పత్రాన్ని సులభంగా డౌన్‌లోడ్ చేసుకోవచ్చు. ఇందుకోసం 9552300009 నంబర్‌కు ముందుగా వాట్సాప్‌లో “Hi” అని మెసేజ్ పంపాలి.
ఆ తర్వాత కనిపించే ఆప్షన్లలో రెవిన్యూ సర్వీస్( Revenue Services)ను ఎంచుకోవాలి. అందులో Re-Issuance of Integrated Certificates ఆప్షన్‌పై క్లిక్ చేయాలి. అనంతరం ఆధార్ నంబర్ నమోదు చేస్తే మొబైల్‌కు ఓటీపీ వస్తుంది. ఆ ఓటీపీని ఎంటర్ చేసి సబ్మిట్ చేయాలి. తర్వాత అడిగిన వివరాలను నమోదు చేసి, నిర్ణీత రుసుము రూ.40 చెల్లిస్తే క్యాస్ట్ సర్టిఫికెట్ PDF రూపంలో మొబైల్‌లోనే డౌన్‌లోడ్ చేసుకోవచ్చు.
ఒకసారి తీసుకున్న సర్టిఫికెట్.. మళ్లీ ఎప్పుడు కావాలంటే అప్పుడు!
ఇప్పటికే కుల ధ్రువీకరణ పత్రం జారీ అయి ఉన్నవారికి కూడా ఈ సేవ ఉపయోగపడుతుంది. అవసరమైన ప్రతిసారీ కొత్తగా కార్యాలయాలకు వెళ్లాల్సిన అవసరం లేకుండా.. వాట్సాప్ ద్వారా సర్టిఫికెట్‌ను తిరిగి డౌన్‌లోడ్ చేసుకునే అవకాశం ఉంది. విద్య, ఉద్యోగాలు, ప్రభుత్వ పథకాలు, ఇతర అవసరాల కోసం కుల ధ్రువీకరణ పత్రం అవసరమయ్యే వారికి ఈ సేవ ఉపయోగకరంగా ఉంటుందని ప్రభుత్వం తెలిపింది. ముఖ్యంగా డిజిటల్ సేవలకు అలవాటుపడిన యువతకు ఇది మరింత సౌకర్యంగా మారనుంది.
సింపుల్‌గా చెప్పాలంటే.. వాట్సాప్‌లో Hi → Revenue Services → Re-Issuance of Integrated Certificates → Aadhaar → OTP → వివరాలు → రూ.40 చెల్లింపు → PDF డౌన్‌లోడ్. అంటే.. సర్టిఫికెట్ కోసం ఆఫీసుల చుట్టూ తిరిగే రోజులు పోయినట్టే!