అల్లర్లతో అట్టుడుకుతున్న లెబనాన్, ప్రధాని హసన్ రాజీనామా

ఇటీవలి పేలుళ్ల కారణంగా కకావికలమైన లెబనాన్ రాజధాని బీరూట్ లో అల్లర్లు, ఘర్షణలు కొనసాగుతున్నాయి. పేలుళ్లలో మరణించినవారి సంఖ్య 160 కి పెరగగా, ఆరువేలమందికి పైగా గాయపడ్డారు. పరిస్థితిని అదుపు చేయలేక చేతులెత్తేసిన లెబనాన్ ప్రధాని హసన్ దియాబ్ రాజీనామా చేస్తున్నట్టు ప్రకటించారు. ఆయన అధ్యక్షతన జరిగిన కేబినెట్ సమావేశం అనంతరం పలువురు మంత్రులు తాము కూడా రాజీనామాలు చేస్తామని ప్రకటించారు. అవినీతితో కూడిన ఈ అరాచక ప్రభుత్వానికి చరమగీతం పాడాలంటూ..సెంట్రల్ బీరూట్ లో వేలమంది నిరసనకారులు భద్రతాదళాలతో ఘర్షణలకు తలపడ్డారు.

ఆరు రోజుల క్రితం బీరూట్ లో సంభవించిన జంట పేలుళ్లు ఇంకా భయానక పరిస్థితికి అద్దం పడుతున్నాయి. వీధుల్లో  ఇప్పటికీ శిథిలాలను పోలీసులు, వాలంటీర్లు తొలగిస్తునే ఉన్నారు. ప్రధాని హసన్ రాజీనామా సమాచారం తెలుసుకున్న అనేకమంది  ట్రిపోలీ వీధుల్లో తమ కార్ల హారన్లు మోగిస్తూ  హర్షాన్ని వ్యక్తం చేశారు.