భర్తను హత్య చేసినా కుటుంబ పింఛనుకు భార్య అర్హురాలే, పంజాబ్, హర్యానా హైకోర్టు అనూహ్య తీర్పు

ఓ కేసులో పంజాబ్, హర్యానా హైకోర్టు అరుదైన, అసాధారణ తీర్పునిచ్చింది. తన భర్తను భార్య హత్య చేసినా ఫ్యామిలీ పెన్షన్  పొందడానికి ఆమె అర్హురాలేనని రూలింగ్ ఇచ్చింది. ఈ పింఛను అన్నది ఓ సంక్షేమ పథకమని, ప్రభుత్వ ఉద్యోగి మరణించిన పక్షంలో ఆ కుటుంబానికి ఆర్ధిక సాయం చేయడానికి ఉద్దేశించినదని కోర్టు పేర్కొంది. భర్తను చంపిన క్రిమినల్ కేసులో భార్య దోషి అయినా సరే.. ఆమె ఇందుకు అర్హురాలన్నది ఈ తీర్పు ముఖ్యాంశం. హర్యానాకు సంబంధించిన ఓ కేసును  కోర్టు ఈ నెల 25 న విచారించింది. అంబాలాకు చెందిన బల్జీత్ కౌర్ అనే మహిళ దాఖలు చేసిన పిటిషన్ ను ఈ  కోర్టు న్యాయమూర్తులు విచారిస్తూ.. ఈ ఉత్తర్వులను ప్రకటించారు. ఈమె భర్త 2008 లో మరణించాడు. అయితే ఆయనను ఈమె హతమార్చిందంటూ ఓ కేసు నమోదు కాగా 2011 లో  దోషిగా ఈమెను  అప్పటి కోర్టు పేర్కొంది. దీంతో బల్జీత్ కౌర్ కు కుటుంబ పింఛనును హర్యానా ప్రభుత్వం నిలిపివేసింది.

దీన్ని సవాలు చేస్తూ కౌర్ పంజాబ్, హర్యానాహైకోర్టు కెక్కింది. . ఈమెకు అనుకూలంగా న్యాయస్థానం తీర్పునిస్తూ… బకాయిలతో బాటు రెండు నెలల్లోగా ఆమెకు కుటుంబ పింఛను చెల్లించాలని హర్యానా ప్రభుత్వాన్ని ఆదేశించింది. ఈ మహిళ మళ్ళీ పెళ్లి చేసుకున్నా ఫామిలీ పెన్షన్ కి అర్హురాలేనని మరో ‘వరం’ కూడా ఇచ్చింది.