‘ వీళ్లా స్టార్ క్యాంపెయినర్లు’ ? వెంటనే తొలగించాలన్న ఈసీ  

కేంద్ర మంత్రి అనురాగ్ ఠాకూర్, బీజేపీ ఎంపీ పర్వేష్ సాహెబ్ సింగ్ వర్మలను వెంటనే స్టార్ ‘ప్రచార కర్తల’ జాబితా నుంచి తొలగించాలని ఎన్నికల కమిషన్ బీజేపీని ఆదేశించింది. ఢిల్లీ అసెంబ్లీ ఎన్నికలకు గాను ఈ ఇద్దరినీ పార్టీ ఈ లిస్టులో చేర్చిన సంగతి తెలిసిందే. తదుపరి ఆదేశాలు జారీ చేసేంతవరకు వీరిని ఈ హోదా నుంచి తప్పించాలని ఈసీ కోరింది. ఢిల్లీలో జరిగిన ఎన్నికల ప్రచారం సందర్భంగా తమ ప్రసంగాల్లో వీరు అత్యంత వివాదాస్పద వ్యాఖ్యలు చేశారు.

ఈ నెల 27 న నిర్వహించిన ప్రచారంలో.. అనురాగ్ ఠాకూర్.. ఈ దేశ ద్రోహులపై కాల్పులు జరపాలని.. అంటూ అసభ్య వ్యాఖ్య చేశారు. సీఏఏకు వ్యతిరేకంగా ఆందోళన చేస్తున్నవారిని ఉద్దేశించి ఆయన ఈ ‘ పిలుపునిచ్చారు’. దీనిపై ఆ మరుసటిరోజే ఆయనకు ఈసీ నోటీసు జారీ చేసింది. ఇక బీజేపీ ఎంపీ పర్వేష్ సాహెబ్ సింగ్ వర్మ.. తన ప్రచారం సందర్భంగా..  షాహీన్ బాగ్ వద్ద ధర్నా చేస్తున్న సీఏఏ నిరసనకారులను ఉద్దేశించిఅతి నీచమైన కామెంట్లు చేశారు. ‘ వాళ్ళు మీ ఇళ్లలో ప్రవేశించి.. మీ సిస్టర్స్ ని, కూతుళ్లను రేప్ చేస్తారని, వారిని చంపేస్తారని’  అన్నారు. ప్రధాని మోడీ గానీ, హోం మంత్రి అమిత్ షా గానీ మిమ్మల్ని రక్షించడానికి రాబోరని కూడా అన్నారు. ఈ విధమైన వ్యాఖ్యలపైఈసీ  మండిపడింది. అనురాగ్ ఠాకూర్, పర్వేష్ సాహెబ్  సింగ్ వర్మల ప్రసంగాలను వీడియోలతో సహా సమర్పించాలని ఢిల్లీ ఎన్నికల అధికారిని కోరింది. అటు-కొందరు కాంగ్రెస్ నేతలు కూడా వీరి వ్యాఖ్యలపై ఎన్నికల సంఘానికి ఫిర్యాదు చేశారు.